Ieremia
3 Itre xan a hnying ka hape: “Maine tro la ketre trahmany a upetrije la föi angeic, nge tro eahlo a föene pena la ketre trahmany, hapeu, ijiji angeice hmaca kö troa xomi eahlo?”
Tha hna apuingazon asë kö la nöje ce?
“Ngo hnei ö hna nyi föe ne gojeny me nyimu trahmany,
Nge enehila, eö hmaca a pi bëeke koi ni!” öni Iehova.
2 “Gala jë nge goeëne jë la itre sasala ka papa.
Ekaa ju pë la hnei ö hna tha hane ce meköl me trahmany?*
Hnei ö hna lapa treqene la itre hanyi ö ezine gojeny,
Tune la atr ka feke trootro* ngöne la hnapapa.
Tha mano kö eö apuingazone la nöj
Ke hnei ö hna nyi föe ne gojenyi me iakötrë.
3 Celë hi matre hna cipane la mani koi ö,
Memine la itre mani tixenuë.
Ka pi tru la aqane goe* i ö tune la föe ka faipoipo ka nyi föe ne gojeny;
Nge goi xele fe eö ma drenge la hmahma.
4 Ngo enehila, eö a sue koi ni me hape:
‘Kaka, nyipëti la sinatrongeng qaane lo eni a jajiny!
5 Tro kö nyipëti a lapa fë trengehni uti hë epin?
Tro kö nyipëti a wesitre palua koi ni?’
Eö hi lai a qaja,
Ngo eö pala hi a kuca catrën la itre ewekë ka ngazo.”
6 Ngöne la ijine mus i Iosea, öni Iehova koi ni: “‘Öhne kö eö la hna kuca hnei Isaraela, föe ka nyixetë? Hnei angeic hna tro hune la nöjei wetr ka draië me fene la nöjei sinöe ka cia hlöeë, matre nyi föe ne gojeny. 7 Ngacama hnei angeice ju hë hna kuca la nöjei ewekë cili, ngo hnenge pala hi hna iele angeic troa bëeke koi ni. Ame pe, xele kö angeic ma bëek. Nge öhne hi Iudra la aqane ujë ne la trejin me angeic ka mele thoi. 8 Matre ame ju hi la eni a öhne lai, hnenge hna upetriji Isaraela, lo ka mele thoi, memine la ketre tusi ne triji föe, pine angeic nyixetë. Ngo tha hna axouenyi Iudra kö trejin me angeic ka mele thoi; hnei Iudra fe hna hane nyi föe ne gojeny. 9 Ame koi angeic, pëkö engazon la hnei angeic hna nyi föe ne gojeny. Hnei angeic hna apuingazone la nöj, me nyixetë ngöne la angeic a atrune la itre etë me itre sinöe. 10 Ngacama hna traqa la nöjei ewekë cili, ngo tha hnei Iudra kö, trejin me angeic ka mele thoi, hna hane bëeke koi ni qa kuhu hni, ngo göi qaja hi,’ öni Iehova.”
11 Thupene lai, öni Iehova koi ni: “Loi ju kö Isaraela ka nyixetë hui Iudra ka mele thoi. 12 Tro jë a qaja la itre trengewekë celë e kolopi:
“‘“Bëeke jë Isaraela, föe ka tha mele nyipici,” öni Iehova.’ ‘“Tha tro kö ni a goeën amenyi ö hnei elëhni,* ke ka mele nyipici ni,” öni Iehova.’ ‘“Tha tro kö ni a lapa fë trengehni uti hë epine palua. 13 Ngo casi hi la hnenge hna sipo eö: wangatrehmekune ju la ngazo i ö, ke hnei ö hna icilekeu me Iehova Akötresi ö. Hnei eö pala hi hna ce meköl* memine la itre trenyiwa* fene la itre sinöe ka cia hlöeë, nge tha hnei ö kö hna drengethenge ni,” öni Iehova.’”
14 “Bëeke jë itre nekön ka tha mele nyipici,” öni Iehova. “Ke eni hë la nyipi maseta* i epun. Nge tro ni a xomi epun, casi qa ngöne la ketre traon nge luetre qa ngöne la ketre fami, nge tro ni a tro sai epun a tro Ziona. 15 Tro ni a hamë epuni la itre ka thupë mamoe ka kuca la ajang,* nge tro angatr a thua i epun cememine la atrehmekun me inamacan. 16 Ngöne la ijine cili, tro hë epuni a ala nyimu, me wa wen ngöne la nöj,” öni Iehova. “Pë hmaca kö ka troa qaja ka hape: ‘Pua Ne Isisinyikeu i Iehova!’ Tha tro hmaca kö sa mekun me lapa mekun ej, tha tro kö sa treije pin ej me xupe hmaca la ketre. 17 Ngöne la ijine cili, tro ha hë Ierusalema, therone i Iehova. Nge tro la nöjei nöj a icasikeu troa atrune la ëje i Iehova e Ierusalema. Nge tha tro hmaca kö angatr a kuca catrën la itre aja i angatr ka ngazo.”*
18 “Ngöne la ijine cili, tro hë la nöje Iudra me Isaraela a cas me ce tro. Nge tro angatr a ce traqa qa ngöne la nöje kolopi, me lö kowe la nöje hnenge hna hamën nyine edrö kowe la itre qaaqaa i epun. 19 Öninge lo: ‘Tru catre la madrineng lo eni a ië eö troa neköng,* me hamë eö la nöje hna ajan, lo edrö ka sisitria hune la itre xaa nöj!’* Nge öninge pena kö, tro fe eö a hë ni ‘Kaka!’ me xötrethenge ni lapa. 20 ‘Eje hi nöje Isaraela, tune la föe ka nyixetëtrije la föi* angeic, hnei ö hna nyixetëtriji ni,’ öni Iehova.”
21 Hetre mejen qa koho hune la itre sasala ka papa,
Kola treije me xëwe la nöje Isaraela,
Ke hnei angatre hna kuca la itre huliwa ka sis;
Hnei angatr hna thëthëhmi Iehova Akötresi angatr.
22 “Bëeke jë, itre nekön ka tha mele nyipici.
Tro ni a aloine la itre mekuna i epun, ka tha mele nyipici.”
“Eahuni hë la! Hne huni hna traqa koi nyipë,
Ke Iehova fe, nyipëti la Akötresi hun.
23 Eje hi, tha ka nyipici kö la itre sasala memine la mejen hune la itre wetr.
Ke eje hi, Iehova Akötresi hun la ka troa amele Isaraela.
24 Ngo qaane lo eahuni a co, hnene la ewekë nyine hmahman* hna apatrene la thangane la hna catre huliwa hnene la itre qaaqaa hun,
Ene la hnënge mamoe me itre kau i angatr,
Me itre nekö i angatr trahmanyi me jajiny.
25 Tro pë hë sa meköl hune la hmahma,
Me sitrë së hnene la hmahma,
Ke hne së hna ngazo koi Iehova Akötresi së,
Easë me itre keme së, qaane lo easa co uti hë enehila,
Nge tha hne së kö hna drengethenge Iehova Akötresi së.”