Atre Cainöj

11 Kuiëne pi la falawa i ö hune la itre tim, ke thupene la itre drai ka nyimutre, tro hë eö a öhne hmaca. 2 Ce thawa pi memine la 7 maine 8 lao atr, ke thatre kö eö la akötr ka troa traqa e celë fen.

3 Maine tiqa ha la itre iaw hnei tim, ke tro ha trotro la mani e celë fen; nge maine troa kei la ketre sinöe e kolojë maine e kolopi, ke göhnen ej hë lai.

4 Ame la ka lapa goeë eny, ke tha tro kö angeic a jumi feja, nge ame la ka goeëne la itre iaw, ke tha tro kö angeic a menuë hlapa.

5 Thatre kö eö la thangane la ecatrene la mel ngöne la itre jun ne la nekönatr e kuhu hni i thin, ketre tun, thatre kö eö la huliwa hna kuca hnene la nyipi Akötresie, atre kuca asë la nöjei ewekë.

6 Jume pi la itre itine feja i ö e hmakany nge the nue kö la iwanakoime i ö troa mano uti hë e hej; ke thatre kö eö la itin ka troa cia, maine jë, troa cia e celë maine e cili, maine lue ej asë.

7 Ka hamë madrine la lai, nge loi e tro la luemek a öhne la jö. 8 Ke maine tro la atr a mel aqeany, loi e tro angeic a madrin ngöne la itre macatre cili. Ngo tha tro kö angeic a thëthëhmin laka, nyimutre fe la itre drai ne akötr; ka gufa asë hi la itre ewekë ka troa traqa elany.

9 Nekö trahmanyi fe, madrine jë e co pala kö eö, nge epi tro la hni i ö a madrin ngöne la eö a nekö trahmany. Kei thenge jë la itre aja ne la hni i ö, nge tro thenge jë la hna goeën hnene la luemeke i ö; ngo lapa atre ju laka, tro kö la nyipi Akötresie a ameköti* ö pine la itre ewekë cili. 10 Celë hi matre, ananyine pi qa ngöne la hni i ö la itre ewekë ka axulune la itre jol, nge tha tro kö la ngönetrei* i ö a easenyine la itre ewekë ka ngazo, ke nyimenyime hi la itre drai ne egöcatr, me itre drai ne nekö trahmany.