Salamo
Masekil* i Asafa.
74 Akötresieti fe, hnauëne laka, nyipëti a nuetrije palua hun?
Hnauëne laka, kola palulu* la elëhni i nyipë kowe la itro mamoe ne la hlapa i nyipë?
2 The thëthëhmine kö lo nöj* hnei nyipëti hna kapa ekö,
Lo tribu hnei nyipëti hna itön nyine edrö i nyipë.
Mekune kö lo wetre Ziona hnei nyipëti hna lapan.
3 Iujine jë la lue ca i nyipë kowe la hna apatrene paluan.
Ase hë la ithupëjia lep apatren asë la götrane gaa hmitrötr.
4 Hnene la itre ka icilekeu me nyipë hna sue ngöne la hna icasikeu.
Hnei angatr hna sipu acile la itre hatrene i angatr.
5 Ceitu i angatr me itre atr ka hna ze ngöne la hnaxulu.
6 Hnei angatr hna xome la itre ze me sine fao troa këthe trije la itre hna sija.
7 Hnei angatr hna dreuthetrije la uma ne hmi i nyipë.
Hnei angatr hna angazone me trij e kuhu hnadro la uma maano ne la ëje i nyipë.
8 Öni angatr me itre matra i angatr e kuhu hni ka hape:
“Loi e troa dreuth asë la itre hna icasikeu* i Akötresie ngöne la nöj.”
9 Tha mama kö koi hun la itre hatren;
Pëhë perofeta,
Nge pëkö ala cas the hun ka atre laka, troa nyipune eu.
10 Akötresieti fe, uti hë eu la troa qaqa nyipë hnene la ka icilekeu?
Hapeu, tro pala hi la ithupëjia a pë metrötr kowe la ëje i nyipë?
11 Hnauëne laka, nyipëti a xomehnöthe la ime i nyipë, lo ime maca i nyipë?
Hule pi la ime i nyipë qa ngöne la iheetre* i nyipë, nge apatrenyi angatre jë.
12 Ngo ame pe, Akötresieti la Joxung qaane lo itre drai ekö,
Lo atre kuca la itre huliwa ne iamele e celë fen.
13 Hnei nyipëti hna xejë la hnagejë hnene la trengecatre i nyipë;
Hnei nyipëti hna waja fica la itre he ne la itre öni atraqatr ne hnagejë.
14 Hnei nyipëti hna anyilanyilane la itre he ne la Leviathana;*
Hnei nyipëti hna hamën itre ej nyine mitr thatraqane la nöj, lo itre ka mel ngöne la hnapapa.
15 Hnei nyipëti hna thewe jëne la itre qeqe ne tim me itre tim ka neni;
Hnei nyipëti hna aqaqacilëne la itre hneopegejë ka neni lapaa.
16 Ewekë i nyipëti la lai memine la jidr.
Hnei nyipëti hna xupe la lai memine la jö.
17 Hnei nyipëti hna acil la itre ifego ngöne la fene hnengödrai;
Hnei nyipëti hna kuca la ijine hedredrei me ijine hnötr.
18 Iehova fe, the thëthëhmine kö la aqane qaqa nyipë hnene la ithupëjia,
Nge the thëthëhmine kö laka, hetre nöje ka hmo nge ka tha metrötrëne la ëje i nyipë.
19 The nuetrije kö la mele ne la piny i nyipë kowe la itre öni wael.
The thëthëhmine palua kö la mele ne la nöje i nyipë, lo hna akötrën.
20 Mekune kö nyipëti lo isisinyikeu,
Ke tiqa ha la itre gaa mit e celë fen hnene la itre atr ka isi.
21 Loi e tha tro kö a hace la hni ne la atr hna qanangazon;
Loi e tro la ka ipië me ka pë ewekë a atrune la ëje i nyipë.
22 Akötresieti fe, cile jë, nge cilëgöline jë la emeköti nyipë.
The thëthëhmine kö laka, o drai, kola qaqa nyipë hnene la itre hmo.
23 The thëthëhmine kö la hna qaja hnene la itre ka icilekeu me nyipë.
Kolo pala hi a tru la mejene ne la itre ka cile koi nyipë.