Nehemia

3 Nge hnei Eliasiba atre huuj ka sisitria, me itre trejin me angeic itre atre huuj, hna nyiqaane xupe la Hnë Lö Ne La Itre Mamoe. Nge hnei angatr hna ahmitrötrën* ej, me acile la itre hune qëhnelö. Angatr a ahmitrötrëne jë la götran ka tro qa ngöne la qëhnelö cili, uti hë la ita ne thup ne Hamea, memine la ita ne thup ne Hananel. 2 Nge ezi angatr, kola huliwa hnene la itre trahmanyi ne Ieriko. Nge ezine la itre trahmanyi cili, kola huliwa hnei Zakuri nekö i Imeri.

3 Hnene la itre nekö i Hasenaa hna xupe hmaca lo Qëhnelö Ne La Itre i, nge angatr a kuca ju fe la carpat, me acatrene la itre hune qëhnelö, me itre loka, me itre agö. 4 Nge ezi angatr, kola huliwa hnei Meremoth nekö i Uria, nekö i Koz. Nge ezi angeic, kola huliwa hnei Mesulama nekö i Berekia, nekö i Mesezabel. Nge ezi angeic, kola huliwa hnei Zadoka nekö i Baana. 5 Nge ezi angeic, kola huliwa hnene la itre atrene Tekoa, ngo xele kö la itre hene nöj ne Tekoa troa ipië* me huliwa fene la tane huliwa i angatr.

6 Nge hnei Iehoiada nekö i Pasea, me Mesulama nekö i Besodeia, hna cane hmaca lo qëhnelö ne lo Traone Hnapan. Hnei nyidroti hna kuca la carpat, me acatrene la itre hune qëhnelö, me itre loka, me itre agö. 7 Ezi nyidro, kola huliwa hnei Melatia qa Gibeona, me Iadona qa Merono. Nyidroti a traqa qa Gibeona me Mizepa, nge nyidroti a lapa fene la musi* ne la gavena Tröne La Hneopegejë. 8 Ezi nyidro, kola huliwa hnei Uziela nekö i Haraia ketre atre ka huliwane la gool. Nge ezi angeic, kola huliwa hnei Hanania, ketre atre ka kuci senitr. Hnei nyidroti hna ami etë* trootro e Ierusalema, uti hë la Ihag Ka Isaisa. 9 Nge ezi nyidro, kola huliwa hnei Refaia nekö i Huro, lo ketre he ne nöj ka musi kowe la sine la traone Ierusalema. 10 Nge ezi angeic, kola huliwa hnei Iedaia nekö i Harumaf, qëmekene la hnalapa i angeic. Nge ezi angeic, kola huliwa hnei Hatusa nekö i Hasabenia.

11 Nge hnei Malekia nekö i Harim, me Hasuba nekö i Pahatha-moaba, hna xupe hmaca la ketre hnepe götran,* memine la ita ne thup ne la Hnë Sa Falawa. 12 Nge ezi nyidro, kola huliwa hnei Saluma nekö i Halohes, ketre he ne nöj ka musi kowe la sine la traone Ierusalema, memine la itre nekö i angeice jajiny.

13 Nge ame Hanuna me angetre Zanoa, angatr a cane hmaca la Qëhnelö Ne La Hnathup, me acatrene la itre hune qëhnelö, me itre loka, me itre agö. Hnei angatre fe hna xupe hmaca la 1000 kubit* ne la ihag, uti hë la Ita Hnatresij. 14 Nge hnei Malekia nekö i Rekaba, lo he ne nöj ka musi kowe la götrane Bethakerem, hna nyidrawane me cane hmaca la Qëhnelö Ne La Ita Hnatresij, me acatrene la itre hune qëhnelö, me itre loka, me itre agö.

15 Nge ame Saluna nekö i Kole-hoz, lo he ne nöj ka musi kowe la götrane Mizepa, angeic a nyidrawane hmaca la Qëhnelö Ne La Tim, me cane hmaca la qëhnelö memine la ihakun ej, me acatrene la itre tane qëhnelö, me itre loka, me itre agö. Angeic a xupe hmaca jë lo ihag ne la Pisin Ne Shela,* ezine lo Hlapa* i Joxu, uti hë la Eskalie ka uti qa ngöne la Traone i Dravita.

