Ieremia
13 Hane hi la hnei Iehova hna qaja koi ni: “Tro jë troa itö beletre lino, nge othe ju hune la gö i ö, ngo the ahmuhmune pi kö.” 2 Ame hnenge hna itö beletr tune lo hna upi ni hnei Iehova, me othe ej ngöne la göng. 3 Thupene lai, hnei Iehova hna alua ithanata koi ni, me hape: 4 “Xome jë la beletre hnei ö hna itön nge hna hnöth hune la gö i ö, nge tro jë hë kowe la hneopegejë Euferata. E cili, tro eö a juetrën ej ngöne la gaa kaqa ne git.” 5 Matre eni a tro jë ezine la hneopegejë Euferata, me juetrëne la beletr tune lo hna upi ni hnei Iehova.
6 Ngo itre drai thupen, öni Iehova koi ni: “Tro hmaca jë ezine la hneopegejë Euferata troa xome lo beletr hnenge hna upi ö troa juetrën.” 7 Ame hnenge hna tro ezine la hneopegejë Euferata, me sin ngöne la götrane hnenge hna juetrëne lai beletr, matre xome hmaca. Nge öhne ju hi ni laka, ngazo hë lai beletr, nge tha nyine tro hmaca kö a huliwan.
8 Ame hnei Iehova hna ithanata koi ni, me hape: 9 “Hane hi la hna qaja hnei Iehova: ‘Celë hi aqane tro ni a lep la pi tru ne la angetre Iudra, memine la trenge pi tru ne la angetre Ierusalema. 10 Xele kö la itre atr cili ka ngazo troa drenge la itre trengewekëng. Angatr a catre xötrethenge la itre aja* i angatr ka ngazo, me drengethenge, me nyihluen, me thili kowe la itre xaa haze. Tro hë angatr a pë eloin tune lo lai beletr.’ 11 ‘Ke tune la beletr hna othe hune la gö ne la atr, hnenge hna othe la nöje* Isaraela me Iudra hune la göng,’ öni Iehova, ‘matre tro angatr a nöjeng, ketre ewekë ka mingöming, ka ahlemune la ëjeng, nge ka atrunyi ni. Ngazo pe, tha drenge kö angatr.’
12 “Nge tro fe eö a qaja la maca celë koi angatr: ‘Hane hi la hna qaja hnei Iehova, Akötresi Isaraela: “Hna nyialien hnei waina la nöjei trengene waina ka tru.’” Nge tro hë angatr a sa koi ö ka hape: ‘Atre hi huni laka, troa nyialien hnei waina la trengene waina ka tru!’ 13 Nge tro hë eö a sa ka hape: ‘Hane hi la hna qaja hnei Iehova: “Tro ni a traimen hnei waina la itre atrene la nöje ce, me itre joxu ka tithe la therone i Dravita, me itretre huuj, me itre perofeta, me angetre Ierusalema asë, uti hë la tro angatr a hnaitö. 14 Tro ni a ihnakeu angatr, itre kem me itre kuku,”* öni Iehova. “Tha tro kö ni a hnimi angatr, tha tro kö ni a hace pi angatr, nge tha tro kö ni a utipi angatr. Pëkö ka troa sewe ni troa apatrenyi angatr.”’
15 Drenge ju nge hnangenyëne ju.
The pi tru kö, ke ase hë Iehova ithanata.
16 Atrunyi Iehova jë Akötresi epun
Qëmekene tro nyidrëti a axulune la melöhlem
Nge troa waline la lue ca i epun hune la itre wetr e hejihej.
Tro epuni a lapa treqene la lai,
Ngo tro nyidrëti a axulune la iahnu ka miti hnin;
Tro nyidrëti a saze la lai koi hnenyipajidr.
17 Nge maine xele kö epuni ma dreng,
Tro ni a treije juetrë pine la aqane pi tru i epun.
Troa xölaxöla la itre trenge timidrang, troa neni la itre trenge timidrang qa ngöne la luemekeng,
Ke hna akalabusine la hnënge mamoe i Iehova.
18 Qaja jë kowe la joxu me kowe la thine i nyidrë ka hape: ‘Lapa ju e cahu fen,
Ke tro ha mala la lue korona i epon ka mingöming qa hune la lue he i epon.’
19 Ase hë thinge* la itre traon ne kolojë, nge pëkö ka troa fe.
Ase hë kötre fë la nöje Iudra; hna xomi angatr asë.
20 Gala jë nge goeëne jë la itre ka traqa qa kolopi.
Ekaa ha la hnënge mamoe hna hamë eö, lo itre ka mingöming?
21 Maine tro la itre atr hnei ö hna xom ceitu me itre sipu sinee i ö
a lepi ö, ke nemene pë hë la hnei ö hna troa qaja?
Hapeu, tha tro kö a traqa koi ö la akötrene la föe ka hnaho?
22 Tro eö a thel ka hape: ‘Hnauëne la kola traqa koi ni la itre ewekë cili?’
Ke hnene la ngazo ka tru hnei ö hna kuca. Celë hi kepin matre, hna hule zezen la pune iheetre i ö
Nge hna akötrëne la tidöca i ö.
23 Hapeu, atreine kö la atre Aithiope troa saze hane ngönetrei, maine tro pena la leopar a saze la hna thatha han?
Maine eje hi, tro hë epuni a atreine kuca la loi,
Epun itre ka majemine kuca la ngazo.
24 Haawe, tro hë ni a aisaije epun, tune la jez hna ufe enyin hnene la enyi ne hnapapa.
25 Celë hi ka troa traqa koi ö.* Celë hi edrö hnenge hna tuluthe koi ö,” öni Iehova,
“Pine eö thëthëhmi ni me kapa menun la itre trengathoi.
26 Celë hi matre, tro ni a hule draiëne la iheetre i ö me amë hune la he i ö,
Nge tro ha mama la hnei ö hna hmahman,
27 Me itre aqane nyixetë i ö, me aqane ho i ö tune la hos ka pi itrokeu,
Me itre huliwa i ö ka sis* ne föe ne gojeny.
Hune la itre sasala me ngöne la hlapa,
Hnenge hna öhne la itre huliwa i ö hna sisin.
Ekölöhini pe eö Ierusalema!
Uti hë eu la tro eö a pui ngazo?”