Itre Edromë
24 The piine kö la itre atr ka ngazo,
Nge the thele kö troa ce tro me angatr,
2 Ke itre hni i angatr a lapa mekune la iakötrë,
Nge ukeineqë i angatr a qaja la itre ngazo hnei angatr hna pi kuca.
3 Jëne la inamacan, kola xupe la uma,*
Nge jëne la atreine waiewekë, kola acatren ej.
4 Jëne la atrehmekun, kola nyialien ej
Hnene la itre ewekë ka tru thupen nge ka lolo.
5 Ka catre la atre inamacan,
Jëne la atrehmekun, ketre atr a akökötrene la mus i angeic.
6 Nyipiewekë la itre eamo ka loi* matre tro fë isi,
Nge maine ala nyimu la itre ka hamë eamo, ke tro kö sa huun.*
7 Nanyi catre la nyipi inamacan kowe la hmo;
Ame ngöne la qëhnelö ne la traon, pëkö nyine tro angeic a qaja.
8 Ame la atre mekun troa kuca la ngazo, ke tro ha ati ëje i angeic
Joxu ne la itre mekun ka ngazo.
9 Ame la itre nyinyithiina ne la hmo, ke ka ihule kowe la ngazo,
Nge kola methinëne la ka ihnyima sai.
10 Maine eö a kucakuca ngöne la ijine jol,
Tha tro kö a tru la trengecatre i ö.
11 Amelene jë la itre hna tro fë kowe la mec,
Nge nuamelene pi la itre ka tro pej kowe la ihumuth.
12 Maine öni ö, “Pëkö hne huni hna atre,”
Ngo hapeu, tha öhne kö la itre mekuna i ö hnene la ka waipengöne la itre hni?*
Eje hi, tro itre ej a mama kowe la Atre goeë eö
Nge tro nyidrëti a të thenge la isa huliwa së.
13 Neköng, iji jë la miel, ke ka lolo;
Ame la miel ka neni, ke ka menyik e troa tupath.
14 Ketre tun, atre jë laka, ka lolo koi ö la inamacan.
Maine tro eö a öhn ej, ke tro ha lolo la mele i ö elany
Nge tha tro kö a apatrene* la mejiune i ö.
15 The cile zae kö ezine la hnalapa ne la atr ka meköt matre akötrë angeic;
The apatrene kö la hnë mano i angeic.
16 Ke ijije hi tro la atr ka meköt a a 7 lao kei, ngo tro kö angeic a mejë hmaca,
Ngo ame la atr ka ngazo, tro ha akeinyi angeic hnene la akötr.
17 Ame la kola kei la ithupëjia me eö, the madrine kö,
Nge ame la kola hnai angeic, tha tro kö la hni i ö a madrin,
18 Wanga öhne jë Iehova, nge tro nyidrëti a elëhni,
Nge tha tro hmaca kö nyidrëti a elëhni koi angeic.*
19 The wesitre* kö pine la itre atr ka ngazo;
Nge the pii angatre kö,
20 Ke ame la itre atr ka ngazo, pëkö mejiune i angatr;
Tro ha apine la laam ne la itre atr ka ngazo.
21 Neköng, xoue Iehova jë memine la joxu.
The ce tro kö memine la itre ka icilekeu,*
22 Ke tro ha aca tro apatrenyi angatr.
Drei la ka atre la pun hnei nyidroti* hna hnëkën koi angatr?
23 Qaathene la itre ka inamacan la itre trengewekë celë:
Tha ka loi kö troa ië hna hnim la kola iameköti.
24 Ame la atre qaja kowe la atr ka ngazo ka hape, “Ka meköti ö,”
Ke tro ha ahnëjinën hnene la itre atr, me hajin hnene la itre nöj.
25 Ngo tro ha tro loi la itre ka wesitrë angeic;
Tro ha amanathithi angatr hnene la itre ewekë ka loi.
26 Kola ban* la ukeineqë ne la atre qaja la nyipici.*
27 Eköthe jë la itre huliwa i ö e kuhu trön, nge hnëkëne jë la itre zi i ö;
E ase hë, xupe jë la uma i ö.*
28 The upezöne menune kö la atre lapa easenyi ö.
The huliwane kö la ukeineqë i ö matre iaö ketre.
29 The qaja kö ka hape: “Tro ni a kuca tune la hnei angeic hna kuca koi ni;
Tro ni a të koi angeic.”
30 Hnenge hna tro ezine la hlapa ne la geny,
Ezine la hlapa vin ne la atr ka pë atrehmekun.*
31 Hnenge hna öhne laka, hnitr asë hë;
Ase hë lapan asë hnei haö ka ithiny,
Nge kei hë la itra etë.
32 Hnenge hna goeëne lai, me lapa mekun;
Hnenge hna öhne lai, nge hane hi la ini* hnenge hna xom qa ngön:
33 Pane meköle ju kö, nge pi nyimeke ju kö,
Sile jë kö la lue ime i ö matre mano,
34 Nge tro hë eö a aca tro pë ewekë tune la aqane traqa ne la atrekënö,
Me tune la kola thapa la itre ewekë i ö hnene la atr ka hetre jia ne isi.