Nehemia

9 Nge hane hi la angetre Levi ka anyipicin: Iesua nekö i Azania, me Binui thene la itre nekö i Henadada, me Kademiel, 10 me itre trejin me angatr ene Sebania, me Hodia, me Kelita, me Pelaia, me Hanan, 11 me Mika, me Rehoba, me Hasabia, 12 me Zakuri, me Serebia, me Sebania, 13 me Hodia, me Bani, me Beninu.

14 Nge hane hi la itre tane la nöj ka anyipicin: Paros, me Pahatha-moaba, me Elama, me Zatu, me Bani, 15 me Buni, me Azegada, me Bebai, 16 me Adonia, me Bigevai, me Adin, 17 me Atera, me Hezekia, me Azura, 18 me Hodia, me Hasum, me Bezai, 19 me Harif, me Anathoth, me Nebai, 20 me Magepias, me Mesulama, me Hezir, 21 me Mesezabel, me Zadoka, me Iadua, 22 me Pelatia, me Hanan, me Anaia, 23 me Hosea, me Hanania, me Hasuba, 24 me Halohes, me Pilea, me Sobek, 25 me Rehum, me Hasabena, me Maseia, 26 me Ahia, me Hanan, me Anan, 27 me Maluka, me Harim, me Baana.

28 (Nge ame la munëne la nöj, itre atre huuj, me angetre Levi, me itre ka thupë qëhnelö, me itre ka nyima, me itre hlue ne la uma ne hmi,* me nöjei atr ka trotrije la itre atrene la itre xa nöj, matre trongëne la Wathebo ne la nyipi Akötresie, me itre föi angatr, me itre nekö i angatr trahmanyi me jajiny, nöjei atre ka atreine* trotrohnine la hna sisiny), 29 hnei angatr hna ce memine la itre trejin me angatr, me itre atre ka tru thei angatr. Nge angatr a sisinyi jë troa trongëne la Wathebo ne la nyipi Akötresie hna hamën jëne Mose, hlue ne la nyipi Akötresie, wanga hnëjine pi angatr. Hnei angatr hna sisinyi troa trongëne hnyawa la nöjei ewekë hna amekötin hnei Iehova joxu së, me itre hnei nyidrëti hna isenyin, me itre wathebo i nyidrë. 30 Öni angatr: “Tha tro kö huni a hamëne la itre nekö huni jajiny, kowe la itre atrene la itre xa nöj ka lapa e ce, nge tha tro kö huni a xome la itre nekö i angatre jajiny, kowe la itre nekö huni trahmany.

31 “Nge e tro la itre atrene la nöje ce a traqa fë nyine salem, me nöjei pengöne wene feja, matre salemën itre ej e Sabath, maine ngöne la ketre drai ka hmitrötr, tha tro kö huni a itöne la ketre ewekë ngöne la itre drai cili. Nge ngöne la kola traqa koi 7 lao macatre, tha tro kö huni a menuëne la ihnadro, nge tha tro kö huni a kapa la hna gufa koi hun.

32 “Ketre, hne huni hna amekötine troa isa kuiëne la 4 g ne sileva* e nöjei macatre, thatraqane la huliwa ne la uma ne la Akötresi hun, 33 me itre falawa hna iatëkeun,* me itre wene feja* hna huujëne lapaan, me itre huuj ne dreuth asë hna huujëne lapaan ngöne la Sabath, me ngöne la itre treu ka hnyipixe, me itre feet hna sa drain, me itre ewekë hna ahmitrötrën, me itre huuj thatraqane la ngazo,* lo hna huujën nyine köletrije la itre ngazo* i Isaraela, me kowe la nöjei huliwa hna kuca hnine la uma ne la Akötresi së.

34 “Nge hne huni fe hna uthi trikitr* troa atre ka hape, eu ngöne la macatre, tro la itre lapa ne la itre atre huuj, me angetre Levi, me itre atrene la nöj, a isa traqa fë sinöe thatraqane la uma ne la Akötresi së, matre troa dreuth hune la ita ne huuj i Iehova Akötresi së, thenge lo hna cinyianyin hnine la Wathebo. 35 E nöjei macatre, tro fe sa hane traqa fë kowe la uma i Iehova, la itre pane wen ne la itre hlapa së, me itre pane wene sinöe, 36 me itre pane nekö së, me itre öni së hna pane hnahon, thenge lo hna cinyianyin hnine la Wathebo, me itre kau së hna pane hnahon, me itre mamoe së, me itre nani së. Tro sa traqa fë kowe la uma ne la Akötresi së, me hamën kowe la itre atre huuj ka huliwa hnine la uma ne la Akötresi së. 37 Nge tro fe sa hane traqa fë kowe la itre atre huuj hnine la itre hnë ami xen* ne la uma ne la Akötresi së, la itre pane farin ka tru, me itre ahnahna, me itre wenene la nöjei pengöne sinöe, me itre waina ka hnyipixe, me oel. Nge tro fe sa traqa fë koi angetre Levi la sin* ne la itre hne së hna menuën, ke angatre hi lo itre ka hleme la sin* ngöne la itre traone së hna eënyin.

38 “Nge tro la ketre atre huuj, ketre matra i Arona, a ce tro me angetre Levi, la angatr a hleme la sin.* Nge qa ne la angetre Levi troa hamëne la sin* ne la sin* kowe la uma ne la Akötresi së, hnine la itre hnë ami xen.* 39 Ke angetre Isaraela me angetre Levi a traqa fë e cili la itre wene feja, memine la waina ka hnyipixe, me oel. Nge e cili fe la hna amë la itre ewekë hna huliwan hnine la uma ne hmi. Nge ame fe la itre atre huuj ka huliwa, me itre ka thupë qëhnelö, me itre ka nyima, angatr a hane lö e cili. Haawe, tha tro kö sa nuetrije la uma ne la Akötresi së.”