Salamo
Thatraqane la atre jumi traem; nyine nyima ngöne la nin: “The apatrene kö.” Nyima i Asafa.
75 Eahuni a olene koi nyipë Akötresieti fe, eahuni a olene koi nyipë;
Ëje i nyipë a lapa nyipi hun,
Nge itre atr a qaja trongëne la itre huliwa i nyipë nyine hain.
2 Öni nyipë: “Eni a sa ijin troa amekötin,
Nge eni a amekötin cememine la meköt.
3 Ame lo kola enienije* la ihnadro memine la itre ka lapan ej,
Eni la ka acatren la itre ikapan ej.” (Sela)
4 Öning kowe la itre ka selë angatr ka hape, “The selë epuni kö,”
Me kowe la itre atr ka ngazo ka hape, “The amamai trengecatre* kö.
5 The pi amamai trengecatre* kö
Nge the ewekë kö cememine la pi tru.
6 Ke ame la troa draië
Tha ka xulu kö qaa koië, me kuë, me kolojë.
7 Ke Akötresieti hi la Atre Amekötin.
Nyidrëti a thaipiëne la ketre, me adraiëne la ketre.
8 Hetre ketre ver ngöne la ime i Iehova;
Tru la haiwen ngöne la waina, ke hna ithuenyikön hnyawa.
Eje hi laka, tro hë Akötresie a nenge trije la waina,
Nge tro la nöjei atr ka ngazo ne la fen a ij, uti fe hë la troa fuluthe la itre wanan ej.”
9 Ngo ame ni, tro ni a qaja trongëne la ewekë cili epine palua;
Pi tro ni a nyima* nyine atrune la Akötresi Iakobo.
10 Ke öni nyidrë: “Tro ni a apatrene trije la trengecatrene* la itre atr ka ngazo,
Ngo tro ha adraiëne la trengecatrene la itre atr ka meköt.”