Isaia
3 Ke tro la nyipi Joxu, Iehova ne la itre trongene isi e hnengödrai,
A apatren qa Ierusalema me Iudra la nöjei pengöne kemej me ixatua,
Ene la itre falawa me tim,
2 La atr ka catr memine la atre ne isi,
La atre amekötin memine la perofeta, la atre kuci haze memine la qatr,
3 La tan ne la ala 50, memine la trene mus, memine la atresi,
La tan ne la itre ka kuci haze, memine la atre axö un.
4 Tro ni a hamën koi angatr la itre nekönatr trahmanyi matre joxu,
Nge tro la ka zikoziko* a musinë angatr.
5 Tro la itre atr a itö iaxösisi,
Ene la ketre atr me ketre atr.
Tro la nekö trahmany a qanangazone la qatr,
Nge tro la hna methinën a cil kowe la hna metrötrën.
6 Ame ngöne la uma ne la keme i angatr, tro angatr a isa ea la trejin me angatr me hape:
“Hetre ikootre* i eö, haawe musi jë koi hun.
Hnëqa i ö pë hë la itra etë celë.”
7 Ngo ame ngöne la drai cili, tro angeic a catre fë ka hape:
“Tha eni kö la ka troa nyinyine la itre eatre i epun;
Ke pëkö xen me iheetr ngöne la hnalapang.
Matre the acili ni kö troa joxu ne la nöj.”
8 Ke kei hë Ierusalema,
Nge mala ha Iudra,
Ke hnei angatr hna icilekeu me Iehova ngöne la aqane ithanata me ujë i angatr;
Angatr a nyitru qëmeken la lolo i nyidrë.
9 Qëmeke i angatr a qajaqaja la pengö i angatr,
Nge tui Sodroma, angatr a selën la ngazo i angatr;
Tha thele kö angatre troa juetrën.
Hnëjine hë angatr, ke angatre kö la qaane la sipu akötre i angatr!
10 Qaja jë kowe la itre atr ka meköt ka hape, tro hë angatr a mele ka loi;
Tro hë angatr a kepe thupene* la itre huliwa i angatr.
11 Ekölöhini la atr ka ngazo!
Tro ha lepi angeic hnei akötr,
Ke tro ha të koi angeic la hnei angeic hna kuca!
12 Ngo kola axösisine la nöjeng hnene la itre tane huliwa,
Nge itre föe a musinë angeic.
Nöjenge fe, kola amenu eö hnene la itre tane i ö,
Angatr a juetrën la itre gojenyi nyine tro eö a trongën.
13 Cile hë Iehova matre troa upezön;
Nyidrëti a mejë matre amekötin la itre nöj.
14 Tro Iehova a amekötine la itre qatr me itre joxu ne la nöje i nyidrë.
“Hnei epun hna dreuthetrij la hnënge vin,
Nge ej e hnine la itre uma i epun la itre ewekë hna atrekënö thene la itre ka pë ewekë.”
15 Öni Iehova hmaca, lo Joxu Ka Sisitria ne la itre trongene isi e hnengödrai ka hape:
“Hnauëne laka, epuni a wajatrane la nöjeng me wajahuje* la ka pë ewekë?”
16 Öni Iehova: “Ka pi tru la itre nekö jajinyi ne Ziona,
Angatr a tro me amejëne* la itre he i angatr,
Nge wesiwesi la aqane goe me tro i angatr,
Nge angatr a akeciqane la itre fini cein ne waca i angatr,
17 Tro Iehova a aciane la itre ikuthony* ngöne la he ne la itre nekö jajinyi ne Ziona,
Nge tro Iehova a kuca matre troa pa la itre he i angatr.
18 Ame ngöne la drai cili, tro Iehova a thapa la emingömingö i angatr:
Ene la itre otru i angatr, me itre otrene he, me itre nyine amingömingön ka ceitu me treu,
19 Me itre ane hnangenyë, me itre otrene wanakoim, me itre isol,
20 Me itre itrapetr, me itre fini cein ne waca, me itre beletr,*
Me itre trengene senitr, me itre hnepe ewekë ka kecikeciqa,*
21 Me itre otrene wanakoim, me itre otru ne hnafij,
22 Me itre iheetr nyine feet, me itre iheetr ka isaisa, me itre iheetr ka hlupahlupa, me itre sine watreng,
23 Me itre ithulu ne ea, me itre iheetre lino,*
Me itre otrene he, me itre isole i angatr.
24 Tro ha nyihnan la oel ne göti hnene la ketre ewekë ka pi;
Tro ha nyihnan la beletr hnei eno;
Tro ha nyihnan la pene he hna thaipin hnene la he ka pa;
Tro ha nyihnan la iheetr ka mingöminge catr hnei bëek;
Nge ame la ka lolo iqëmek, troa nyihnan hnene la hna dreuth hnei fao.
25 Tro ha humuth hnei taua la itre atre i ö,
Nge tro hë la itre atre i ö ka catr a kei ngöne la isi.
26 Tro la itre qahnahag ne Ziona a tune la föe ka awe me hnëmec,
Nge ka lapa e kuhu hnadro me hleuhleu hnei akötr.”