Iobu

 3 Hnauëne laka, kola aceitunë hun me itre öni

Me goeë hun tune la itre hmo?*

 4 Maine nyipici laka, eö a sipu angazone la mele i ö hnene la elëhni ö,

Tro kö a nuetrije la ihnadro pi ö?

Nge tro kö a feje la git qa ngöne la hnen ej?

 5 Ke eje hi, tro ha apine la lai ne la atre ka ngazo,

Nge tha tro hmaca kö a mel la ukahlokin eë i angeic.

 6 Ke tro ha miti la itate i angeic,

Nge tro ha pi la laam ka eje hui angeic.

 7 Tro ha ahopatren la hna feke ca hnei angeic,

Nge tro la itre sipu mekuna i angeic a akeinyi angeic.

 8 Ke tro la lue ca i angeic a tro sai angeic kowe la ifile,

Nge tro hë angeic a jötr ngön ej.

 9 Tro ha jole la tidröca i angeic ngöne la hnö;

Me jeli angeic.

10 Hna juetrën e kuhu hnadro la ketre eno thatraqai angeic,

Nge kola treqe angeic hnene la hnö ngöne la jë i angeic.

11 Kola lapa xötreithi angeic hnene la itre nyine xouen

Nge itre ej a xötrethenge angeic.

12 Kola pë trengecatre i angeic,

Nge angeic a peje trootro* hnei akötr.

13 Kola xuje la ngönetrei angeic;

Nge kola öni asë la ngönetrei angeic hnene la ketre mec ka catrehnin.*

14 Tro ha fejetriji angeic qa ngöne la itate i angeic ka catr

Me tro sai angeic kowe la meci ka ngazo.*

15 Nge tro hë la itre trenyiwa* a lapane la itate i angeic;

Nge tro ha lapane la uma i angeic hnei gaz.

16 Nge tro ha fitre la itre iwaane i angeic e kuhu fen,

Nge tro ha meci la itre picine i angeic e koho hun.

17 Tha tro hmaca kö a meku angeic e celë fen,

Nge pëkö ka troa wangatrehmekune* la ëje i angeic e cahu gojeny.

18 Tro ha uku angeic qa ngöne la lai kowe la melöhlem

Nge tro ha helë angeic qa ngöne la dro ka ham.

19 Tha tro kö a hetre nekö i angeic me matra i angeic qa ngöne la nöje i angeic,

Nge pëkö matra i angeic ka troa mele pe ngöne la hnalapa* i angeic.

20 Ngöne la ijine angeic a kei, tro ha asesëkötrëne la itre atr ne Kuë

Me meci hnei xou hnene la itre atre ne Koië.

21 Hane hi la ka traqa kowe la itre itat ne la atr ka iangazo

Memine la göhnen ne la atr ka thatre Akötresie.”