Isaia
27 Ame ngöne la drai cili, tro Iehova a huliwane la taua i nyidrë ka idrei nge hna xouen,
Matre lepe la Leviathana,* lo un ka kötre nyimenyim,
La Leviathana, lo un ka qaliqali trootro,
Nge tro nyidrëti a humuthe la un atraqatre cili ngöne la hnagejë.
2 Ngöne la drai cili, nyima jë koi angeic* me hape:
“Hnënge vin ka hamë waina* ka hetre haiwen!
3 Eni Iehova la atre thupën ej.
Eni a fii lapaan ej.
Eni a thupën ej e lai me jidr,
Matre tha tro kö la ketre atr a angazon ej.
4 Pëkö elëhning.
Drei la ka troa cile koi ni ngöne la isi memine la itre sinöe ka ithiny, me itre haö?
Tro kö ni a waja fici angatr me dreuthetriji angatr asë.
5 Ngo loi e tro angeic a qale kowe la hnapong.
Me iloi me eni;
Loi e tro angeic a iloi me eni.”
6 Ame ngöne la itre drai elany, tro ha cia la iwaane i Iakobo,
Tro hë Isaraela a eng me xöl,
Me atiqane la nöj hnene la itre wene sinöe i angatr.
7 Hapeu, tro jë kö a lepi angeic tune la aqane troa lepe la itre ithupëjia?
Maine pena, tro jë kö a humuthi angeic tune la aqane humuthe angeic la itre xan?
8 Tro nyipëti a sue draië me cile koi angeic, me helë angeic.
Tro nyipëti a ufetriji angeic hnene la trengehni i nyipë, ngöne la drai ne hnahna la enyi qa koië.
9 Qa ngöne lai, tro ha he* la ngazo i Iakobo,
Nge hane hi la ka troa traqa, ngöne la kola xometrije la ngazo i angeic:
Tro nyidrëti a amudron asë la itre etë ne la ita ne huuj
Tune la xaca,
Nge tha tro hmaca kö a cil la itre ipoto ka hmitrötr, memine la itre ita ne dreu ka pui loi.
10 Ke tro ha hnapapa la traon hna xupi hagen;
Tro ha trotrij me nue la itre hna axö öni, matre tune la hnapapa.
Ame e cili, tro la neköi kau a xeni trootro me meköl
Nge tro pë hë nyën a xeni la itre wapicin ej.
11 E meci hë la itre wanapalaman ej,
Tro hë la itre föe a hutra,
Matre athi eë.
Ke pëkö ca hna trotrohnin hnene la nöje ce.
Qa ngöne lai, tha tro kö la Atre Xup a amamane la utipine i nyidrë koi angatr,
Nge tha tro kö la Atre eköthi angatr a amamane la ihnim i nyidrë koi angatr.
12 Nöje Isaraela fe, ame ngöne la drai cili, tro Iehova a tha* la itre wene sinöe qaane la Hneopegejë* uti hë la hneopegejë e Aigupito. Nge tro ha hleme xawa epun, ketre thupei ketre! 13 Ngöne la drai cili, tro ha ufe la trutru ka tru. Nge ame la itre ka treqene troa mec e Asuria, memine la itre hna isaijen e Aigupito, ke tro hë angatr a ce traqa troa thil koi Iehova, hune la wetr ka hmitrötr e Ierusalema.