Itre Edromë
1 Itre edromë i Solomona nekö i Dravita joxu ne Isaraela:
2 Hna cinyanyine la itre edromë celë, matre troa inine la inamacan me hamëne la ini;*
Matre troa atrotrohninën la itre trengewekë ka inamacan;
3 Matre troa inine la aqane thelewekë,*
Me meköt, me atreine tuluewekë,* me thiina ka meköt;
4 Matre troa atreine hmek hnene la itre ka majemin kapa asë la hna qaja;
Matre troa hamë atrehmekun kowe la nekö trahmany, me ini angeic la aqane waiewekë.
5 Kola dreng hnene la atr ka inamacan matre akökötrene la atrehmekune i angeic;
Ame la atr ka lai he, atreine hi angeic ameköti ewekë*
6 Tro hë angeic a trotrohnine la ketre edromë, memine la trengewekë ka tha mama hnyawa kö,*
Me itre trengewekë ne la itre ka inamacan, me itre ijelaxötra* i angatr.
7 Ame la troa xoue* Iehova, ke celë hi qaane la atrehmekun.
Itre hmo hmekuje hi la ka wangesixan la inamacan memine la ini.
8 Neköng, drenge ju la ihaji qaathene la keme i ö,
Nge the trije kö la itre ini* hna hamën hnene la thine i ö.
9 Ceitui itre ej me itrapetre* iengen ka za kowe la he i ö
Me ketre fini cein ka mingöming kowe la nyinawa i ö.
10 Neköng, maine tro la itre ka kuca la ngazo a thele troa huli ö, the xötrethenge angatre kö.
11 E qaja jë angatr ka hape: “Jë fe.
Tro sa tra theth matre ihumuth.*
Tro sa zae me thupëne la itre ka meköt, göi tro hi a elo.
12 Tune la Hua,* tro sa ulum amele angatr,
Me ulum apexejen, tune lo itre ka uti kowe la hnaop.
13 Tro sa eöth asë la itre ewekë i angatr ka tru thupen;
Tro sa nyialiene la itre uma së hnene la itre ewekë hna thapa.
14 Jë fe, trohemi me eahun,
Matre tro sa ce thawa hnyawan la hne së hna atrekënö.”
15 Neköng, the xötrethenge angatre kö.
Tha tro kö la lue waca i ö a trongëne la itre jë i angatr,
16 Ke itre waca i angatr a nyinyap troa kuca la ngazo;
Angatr a nyimenyim troa ihumuth.*
17 Nyine u la troa ami theth* nge öhne hi hnei waco!
18 Celë hi kepin la angatr a zae matre troa humu atr;
Angatr a cile juetrë matre thapa la mele ne la itre atr.
19 Celë hi aqane ujë ne la itre ka huliwa qenatrekënö matre troa trenamo,
Ngacama trenamo ju hë angatr, ngo tro kö angatr a nyithupen hnene la mele i angatr.
20 Kola sue catr la nyipi inamacan ngöne la gojeny.
Tha mano kö ej ithanata ngöne la gaa tru atr.
21 Ej a sue ngöne la itre hna ijejea* gaa tiqa hnei atr.
Ej a qaja ngöne la itre qëhnelö ne la traon ka hape:
22 “Epun itre ka thatre koilo, uti hë eu la tro epuni a lapa thatre?
Epun itre ka ihnyimasai, uti hë eu la tro epuni a ajane troa ihnyimasai?
Nge epun itre hmo, uti hë eu la tro epuni a methinëne la atrehmekun?
23 Drenge ju la ihajing nge saze pi.
Tro ni a nenge la uang hui epun;
Tro ni a ini epun la itre trengewekëng.
24 Hnenge hna sue, ngo xele pala hi epuni ma dreng,
Hnenge hna sathe la imeng, ngo pëkö ka semesinen,
25 Hnei epuni hna xelen la nöjei eamong
Me thipën pala hi la ihajing.
26 Tro pena ha ni a hnyima, e lepi epuni jë hnene la akötr;
Tro ni a hnyima sai epun, e traqa pi la itre ewekë hnei epuni hna xouen,
27 E tro la itre ewekë hnei epun hna xouen a traqa tune la wene,
Nge e tro la itre akötre i epun a traqa tune la udreli,
E tro la akötr me itre jol a trotrotranyi epun.
28 Ngöne la ijine cili, tro angatr a hmanono hna hë ni, ngo tha tro kö ni a sa;
Tro angatr a thel agö ni, ngo tha tro kö angatr a öhnyi ni,
29 Ke hnei angatr hna methinëne la atrehmekun,
Nge hnei angatr hna iën troa tha xoue Iehova.
30 Hnei angatr hna thipetrije la itre eamong;
Hnei angatr hna methinën asë la itre ihajing.
31 Haawe, tro hë angatr a xeni pun la itre huliwa i angatr,
Nge tro angatr a akötr* pine la itre nyinyithiina* i angatr.
32 Ke tro ha mec la itre ka majemin kapa asë la hna qaja, lo itre ka nuetriji Akötresie,
Nge tro ha luz la itre hmo, pine angatr madrine kowe la aqane mele i angatr.
33 Ngo tro la atr ka drei ni a öhne la tingeting
Nge tha tro kö angeic a xouen la akötr.”