Ieremia

52 Traqa koi 21 lao macatre i Zedekia lo kola acili joxu angeic. Hnei angeic hna musi koi 11 lao macatre e Ierusalema. Hamutala la ëjene la thine i angeic, nge eahlo la nekö i Ieremia qa Libena. 2 Hnei Zedekia hna kuca la ngazo qëmekei Iehova, tune lo aqane kuca i Iehoiakima ekö. 3 Hna traqa la nöjei ewekë cili e Ierusalema me Iudra, pine la elëhni i Iehova, uti hë la nyidrëti a ase apatrenyi angatr qëmekei nyidrë. Nge hnei Zedekia hna icilekeu memine la joxu ne Babulona. 4 Matre ame ngöne la kola 9 lao macatre ne mus i Zedekia, hmekune la drai 10 ne la hna 10 ne treu, hnei Nebukaneza* joxu ne Babulona me trongene isi i nyidrëti asë hna lepi Ierusalema. Hnei nyidrëti hna acile la lapa ne soce i nyidrë ezine la traon, me acile la ihag ne isi xötreithi Ierusalema. 5 Hna lapa xötreithe la traon uti hë la kola 11 lao macatre ne mus i Zedekia.

6 Nge ame hë la drai 9 ne la hna 4 ne treu, lo kola catrehnine la jiin ngöne la traon nge pëhë xen, 7 ke hna thë la ketre götran ne la ihag. Itre soc i angetre Kaledaia pala kö a lapa xötreithe la traon, nge hnene la itre soc hna kötretrije la traon e jidr: hnei angatr hna kötr qa ngöne la qëhnelö nyipine la lue ngöne uma ezine la djardë i joxu, matre tro kowe la Araba. 8 Ngo hnene la trongene isi i angetre Kaledaia hna weji Zedekia joxu, me ee angeic ngöne la hnapapa xötreithi Ieriko. Ame hna ikötrenyi la itre soc i angeic. 9 Nge hna ea la joxu me xomi angeic kowe la joxu ne Babulona e Ribela ngöne la nöje Hamath. Nge hnene la joxu ne Babulona hna ameköti angeic, 10 me upe troa humuth la itre nekö i Zedekia qëmekei angeic, memine fe la itre nekö i joxu ne Iudra. 11 Thupene lai, hnene la joxu ne Babulona hna atimekë* Zedekia, me ceinë angeice hnei ceine kopa, me xomi angeic a tro Babulona. Hnei nyidrëti hna akalabusi angeic uti hë la angeic a mec.

12 Ame ngöne la drai 10 ne la hna 5 ne treu, lo kola 19 lao macatre ne mus i Nebukaneza* joxu ne Babulona, hnei Nebuzaradana, lo tane la itre ka thupë joxu, hna traqa e Ierusalema. 13 Hnei angeic hna manithe la uma ne hmi i Iehova, memine la hnalapa* i joxu, me nöjei uma e Ierusalema. Hnei angeice fe hna hane dreuthetrij la nöjei uma ka tru. 14 Nge hnene la trongene isi i angetre Kaledaia memine la tane la itre ka thupë joxu, hna thëtrij la itre ihag xötreithi Ierusalema.

15 Ame hnei Nebuzaradana tane la itre ka thupë joxu, hna kötre fë la itre xaa atrene la nöj ka tha qa kö hna ini, me itre ka lapa pe ngöne la traon. Hnei angeice fe hna xome la itre soc ka kötrene la isi kowe la joxu ne Babulona, me itre ka maca troa huliwa. 16 Ngo hnei Nebuzaradana tane la itre ka thupë joxu, hna nue pe kö la itre ka pë ewekë, matre troa huliwa ngöne la itre hlapa vin, me kuca la itre xaa aqane eëny hna amekötin koi angatr.

