Iobu
8 Ame hnei Biledad atre Sua hna sa ka hape:
2 “Uti hë eu la tro nyipëti a ithanata tune lai?
Kösë enyi ka catr la itre trengewekë i nyipë!
3 Hapeu, tro kö Akötresieti a atriane la hna amekötin?
Nge tro kö la Ka Tru Trenge Men a atriane la meköt?
4 Maine hnene la itre nekö i nyipë hna ngazo koi nyidrë,
Ke, hnei nyidrëti lai hna nu matre troa nyithupene la itre ngazo i angatr;
5 Ngo maine tro nyipëti a thele Akötresie
Me xëwe kowe la Ka Tru Trenge Men,
6 Nge maine eje hi laka, ka pë ethane nyipë me meköt,
Ke tro kö nyidrëti a thupë nyipë*
Me acili nyipëti hmaca ngöne la göhne i nyipë.
7 Nge ngacama, tha ka hlemu kö nyipëti enehila,
Ngo ame hë elany tro hë nyipëti a hlemu.
8 Pane hnyingëne jë kowe la itre xötre hnapan,
Nge wangatrune jë la itre ewekë hna öhn hnene la itre keme i angatr.
9 Hna hnaho së hi e eidr, nge pëkö ca hne së hna atre,
Ke ame la itre drai së e celë fen, ke kösë ketre iahnu.
10 Hapeu, tha tro kö angatr a ini nyipë
Me qaja koi nyipë la itre ewekë hnei angatr hna atre?*
11 Hapeu, tro kö la rozo a cia ngöne gaa pë trëtr?
Nge hapeu, tro kö la rozo a cia draië nge pëkö tim?
12 Nge ngacama eje hë a eng, nge tha hna thupa pala kö,
Tro hë ej a canga fitr hune la itre xa hnitr.
13 Celë hi la pune* kowe la nöjei atr ka thëthëhmi Akötresie,
Ke tro ha patre la mejiunene la atr ka pë metrötr* koi Akötresie,
14 Pëkö ecatrene la mejiune i angeic
Nge tha ka catrecatre kö la lapaune i angeic tune la iaeng.
15 Tro angeic a qalëne la uma i angeic, ngo tha tro kö ej a cil;
Nge tro angeic a thele troa cilaxom ej, ngo tha tro kö ej a cile hut.
16 Nge ceitu i angeic memine la ketre feja hna fii ngöne la kola jö,
Nge kola xötre la itre zin ej ngöne la hlapa.
17 Nge ame la itre iwaan ej, kola lö hnine la itra etë;
Nge ej a thele hnalapa nyipine la itre etë.
18 Ngo ame hë la kola fejetrij* ej qa ngöne la göhnen ej,
Ke, tro hë la götrane cili a qaja ka hape: ‘Tha hane fe kö ni öhnyi ö.’
19 Celë hi aqane tro eje lai a patr;
Nge tro pena itre xan a cia qa kuhu hnadro.
20 Ngo eje hi laka, tha tro jë kö Akötresie a nuetrij la atr ka mele nyipici;
Ketre tune fe, tha tro jë kö nyidrëti a xatuane* la atr ka ngazo,
21 Ke tro pala kö nyidrëti a atiqane la që i nyipë hnei hnyima
Memine la ukeineqë i nyipë hnei madrin.
22 Nge tro ha heetrëne la itre ka methinë nyipë hnei hmahma,
Nge tro ha patre palua la itat ne la itre atre ka ngazo.”