Ezekiela
43 Thupene lai, hnene la trahmanyi hna tro sai ni kowe la qëhnelö ka qëmeke koië. 2 E cili, hnenge hna öhn la kola traqa qa koië la lolo ne la Akötresi Isaraela. Ceitu la nine i nyidrë me mejene tim ka enienij, nge hna thinan la ihnadro hnene la lolo i nyidrë. 3 Ame la hnenge hna öhn, ke ka ceitu memine lo hnenge hna meköle goeën lo eni* a traqa troa apatrene la traon, memine lo hnenge hna meköle goeën ezin e Kebara; ame hnenge hna kei qe ipië.
4 Hnene la lolo i Iehova hna lö hnine la uma ne hmi, qa ngöne la qëhnelö ka qëmeke koië. 5 Ame hna xeji ni hnene la ketre ua, me lö sai ni kowe la kur ka he hnin. Nge öhne ju hi ni laka, ase hë haöthe la uma ne hmi hnene la lolo i Iehova. 6 Thupene lai, drenge ju hi ni la kola ithanata koi ni qa ngöne la uma ne hmi, ame hna traqa lai trahmany troa cil ezing. 7 Öni angeice* jë hi:
“Nekö i atr, e celë hi la hna amë la theroneng, memine la hnë amë la lue wacang. E celë fe la hnenge hna troa lapa nyipine la nöje Isaraela epine palua. Tha tro hmaca kö la nöje Isaraela me itre joxu i angatr a adrone la ëjeng ka hmitrötr, hnene la hnei angatr hna nyi föe ne gojeny memine la itre xaa haze, me hnene la itre ngönetrei ka mec ne la itre joxu i angatr.* 8 Ame la angatr a amë la qene qëhnelö i angatr ezine la qene qëhnelöng, me itre hune qëhnelö i angatr ezine la hune qëhnelöng, me xupe hi la neköi ngöne uma nyipi eni me angatr, hnei angatr hna adrone la ëjenge ka hmitrötr hnene la itre huliwa i angatr ka sis. Matre hnenge hna apatrenyi angatr ngöne la elëhning. 9 Haawe, loi e tro angatr a ananyine qaatheng la itre huliwa i angatr ka sis,* me itre ngönetrei ka mec ne la itre joxu i angatr, nge tro hë ni e cili a lapa nyipi angatr epine palua.
10 “Ngo ame kö eö, nekö i atr, qejepengöne jë la uma ne hmi kowe la nöje Isaraela, matre tro angatr a hmahma hnene la itre tria i angatr. Nge qa i angatre fe troa inine hnyawa la tulu* ne la uma ne hmi. 11 Nge e tro angatr a hmahma fë la nöjei huliwa i angatr, amamai angatre jë la tulu ne la uma ne hmi, ene la aqane acil ej, me itre hnë lö, me hnë tro. Amamai angatre jë la itre tulu me itre hna amekötin asë thatraqan ej, me itre tulu me itre wathebo asë thatraqan ej. Nge cinyanyine ju itre ej qëmekei angatr, matre tro angatr a waipengöne hnyawa la tulu ne ej me trongën la itre hna amekötin. 12 Hane hi la wathebo göne la uma ne hmi: ame asë hi la itre götran xötreithe la he ne la wetr, ke ka nyipi hmitrötr. Eje hi, celë hi wathebo göne la uma ne hmi.
13 “Hane hi la etrune la itre kubit hna e, la kola tuluth la ita ne huuj (hna nyixane la ca kubit hnene la ca hnatrapaim)*: traqa koi ca kubit la trepen hna xupe draiën, nge eje hmaca kö a sasaithe la ca kubit. Nge xötreithe la ölin ej, hetre neköi ölin ka ca iwanakoime* la eisaisan. Celë hi trepene la ita ne huuj. 14 Ame e koho hune lai trepen, hetre hnaaluene götran* ka 2 kubit, nge eje hmaca kö a sasaithe la ca kubit. Nge hune lai götrane cili, hetre hnaakönine götran* ka 4 kubit, nge eje hmaca kö a sasaithe la ca kubit. 15 Traqa koi 4 kubit la edraiën la hnaeë ne la ita ne huuj, nge qa cili kola cil la 4 lao jian. 16 Ka kare la hna eë ne la ita ne huuj: traqa koi 12 kubit la eqean, nge 12 kubit la eisaisan. 17 Nge ame la 4 lao götran ne la hnaakönine götran* ne la ita ne huuj, ke traqa koi 14 kubit la eqean, nge sine hi la ca kubit la xötre ezin. Ame lai trepen, ke eje hmaca kö a sasaithe la ca kubit ngöne la 4 lao götran.
“Nge ame la eskalien ej, ke ka qëmek a tro koië.”
18 Thupene lai, öni angeice koi ni: “Nekö i atr, hane hi la hna qaja hnei Iehova Joxu Ka Sisitria: ‘Hane hi la itre hna amekötin nyine troa trongëne thupene la kola ase xupe la ita ne huuj, matre troa tro fë la itre huuj ne dreuth asë hun ej, me thathan ej hnei madra.’
19 “‘Tro eö a hamëne kowe la itre atre huuje i angetre Levi, lo itre matra i Zadoka ka easenyi ni matre nyihlueng, la ketre neköi kau trahmanyi qa ngöne la hna axö öni nyine huuj ne ngazo,’ öni Iehova Joxu Ka Sisitria. 20 ‘Qa i ö troa xome la sine la madran ej, me amë hune la 4 lao jian ne la ita ne huuj, ene la 4 lao kona ne la hnaakönine götran,* me hune la ölin xötreith, matre troa ahmitrötrëne la ita ne huuj qa ngöne la ngazo, me he la itre ngazo.* 21 Thupene lai, xome jë la neköi kau trahmany, lo huuj ne ngazo, nge dreuthe jë ngöne la götran ne la uma ne hmi hna hnëkëne thatraqane lai, e tröne la hnë hmi. 22 Ngöne la hnaaluene drai, qa i ö troa huujëne la nani trahmany ka pë engazon thatraqane la ngazo; nge tro fe a hane ahmitrötrëne la ita ne huuj qa ngöne la ngazo, tune lo hna kuca memine la neköi kau trahmany.’
23 “‘Nge e ase hë eö ahmitrötrën ej qa ngöne la ngazo, qa i ö troa huujëne la neköi kau ka pë engazon hna xom qa ngöne la hnëng öni, memine la ca mamoe trahmanyi ka pë engazon hna xom qa ngöne la hnënge öni ka co. 24 Tro hë eö a hamën lue ej nyine ahnahna koi Iehova, nge tro la itre atre huuj a sotrëne la lue öni, me huujën nyine huuj ne dreuth asë koi Iehova. 25 Ngöne la 7 lao drai, qa i ö troa huujën e nöjei drai la ca nani trahmany nyine huuj ne ngazo, me ca neköi kau qa ngöne la hnënge öni, me ca mamoe trahmany hna xome qa ngöne la hnënge öni ka co; qa i ö troa tro fë la itre öni ka pë engazon.* 26 Ngöne la 7 lao drai, tro ha kuca la itre huliwa nyine he la itre ngazo, matre ahmitrötrëne la ita ne huuj, me nyiqaane huliwan ej. 27 Thupene la itre drai cili, qaane la hna 8 ne drai, tro la itre atre huuj a tro fë hune la ita ne huuj, la itre huuj ne dreuth asë i epun,* me itre huuj ne tingetinge* i epun; nge tro hë epuni a amadrinë ni,’ öni Iehova Joxu Ka Sisitria.”