17 Hnene la angetre Kaledaia hna thë la itre poto kopa ne la uma ne hmi i Iehova, me itre ikatr, memine la Hnagejë kopa hnine la uma ne hmi i Iehova. Nge angatr a xom asë jë la kopa a tro Babulona. 18 Hnei angatre fe hna xome la itre itrapë hnatresij, me itre pel, me itre fizi, me itre kap, me itre ver, me nöjei ewekë kopa hna huliwan hnine la uma ne hmi. 19 Nge hnene la tane la itre ka thupë joxu hna xome la itre trap, me itre trengen eë, me itre kap, me itre itrapë hnatresij, me itre ita ne laam, me itre ver me kap hna kuca hnei nyipi gool me nyipi sileva. 20 Nge ame göne la lue poto, me Hnagejë, memine la 12 lao kau kopa fene la Hnagejë, me itre ikatr hnei Solomona joxu hna kuca thatraqane la uma ne hmi i Iehova, ke thatreine kö troa e la etrune kopa hna xom.

21 Ke ame göne la lue poto, traqa koi 18 kubit* la edraië i nyidro, nge troa xome la ketre eno ka 12 lao kubit matre tuluthe la eisaisan; traqa koi 4 lao hene wanakoime* la ehmekönine la lue poto, nge ka lai hnin. 22 Hna kuca fe hnei kopa la lue hene poto, nge traqa koi 5 lao kubit la edraiën. Ame la itre cein hna ielekeun me itre grenad ka kanoth la lue hene poto, ke hna kuca asë hnei kopa. Ceitune hnyawa hi la lue poto, me itre grenad nyine thaip. 23 Traqa koi 96 lao grenad hna acatren xötreith, matre ame asë hi la etrune grenad hna amë hune la itre cein hna ielekeun, ke 100.

24 Hnene mina fe la tane la itre ka thupë joxu, hna akalabusi Seraia tane la itretre huuj, me Zefania lo hnaaluen thupei angeic, memine la köni atre thupë qëhnelö. 25 Nge hnei angeice fe hna xom qa ngöne la traon la ketre atr ka huliwa hnine la hnalapa i joxu, lo ka thupëne la itre soc, memine la 7 lao atr ka ce huliwa memine la joxu, memine lo sekreter ne la tane la itre soc, lo ka ihë troa isi, memine la 60 lao trahmany ka lapa pe ngöne la traon.

26 Nge hnei Nebuzaradana, lo tane la itre ka thupë joxu, hna othi angatr, me xomi angatr kowe la joxu ne Babulona e Ribela. 27 Ame hnene la joxu ne Babulona hna humuthi angatr e Ribela, ngöne la nöje Hamath. Celë hi aqane kötre fë la angetre Iudra qa ngöne la nöje i angatr.

28 Hane hi la etrune la itre atr hnei Nebukaneza* hna kötre fë: 3 023 lao atre Iudra hna xom, lo kola 7 lao macatre ne mus i nyidrë.

29 Traqa koi 832 lao atr hna xom qa Ierusalema, lo kola 18 lao macatre ne mus i Nebukaneza.*

30 Traqa koi 745 lao atre Iudra hna xom hnei Nebuzaradana tane la itre ka thupë joxu, lo kola 23 lao macatre ne mus i Nebukaneza.*

Matre traqa koi 4 600 lao atr hna kötre fë.

31 Thupene lo kola 37 lao macatre ne othi Iehoiakin joxu ne Iudra, ngöne la drai 25 ne la hna 12 ne treu, hnei Evil-Merodak joxu ne Babulona, hna nue* Iehoiakin joxu ne Iudra qa kalabus. Kolo macatre ne acili Evil-Merodak troa joxu. 32 Hnei nyidrëti hna ithanata hnyawa koi angeic, me hamë angeic la itre götrane qa ka tru* kö hune la itre xaa joxu ka ce me angeic e Babulona. 33 Matre hnei Iehoiakin hna una la itre iheetr ne kalabus i angeic. Nge ame ngöne la nöjei drai ne mele angeic, hnei angeic hna xen hune la laulau i joxu. 34 Eje hi, uti hë la angeic a mec, hnei angeic pala hi hna kepe xen e nöjei drai qaathene la joxu ne Babulona.