Salamo
Thithi ne la atr hna wajahuj ngöne la angeic a kucakuca,* me qaja koi Iehova la akötre i angeic.
102 Iehova fe, drenge ju la thithing;
Epi tro nyipëti a dreng la eni a sipo ixatua.
2 The nue ni kö ngöne la kola traqa la akötr koi ni.
Pane thili ju matre drei ni;
Canga sa jë koi ni ngöne la eni a hë nyipë.
3 Ke kola tro la itre draing kösë so ne eë,
Nge wele hë la itre juneng kösë wanalep ne eë.
4 Ceitu la hning memine la haö ka fitr hna cinajön,
Ke thëthëhmine hë ni troa xeni la trepang.
5 Tru catre la nine aweng,
Matre itre juneng a fedr kowe la ijöneng.
6 Ceitung memine la waco* ne hnapapa ka cile cas;
Kösë neköi men eni nyipine la itre itra etë.
8 Ngöne la drai ka pexej, kola qaqa ni hnene la itre ithupëjiang.
Ame la itre ka hnyimasai* ni, angatr a qaja la ëjeng nyine ieji.
9 Ke eni a xeni la hnatresij tune la falawa,
Nge hna thuenyiköne la trepe imeng hnei trenge timidra,
10 Pine la trenge elëhni me wesitre i nyipë,
Hnei nyipëti hna kapa draië ni me triji ni.
11 Ame la itre draing, ceitu me iahnu ka qea,
Nge ceitung memine la haö ka fitr.
12 Ngo ame nyipë Iehova fe, ka epine palua nyipë,
Nge tro ha cile huti la ëje i nyipë uti hë la nöjei xötr.
13 Nge tro hë nyipëti a cil me utipi Ziona,
Ke ijine hë tro nyipëti a amamane laka, nyipëti a kepe angeic;
Traqa ha la ijine hna sa.
14 Ke tru la ihnimi ne la itre hlue i nyipë kowe la itre etë e cili
Nge angatre fe a utipine la xaxaun.
15 Tro ha xouene la ëje i Iehova hnene la itre nöj,
Nge tro ha xouene la lolo i nyipë hnene la nöjei joxu asë e celë fen.
16 Ke tro hmaca Iehova a xupi Ziona;
Tro hë nyidrëti a mama ngöne la lolo i nyidrë.
17 Tro nyidrëti a drenge la thithi ne la itre ka pë loi;
Tha tro kö nyidrëti a methinën la thithi angatr.
18 Hna cinyanyine lai thatraqane la xötr ka troa traqa,
Matre troa atrunyi Ia hnene la nöj hna tha hnahone* petre kö.
19 Ke nyidrëti a goeëne qa ngöne la ehmitrötre i nyidrë ka draië,
Nge qa hnengödrai, Iehova a waipengöne la fen,
20 Matre drenge la itre xëwe ne la hna akalabusin,
Me amelen la itre atr hna troa humuth,
21 Matre troa qaja trongëne la ëje i Iehova e Ziona
Memine la elolo i nyidrë e Ierusalema,
22 Ngöne la kola troa icasikeu la itre nöj me itre baselaia
Matre nyihlue i Iehova.
23 Hnei nyidrëti hna canga apëne la trengecatreng;
Hnei nyidrëti hna ahopatren la itre draing.
24 Hnenge hna qaja ka hape: “Akötresinge fe,
The thupatëne kö la meleng, ke tha qatre pala kö ni,
Nge ka epine palua nyipë.*
25 Hnei nyipëti hna ami trepene la fen ngöne la qaan,
Nge huliwa ne la lue ime i nyipë la itre hnengödrai.
26 Tro itre ej a patr ngo ka cile huti nyipë;
Tune la ketre iheetr, tro itre ej a hnyiqetr.
Tune la itre hnaheetr, tro nyipëti a nyihnan itre ej, me apatrene trij.
27 Ngo casi pala hi nyipë, nge pëkö pune la itre macatre i nyipë.
28 Tro la itre nekö ne la itre hlue i nyipë a hetre hnë lapa ka cile hut,
Nge tro ha acile hutin la itre matra i angatr qëmekei nyipë.”