16 Nge ezi angeic, kola huliwa hnei Nehemia nekö i Azebuk, lo he ne nöj ka musi kowe la götrane Bethe-zur. Hnei angeic hna nyiqaan qëmekene la itre Hua i Dravita, uti hë ngöne la itim,* memine la Uma Ne La Itre Ka Catr.

17 Ezi angeic, kola huliwa hnene la angetre Levi, nge ce angatr me Rehum nekö i Bani. Nge ezi angeic, kola huliwa hnei Hasabia, lo he ne nöj ka musi kowe la sine la götrane Keila, angeic a huliwa thatraqane la götrane i angeic. 18 Nge ezi angatr, kola huliwa hnene la itre xa atre Levi, me Bavai nekö i Henadada, lo hene nöj ka musi kowe la ketre götrane Keila.

19 Nge ezi angeic, kola huliwa hnei Ezera nekö i Iesua, lo he ne nöj ka musi e Mizepa. Angeic a nyidrawane la ketre hnepe götran qëmekene la hna elë kowe la Hna Ami Jia Ne Isi, hmekune la Nyine Sajuë Ihag.

20 Nge ezi angeic, kola huliwa catr hnei Baruka nekö i Zabai. Angeic a nyidrawane la ketre hnepe götran, qaane lo Nyine Sajuë Ihag, uti hë la hnë lö ne la uma i Eliasiba atre huuje ka sisitria.

21 Nge ezi angeic, kola huliwa hnei Meremoth nekö i Uria nekö i Koz. Angeic a nyidrawane la ketre hnepe götran, qaane lo hnë lö ne la uma i Eliasiba, uti hë la pune la uma.

22 Nge ezi angeic, kola huliwa hnene la itre atre huuj, itre ka lapa ngöne la gaa papa ne Ioridrano.* 23 Ezi angatr, kola huliwa hnei Beniamina me Hasuba qëmekene la uma i nyidro. Nge ezi nyidro, kola huliwa hnei Azaria nekö i Maseia nekö i Anania, ezine la uma i angeic. 24 Ezi angeic, kola huliwa hnei Binui nekö i Henadada. Angeic a nyidrawane la ketre hnepe götran, qaane la uma i Azaria kowe la Nyine Sajuë Ihag, nge uti hë la kona.

25 Nge ezi angeic, kola huliwa hnei Palala nekö i Uzai, qëmekene la Nyine Sajuë Ihag, uti hë la ita ne thup ka itretrengekeu memine la Hnalapa i Joxu, lo ita ne thup ka draië hnine la Götrane Gaa Pë Ihakun Ne La Itre Ka Thup. Nge ezi angeic, kola huliwa hnei Pedaia nekö i Paros.

26 Nge ame la itre hlue ne la Uma Ne Hmi* ka lapa e Ofela, angatr a huliwa uti hë la Qëhnelö Ne La Tim e koië, me uti hë la ita ne thup ka jua.

27 Nge ezi angatr, kola huliwa hnene la itre atrene Tekoa. Angatr a nyidrawane la ketre hnepe götran, qaane lo qëmekene la ita ne thup ka jua, uti hë la ihag ne Ofela.

28 Nge ame la itre atre huuj, angatr a huliwa hune la Qëhnelö Ne La Itre Hos, hmekune la isa hnalapa i angatr.

29 Nge ezi angatr, Zadoka nekö i Imer a huliwa qëmekene la uma i angeic. Nge ezi angeic, kola huliwa hnei Semaia nekö i Sekania, lo atre thupëne la Qëhnelö e Koië.

30 Nge ezi angeic, kola huliwa hnei Hanania nekö i Selemia, me Hanuna, lo hna 6 ne la itre nekö i Zalafa. Nyidroti a nyidrawane la ketre hnepe götran. Nge ezi nyidro, kola huliwa hnei Mesulama nekö i Berekia, qëmekene la hnahag hnei angeic hna lapan.

31 Nge ezi angeic, kola huliwa hnei Malekia, ketre atrene lo lapa ne la itre ka huliwa gool. Angeic a huliwa uti hë la hnalapa ne la itre hlue ne la Uma Ne Hmi,* me itre ka salem, qëmekene lo Qëhnelö Ne Waipengön, nge uti hë la hnahag ngöne la kona ne la ihag.

32 Nge akawane la hnahag ngöne la kona ne la ihag, memine la Qëhnelö Ne La Itre Mamoe, kola huliwa hnene la itre ka huliwa gool, me itre ka salem.