Ezera

7 Thupene la itre ewekë cili, hmekune lo kola mus hnei Aretaseta joxu ne Peresi, hnei Ezera* hna bëeke hmaca. Angeice la nekö i Seraia, nekö i Azaria, nekö i Hilekia, 2 nekö i Saluma, nekö i Zadoka, nekö i Ahituba, 3 nekö i Amaria, nekö i Azaria, nekö i Meraioth, 4 nekö i Zeraia, nekö i Uzi, nekö i Buki, 5 nekö i Abisua, nekö i Fineasa, nekö i Eleazara, nekö i Arona atre huuje ka sisitria. 6 Hnei Ezera hna bëeke qa Babulona, nge angeice la ketre atre cinyihane ka atre hnyawa* la Wathebo i Mose, lo hna hamën hnei Iehova Akötresi Isaraela. Hnene la joxu hna hamë angeic la nöjei ewekë hnei angeice hna sipon, ke ce angeic* me Iehova Akötresi angeic.

7 Ngöne la kola 7 lao macatre ne mus i Aretaseta joxu, hnene la itre xa angetre Isaraela, me itre atre huuj, me angetre Levi, me itre ka nyima, me itre ka thupë qëhnelö, me itre hlu* ne la uma ne hmi, hna tro e Ierusalema. 8 Nge hnei Ezera hna traqa e Ierusalema ngöne la hna 5 ne treu, lo kola 7 lao macatre ne mus ne la joxu. 9 Nge hnei angeic hna tro qa Babulona ngöne la pane drai ne la pane treu. Nge angeic a traqa ju e Ierusalema ngöne la pane drai ne la hna 5 ne treu, ke hnene la Akötresi angeic ka trene ihnim hna ce* me angeic. 10 Hnei Ezera hna hnëkëne la hni angeic* troa inine me trongën la Wathebo i Iehova, me inin koi Isaraela la itre hna amekötin, me itre wathebo ka meköt.

11 Hane hi la ketre kopi ne la tusi hnei Aretaseta hna hamën koi Ezera atre huuj, nge atre cinyihan ka maca* ngöne la itre hna amekötin, me itre wathebo hnei Iehova hna hamë Isaraela. Kola hape:

12 *“Qaathei Aretaseta joxu, koi Ezera atre huuj nge atre fejan la wathebo ne la Akötresie ne hnengödrai: Epi tro la tingetinge ka pexej a lapa hui eö! Enehila, 13 hane hi la hnenge hna amekötin. Ame la nöjei atre Isaraela ngöne la baselaiang, me itre atre huuj me angetre Levi ka ajane troa ce tro me eö a tro Ierusalema, loi e tro angatr a tro. 14 Ke hna upi ö hnene la joxu memine la 7 lao atresi nyidrë, troa wange ka hape, hna trongëne kö e Iudra me Ierusalema la Wathebo ne la Akötresie ka ce* me eö. 15 Tro fe eö a xome trongëne la sileva me gool hna hamëne xanën* hnene la joxu me itre atresi nyidrë, kowe la Akötresi Isaraela ka hetre uma e Ierusalema. 16 Nge tro fe eö a xome la nöjei sileva me gool hnei ö hna troa kapa* e Babulona, me itre ahnahna nyine troa hamën xanën* hnene la nöj me itre atre huuj, thatraqane la uma ne la Akötresi angatr e Ierusalema. 17 Nge tro eö a xome la mani e cili, me canga itöne la itre kau, me itre nani trahmany, me itre neköi mamoe, me nöjei wene feja, me waina hna ce huujën. Nge qa i ö a huujëne la itre ewekë cili, hune la ita ne huuj ngöne la uma ne la Akötresi epun e Ierusalema.

18 Nge ame kowe la munëne sileva me gool, qa i ö me itre trejin me eö troa amekötin la aqane troa huliwan, thenge la aja ne la Akötresi epun. 19 Nge ame la nöjei trengen hna hamë eö, nge hna troa huliwan thatraqane la hmi hnine la uma ne la Akötresi ö, tro fë jë qëmeke i Akötresie e Ierusalema. 20 Nge ame la itre xa ewekë ka nyipiewekë kowe la uma ne la Akötresi ö, tro pë hë eö a nyithupen hnene la mani hna xome qa ngöne la trengamo i joxu.

21 “Eni, Aretaseta joxu la ka amekötine lai kowe la nöjei atre thupë mani Tröne La Hneopegejë.* Ame la nöjei ewekë hna troa sipo epun hnei Ezera atre huuj, lo atre cinyihan ka fejane la Wathebo ne la Akötresie ne hnengödrai, qa i epuni troa canga hamë angeic. 22 Ijije troa sipon la 100 lao talane* sileva, me 100 lao kori* ne qitr, me 100 lao bathë* waina, me 100 lao bathë oel, nge tha hna qeje tulune kö kowe la sotr. 23 Epi troa catre kuca la hna amekötin hnene la Akötresie ne hnengödrai thatraqane la uma i nyidrë, wanga elëhni jë la Akötresie ne hnengödrai kowe la baselaia ne la joxu, me itre nekö i joxu. 24 Nge tro epuni a atre laka, pëkö mani hna troa athip maine hootr, maine thupene gojeny, kowe la itre atre huuj, me angetre Levi, me itre ka elo miuzik, me itre ka thupë qëhnelö, me itre hlue ne la uma ne hmi,* me itre ka huliwa hnine la uma celë i Akötresie.

25 “Nge ame eö Ezera, thenge la inamacan hnei eö hna kapa qaathene la Akötresi ö,* acile jë la itre atre isenyin, me itre atre iameköti ka troa amekötine la nöjei atre ka lapa Tröne La Hneopegejë. Troa acil la itre atr ka atre la itre wathebo ne la Akötresi ö, nge tro angatr a inine la nöjei atr ka thatre. 26 Nge ame la atre ena la Wathebo ne la Akötresi ö, me wathebo ne la joxu, loi e troa canga nyithupene koi angeic. Troa humuthi angeic, maine xomi angeic kowe la nöje trenyiwa, maine amadën, maine akalabusin.”

27 Haawe, epi troa atrunyi Iehova Akötresi ne la itre qaaqaa së, ke hnei nyidrëti hna amë e kuhu hni ne la joxu, la aja troa amingömingöne la uma ne hmi Iehova e Ierusalema! 28 Nge hnei nyidrë hna amamane la ihnimi nyipici i nyidrë, ke hnei nyidrë hna kuca matre hnimi ni jë hnei joxu, me itre atresi nyidrë, me nöjei he ne nöj ka tru i joxu. Matre hnenge hna xomi trengecatr, ke ce Iehova Akötresing me eni, nge hnenge hna acasine la itre atre* ka tru ne Isaraela, matre tro angatr a ce tro me eni.