Ezekiela
24 Ame ngöne la hna 9 ne macatre, ngöne la drai 10 ne la hna 10 ne treu, hnei Iehova hmaca hna ithanata koi ni me hape: 2 “Nekö i atr, cinyanyine ju la drai* ce, la drai celë. Enehila hi la ijine kola nyiqaane lepi Ierusalema hnene la joxu ne Babulona. 3 Qaja jë la ka traqa* kowe la nöj ka tha idrei, nge hape jë göi angatr:
“‘Hane hi la hna qaja hnei Iehova Joxu Ka Sisitria:
“Amë ju la öl;* atë ju ej hune la eë nge nei timine ju.
4 Amë ju la itre sine mitr, itre sine mitr ka loi,
Ene la itrepë me iap; nge atiqane ju hnei itre june ka lolo.
5 Iëne jë la itre mamoe ka sisitria qa ngöne la hnënge mamoe. Amë atrune ju la itre sinöe fene la öl.
Boelëne jë la itre sine mitr, nge atrone jë la itre jun e kuhu hnine la öl.”’
6 “Hane hi la hna qaja hnei Iehova Joxu Ka Sisitria:
‘Ekölöhini la traone ka ihumuth, lo öl ka xoj nge tha hna xometrije kö la xojen!
Epi troa huletrije la itre sine mitren; nge tha tro kö a uthi dröne götiën.*
7 Ke thei angeice kö la madra hnei angeic hna anenin; goi nenge fe angeic hune la etë.
Tha hnei angeice kö hna neng e kuhu hnadro matre troa kelem.
8 Hnenge hna amejëne la elëhning matre troa nyithupene koi angatr,
Jëne la hna nenge la madra ne la itre hna humuth hune la etë ka melemel
Matre tha tro kö a kelem.’
9 “Haawe, hane hi la hna qaja hnei Iehova Joxu Ka Sisitria:
‘Ekölöhini la traone ka ihumuth!
Tro ni a kuca la ketre xenyi* sinöe.
10 Epi troa iatëkeune la itre sinöe me amelene la eë,
Loi e troa atrone hnyawa la mitr, me nenge la zan, nge epi tro la itre jun a wel.
11 Epi troa atë la öl ka pë alien hune la itre wanalep matre troa idreuth
Me palulu la öle kopa.
Tro ha hmu e kuhu hnine la öl la engazon ej, nge tro ha patr la xojen ej.
12 Pine laka, hmekön pala ha la xojen ej nge jole troa huletrij,
Matre ka ijeletrengehni nge ka iakucakucany,
Haawe, ce trije pi la öl memine la xojen ej hnine la eë!’
13 “‘Hnei ö hna puingazo hnene la aqane ujë i ö ka sis. Hnenge hna tupath troa ahmitrötrë eö, ngo pëkö ca ewekë ka ijij troa ahmitrötrë eö. Tha tro kö a ahmitrötrë eö, e tha pane lapakötre kö la elëhning koi ö. 14 Ase hë ni Iehova qaja, nge tro kö lai a eatr. Tha tro kö ni a luelu, me treije pi ö, me hace fë la hnenge hna troa kuca. Tro ha ameköti ö thenge la thiina i ö me aqane ujë i ö,’ öni Iehova Joxu Ka Sisitria.”
15 Hnei Iehova hmaca hna ewekë koi ni me hape: 16 “Nekö i atr, tro ni a aca tro thapa la föe hnei ö hna hnim. Tha tro kö eö a hnëmeci* angeic, me treije pi angeic. 17 Treije thaupu ju, nge the kuca kö la itre huliwa ne kele wezipo. Atuthe ju la he i ö, nge otrë butre jë. The juetrëne kö la që i ö, nge the xeni kö la falawa hna troa hamë eö.”*
18 Hnenge hna ewekë kowe la nöj e hmakany, nge hna meci la föeng e jidr. Matre ame ju kö lai hmakany thupen, hnenge hna kuca la hna upi ni. 19 Önine la itre atr koi ni: “Qejepengöne jë koi hun la hnei ö hna kuca: Nemene la aliene la itre ewekë cili koi hun?” 20 Öninge jë hi: “Hnei Iehova hna ewekë koi ni me hape: 21 ‘Qaja jë kowe la nöje Isaraela ka hape: “Hane hi la hna qaja hnei Iehova Joxu Ka Sisitria: ‘Tro ni a apuingazone la hnë hmi koi ni , lo hnei epuni hna lapaa selën, me wangatrun, me hniin. Tro ha humuthe hnei taua la itre nekö i epuni trahmanyi me jajiny, ka tha hane ce traqa me epun. 22 Nge qa i epun troa tung. Tha tro kö epuni a juetrëne la që i epun, me xeni la falawa hna troa hamë epun. 23 Tro epuni a atu he me otrë butr. Tha tro kö epuni a hnëmec, me treije latresi. Ngo tro epuni a pi hnene la itre ngazo i epun, me itreijekeu. 24 Ezekiela hë la ketre hatren koi epun. Tro epuni a kuca tune la aqane kuca i angeic. Ame hë la kola eatre lai, tro hë epuni a atre laka, Iehova ni Joxu Ka Sisitria.’”’”
25 “Ngo ame kö eö nekö i atr, ngöne la ijine tro ni a xometrije la ihag atraqatr i angatr, lo hnei angatr hna madrine fë, me wangatrun me hniin, lo ijine tro ni a kötre fë la itre nekö i angatr trahmanyi me jajiny, 26 tro kö a thuemacanyi ö hnene la ketre atr ka mele pe. 27 Ngöne la drai cili, tha tro hmaca kö eö a hum: Tro eö a fe la që i ö, me ithanata kowe la atr ka mele pe. Tro hë eö a ketre hatren koi angatr, nge e cili, tro angatr a atre laka, Iehova ni.”