Esetera

2 Thupene la itre ewekë cili, patre pi hi la elëhni Asueru joxu, matre nyidrëti a mekune hmaca la hna kuca hnei Vaseti, memine la hna amekötin koi eahlo. 2 Nge hnene la itre ka huliwa koi joxu hna qaja koi nyidrë ka hape: “Loi e tro sa thele koi joxu la itre nekö jajinyi ka mingöming, nge ka tha iatre pala kö me trahmany. 3 Loi e tro la joxu a acil ngöne la nöjei provës ne la baselaia i nyidrë, la itre ka troa thele la itre nekö jajinyi ka mingöming, nge ka tha iatre pala kö me trahmany, me traqa sai angatr e Susani traon hna eköhagen, ngöne la hnalapa ne la itre föe. Nge tro ha ahnithi angatr koi Hege, lo eunuka i joxu ka thupëne la itre föe, matre troa amingömingö* angatr. 4 Nge ame la jajinyi hna troa iën hnei joxu, tro ha acili isola angeic, nyine nyihna i Vaseti.” Nge hnene la joxu hna kapa me trongëne la eamo.

5 Nge ame e Susani lo traon hna eköhagen, hetre ketre atre Iudra ka mel e cili, Modikai la ëjen, nekö i Iaira, nekö i Simei, nekö i Kiso, atre Beniamina. 6 Hna xomi angeic hnei Nebukaneza joxu ne Babulona qa Ierusalema kowe la nöje trenyiwa, nge hna ce xomi angeic me Iekonia* joxu ne Iudra. 7 Angeice lo ka thupë Hadasa,* ene Esetera, lo ketre xa* i angeic, ke pëhë keme me thine i nyën. Nyëne la ketre nekö jajinyi ka mingöminge catre troa goeën. Ame lo kola meci la keme me thine i Esetera, hnei Modikai hna hetru nyën. 8 Ngo ame hë la kola mama la hna amekötin hnei joxu, memine la wathebo i nyidrë, ala nyimu la itre nekö jajinyi hna tro fë e Susani, lo traon hna eköhagen, me ahnithe koi Hege. Nge Esetera hi la ketre hna xom kowe la hnalapa i joxu, me ahnithe koi Hege, lo atre thupëne la itre föe.

9 Nge madrine catre Hege koi Esetera, matre nyidrëti a hnimi angeic. Hnei Hege hna canga akötrehnine troa amingömingö Esetera, me thupëne la aqane xeni Esetera. Ketre, hnei Hege hna nue koi Esetera la 7 lao nekö jajiny, itre hlue ka huliwa ngöne la hnalapa i joxu. Nge hnei Hege hna ami Esetera me itre hlue i angeic, ngöne la götrane gaa lolo ne la hnalapa ne la itre föe. 10 Tha qaja pi kö Esetera la nöje i angeic, me fami i angeic, ke hnei Modikai hna wathebo angeice troa qaja. 11 E nöjei drai, Modikai a tro qëmekene la hnalapa ne la itre föe, matre troa atre la pengö i Esetera, me itre hna kuca koi angeic.

12 Thupene la 12 lao treu ne pane amingömingö* angatr, thenge lo hna amekötin kowe la itre föe, hnene la itre nekö jajiny hna isa lö koi Asueru joxu. Nge hane hi la aqane amingömingö angatr: 6 lao treu ne köle oelë muro,* nge 6 lao treu ne köle oelë göti, me itre xa nyine amingömingöne* la ngönetrei. 13 Thupene la ijine cili, ijije hë kowe la itre nekö jajinyi troa lö koi joxu. Nge ame la ketre jajiny a tro qa ngöne la hnalapa ne la itre föe, me lö kowe la hnalapa i joxu, troa hamëne koi angeice la nöjei ewekë hnei angeice hna sipon. 14 Matre e jidr, angeic a lö, nge e hmakany, angeic a tro kowe la hnaaluene hnalapa ne la itre föe, hna thupën hnei Sasegaz, lo eunuka i joxu me atre thupëne la itre xa föe i joxu. Tha ijiji angeice hmaca kö troa lö koi joxu, e tha ajane kö nyidrë, nge e tha hëne kö nyidrë la ëje i angeic.

15 Ame hna traqa pi la drai i Esetera troa lö koi joxu. Esetera la nekö i Abihaila ketre keme i Modikai, nge hna hetrun hnei Modikai. Pëkö xa ewekë hnei angeice hna sipon, ngo kolo hmekuje hi la hna qaja hnei Hege, lo eunuka i joxu ka thupëne la itre föe. (Ngöne la ijine cili, kola hnimi Esetera hnene la nöjei atre ka goeë angeic.) 16 Ame hna lö sai Esetera koi Asueru joxu, hnine la hnalapa i nyidrë ngöne la hna 10 ne treu, ene la treu Tebeth,* hmekune la kola 7 lao macatre ne mus i nyidrë. 17 Tru catre kö la ihnimi* joxu koi Esetera hune la itre xa föe, nge hna wangatrunyi angeice hnei nyidrë, nge atraqatre fe la ihnimi nyidrë koi angeic hune la itre xa jajiny. Matre hnei Asueru hna atë la korona hune la he i Esetera, me acili isola angeic, nyine nyihna i Vaseti. 18 Ame hnene la joxu hna hnëkë xeni atrunyi kowe la itre he ne nöj i nyidrë, me itre ka huliwa koi nyidrë, nyine atrunyi Esetera. Thupene lai, hnei nyidrëti hna amekötin tro la nöjei provës a nue* la itre hna akalabusin, nge hnei nyidrëti hna hamë ahnahna atrun, thenge la etrune la trengamo i joxu.

19 Nge ame hë la kola alua icasinekeune la itre jajiny, Modikai a lapa* ngöne la qëhnelö ne la hnalapa i joxu. 20 Tha qaja pi kö Esetera la nöje i eahlo, me fami i eahlo, tune lo hna amekötin koi eahlo hnei Modikai. Eahlo pala hi a kuca la hna qaja hnei Modikai, tune lo aqane kuca i eahlo, lo Modikai a hetru eahlo.

21 Ngöne la ijine cili, lo Modikai a lapa ngöne la qëhnelö ne la hnalapa i joxu, hnei Bigethan me Teres, lo lue ka huliwa koi joxu nge ka thupë qëhnelö, hna elëhni me thele troa humuthi* Asueru joxu. 22 Ngo drenge hi Modikai, matre hnei angeic hna canga thuemacanyi isola Esetera, nge hnei Esetera hna nyi qeneqaja i Modikai qëmekene la joxu. 23 Nge thupene la hna pane ithel, mama pi hi laka, trenge nyipici hi. Matre hna athipe* hnyawane la lue trahmanyi cili kowe la ipoto. Nge qëmekene la joxu, hna fejane la nöjei ewekë ka traqa ngöne la tusi ne la mele ne la nöj.