Ieremia
5 Trongëne jë la itre gojenyi ne Ierusalema.
Wange jë xötreithi epun nge goeëne hnyawa ju.
Goeëne hnyawa ju ngöne la itre gaa tru atr ne la traon
Wange ju ka hape, hetre atre kö ka meköt,
Nge ka isin troa mele nyipici,
Maine hetrenyi hi, tro hë ni a nue la ngazo ne la traon.
2 Ngacama qaja ju hë angatr ka hape: “Qëmekei Iehova Akötresie ka mel!”
Ngo angatre lai a sisinyi thoi.
3 Iehova fe, tha luemeke i nyipëti kö lo a thele la mele nyipici?
Hnei nyipëti hna lepi angatr, ngo pëkö thangane koi angatr.*
Hnei nyipëti hna apatrenyi angatr, ngo xele kö angatr ma kapa la ihaji.
Hnei angatr hna kuca matre catrecatre kö la iqëmeke i angatr hune la git,
Nge xele kö angatr ma saze.
4 Ngo öninge lo: “Maine jë, tha qai angatre kö hna hane ini.
Angatr a qenahmo, ke thatre kö angatre la aja* i Iehova,
Lo itre hna amekötin hnene la Akötresi angatr.
5 Tro hë ni a ithanata kowe la itre ka hlemu,
Ke maine jë, hnei angatr hna nyipiewekën la aja* i Iehova,
Lo itre hna amekötin hnene la Akötresi angatr.
Ngazo pe, hnei angatr asë hna unatrij la ehnef*
Me axeciëne la itre otren.”
6 Celë hi matre, kola heji angatre hnene la liona ne hnitr,
Tha mano kö humuthi angatr hnene la luko ne hnapapa,
Nge kola thup ezin la itre traone i angatr hnene la leopar.
Ame la itre ka tro qa cili, ke tro ha hej angazo angatr.
Ke nyimutre la itre tria i angatr;
Anyimua mele thoi hë angatr.
7 Matre tro hë ni a nue tune kaa la ngazo i ö?
Hnene la itre nekö i ö hna nuetriji ni,
Nge angatr a sisinyi ngöne la ëjene la ketre atr, ngo tha Akötresieti pe.
Hnenge hna kapa la itre aja i angatr,
Ngo angatre pala hi a nyixetë,
Me traqa itronyi ngöne la uma ne la föe ne gojeny.
8 Ceitui angatr me itre hos ka pi itrokeu, nge hna hule hnei aja,
Angatr a isa ho kowe la ifekë föen.
9 “Hapeu, tha tro kö ni a ihnyingë me angatr pine lai?” öni Iehova.
“Tha hnëqange kö troa të kowe la nöje ka ujë tun?”
10 “Elë jë kowe la itre vine i angatr nge angazone pi,
Ngo the apatren asë kö itre ej.
Thupa pi la itre wapicin,
Ke tha itre ewekë i Iehova kö lai.
11 Eje hi, hnene la nöje Isaraela me nöje Iudra
Hna iaö ni,” öni Iehova.
12 “Hnei angatr hna trotriji Iehova, me qaja lapan ka hape:
‘Pëkö hnei nyidrëti hna troa kuca.*
Tha tro kö a traqa la akötr koi së;
Tha tro kö sa öhne la isi* me jiin.’
Epi troa lep apatrenyi angatr!”
14 Hane hi la hna qaja hnei Iehova Akötresie ne la itre trongene isi e hnengödrai:
“Pine angatr qaja la itre ewekë cili,
Tro hë la trengewekëng a tune la eë ngöne la që i ö,
Ceitu me sinöe la nöje ce,
Nge tro la eë cili a dreuthetriji angatr.”
15 “Nöje Isaraela fe! Tro ni a hëne la ketre nöj qa gaa nanyi matre lepi ö,” öni Iehova.
“Ketre nöj ka hekö catre hë.
Ketre nöj hnapan,
Ketre nöj hnei ö hna thatre la qene hlapan,
Nge hnei ö hna tha trotrohnin la itre hnaewekë.
