Hosea
6 “Trohemi, bëeke hmaca jë së koi Iehova,
Ke hnei nyidrëti hna heje zezenyi së, ngo tro nyidrëti a aloinyi së.
Hnei nyidrëti hna lepi së, ngo tro nyidrëti a pelethe la itre eatre së.
2 Thupene la lue drai, tro hmaca nyidrëti a aegöcatrenyi së.
Ngöne la hnaakönine drai, tro nyidrëti a amejë së,
Nge tro hë sa mel qëmekei nyidrë.
3 Tro hë sa atre Iehova, me thele troa atrepengöi nyidrë.
Nge tune la kaqa ne lai, tha nyine lueluëne kö la ijine traqa i nyidrë;
Tro nyidrëti a traqa koi së, tune la kola hlupi la mani,
Tune la mani ka thue imene la dro ngöne la kola nyiqaane la macatre.”
4 “Eferaima fe, tro ni a uë eö?
Iudra fe, tro ni a uë eö?
Ke ceitune hi la ihnimi nyipici i epon memine la itre iaw ne hmakany,
Memine la xaxapo ka canga patr.
5 Celë hi matre tro ni a lepe humuthi epon jëne la itre perofeta;
Tro ni a humuthi epon hnene la itre trengewekë ne la qëng.
Nge tro la itre hna amekötin koi epon a hudrum tune la lai.
6 Ke ihnimi nyipici* la ka amadrinë ni, ngo tha itre huuje kö,
Nge the qaja pala ha la troa atre Akötresie, hune la troa tro fë huuj ne dreuth asë.*
7 Ngo hnei angatre pe hna ujë tune la itre atre menu, tha metrötrëne kö angatr la isisinyikeu.
Hnei angatr e cili hna mele thoi koi ni.
8 Gileada la traon ne la itre ka iangazo,
Nge hna haöth hnene la itre thupaca ka si madra.
9 Ceitune la itre atre huuj memine la ume atrekënö ka zae troa tra thethine la ketre atr.
Angatr a ihumuth ngöne la gojenyi ezin e Sekema,
Ke nyine hmahmane la aqane ujë i angatr.
10 Hnenge hna öhne la ewekë ka sis ngöne la nöje Isaraela.
Hnei Eferaima hna nyi föe ne gojeny;
Hnei Isaraela hna apui ngazo angeic.
11 Ame pena eö Iudra, ase hë sa la ijine troa menuë eö,
La ijine tro ni a bëeke fë la nöjeng hna kötre fë.”