Isaia
52 Ziona fe, hlë jë! Hlë jë! Nge heetrëne jë la mene ka catr!
Ierusalema fe, lo traon ka hmitrötr, heetrëne jë la itre iheetre i nyipo ka mingöming!
Ke tha tro hmaca kö a lö thei nyipo la ka pui ngazo, memine la hna tha xötrehatren.*
2 Cile jë nyipo, nge jumejume pi la xaxau qaathei nyipo, nge lapa ju, Ierusalema fe.
Senge pi qa ngöne la nyinawa i nyipo la otretr, nyipo nekö jajiny ne Ziona, lo hna kötre fë kowe la ketre nöj.
3 Ke hane hi la hna qaja hnei Iehova:
“Hna salemë epun ngo pëkö thupen,
Nge tro ha itö epuni hmaca ngo tha hnei mani kö.”
4 Ke hane hi la hna qaja hnei Iehova Joxu Ka Sisitria:
“Ame lo xötrei, hnene la nöjeng hna uti a tro Aigupito, matre mele trenyiwa e cili;
Thupene lai, hnei Asuria hna axösisi angeic nge pëkö kepin.”
5 “Matre nemene la nyine tro ni a kuca?” öni Iehova.
“Ke hna xome gufane la nöjeng.
Kola sue madrine la itre ka musinë angeic,” öni Iehova,
“Nge ngöne la drai ka pexej, kolo pala hi a tha metrötrëne la ëjeng.
6 Qa ngöne lai, tro hë la nöjeng a atre la ëjeng;
Qa ngöne lai, tro hë angatr a atre laka, eni la ka ithanata.
Nyipici, eni hi!”
7 Mingöming la lue ca ne la atre tro fë la maca ka loi hune la itre wetr,
Memine la atre qaja la tingeting,
Memine la atre traqa fë la itre maca ka lolo göne la ketre ewekë ka sisitria,
Memine la atre cainöjëne la iamele,*
Memine la atre qaja koi Ziona ka hape: “Joxu hë la Akötresi nyipo!”
8 Drenge ju! Itre atre thupe i nyipoti a ewekë catr.
Angatr a ce sue madrin,
Ke ame hë la ijine tro Iehova a bëeke sai Ziona, ke tro hë angatr a öhne* hnyawane lai.
9 Nyima jë epun, itre itra etë ne Ierusalema, nge ce sue madrine jë,
Ke ase hë Iehova aupune la nöje i nyidrë; hnei nyidrëti hmaca hna itö Ierusalema.
10 Ase hë Iehova amamane la ime ka hmitrötre i nyidrë, qëmekene la itre nöj asë;
Tro la itre cane la fene hnengödrai asë a öhne la itre huliwa ne iamele* ne la Akötresi së.
11 Iananyi pi, iananyi pi epun, nge tro pi qa lai, the ketre kö la ketre ewekë ka sis!
Tro pi qa lai, nge isine jë tro pala hi a hmitrötr,
Epun itre ka kapa trongën la itre jia ne huliwa i Iehova.
12 Tha tro kö epuni a mejë hmohmo,
Nge tha tro kö epuni a kötr,
Ke tro Iehova a tro qëmekei epun,
Nge tro la Akötresi Isaraela a tro hutrö i epun.
13 Goeën! Tro la hlueng a huliwa inamacan.
Tro ha atrunyi angeic,
Tro ha adraië angeic me qaja aloinyi angeic.
14 Ala nyimu la itre ka goeë angeic me sesëkötr
Ke tru catre kö la hna angazone la iqëmeke i angeic hune la qëmekene la nöjei trahmany
Me elolo i angeic hune la elolone la itre atr,
15 Ketre tune fe, tro angeic a asesëkötrëne la itre nöj ka ala nyim.
Tro la itre joxu a thinge la që* i angatr qëmekei angeic,
Ke tro hë angatr a atre la itre ewekë hna tha thuemacanyi angatr
Nge tro hë angatr a wangatrune la itre ewekë hna tha dreng.