16 Ceitu la trengene pehna i angeic me hua hna fe angangan;
Itre ka isi asë hi angatr.
17 Tro angatr a xeni asë la hnei ö hna menu me falawa i ö.
Tro angatr a öni asë la itre nekö i ö, trahmanyi me jajiny.
Tro angatr a öni asë la itre kau me itre mamoe i ö.
Tro angatr a iji asë la itre vin me xeni la itre wacua.
Tro angatr a lep hnei taua la itre traon i ö hna eköhagen, lo hnei ö hna mejiune kow.”
18 “Ame pe, ngöne la ijine cili,” öni Iehova, “tha tro kö ni a apatrenyi epuni asë. 19 Nge e tro angatr a hnying ka hape: ‘Hnauëne la Iehova Akötresi së a kuca lai?’ Tro eö a sa koi angatr: ‘Tune lo epuni a nuetriji ni troa nyihluen la haze trenyiwa ngöne la nöje i epun, tro hë epuni a nyihluen la itre trenyiwa ngöne la ifekë nöjen.’”
20 Qaja jë kowe la itre matra i Iakobo,
Nge qaja trongëne jë e Iudra ka hape:
21 “Drenge ju, nöj ka xeti he nge ka pë inamacan:*
Hetre luemeke i angatr ngo tha öhne pe;
Hetre lue hnangenyë i angatr ngo tha drenge pe.
22 Hane hi la hna qaja hnei Iehova: ‘Pëkö xoue i epun?
Tha tro kö epuni lo a hmengöhmengöne qëmekeng?
Eni la ka amë la ngöni matre nyi ifegone la hnagejë,
Ketre wathebo lai ka cile hut hna thatreine sasaith hnene la hnagejë.
Ngacama elë draië ju hë la itre hoke ne gejë, ngo tha ka catre kö itre ej;
Ngacama ulili catre ju hë itre ej, ngo thatreine kö troa tro sasaithe la ngöni.
23 Ngo ame kö la nöje ce, ke ka pi hun me icilekeu;
Hnei angatr hna jea me trongëne pena la ketre gojeny.
24 Nge pëkö ka ithuecatrekeu ka hape:
“Enehila, xoue Iehova Akötresieti jë së,
Lo ka axulun la mani ngöne la nyipi ijin,
La itre pane mani me itre mani tixenuë ne la macatre,
Lo ka thupëne thatraqai së la itre wiike ne menu.”
25 Hnene la itre tria i epun, matre tha kapa hmaca kö epun la itre manathithi cili;
Hnene la itre ngazo i epun, matre tha kapa hmaca kö epun la itre ewekë ka loi.
26 Ke hetre ka iakötrë ngöne la nöjeng.
Angatr a thup tune la itre ka tra thethi waco ka lapa cil.
Angatr a hnaane la theth hna mecin.
Ngo itre atre pe la hnei angatr hna ea.
27 Tune la aqane tiqa ne la hnë umë waco,
Ketre tiqa ha la itre uma i angatr hnei iaö.
Aqane kuca i angatre lai matre troa catr me trenamo.
28 Kökötre hë nge ucici hë la ngönetrei i angatr;
Tiqa ha angatr hnei iakötrë.
Nge göne tro pala hi a trenamo,
Tha angatre kö a nyixölen la nekön hna mecitrij hnei kem ngöne la hnakootr;
Nge angatr a cipane la meköt kowe la itre ka pë ewekë.’”
29 “Hapeu, tha tro kö ni a ihnyingë me angatr pine lai?” öni Iehova.
“Tha hnëqange kö troa të kowe la nöje ka ujë tun?
30 Hna traqa la ketre ewekë ka ngazo catr ngöne la nöj:
31 Itre perofeta a qeje trengathoi,
Itretre huuj a huliwan menun la mus i angatr.
Nge celë hi la aja ne la nöjeng.
Ngo nemene ju hë la hnei epuni hna troa kuca e traqa ju la pun?”