Ezekiela
47 Thupene lai, hnei angeic hna bëeke sai ni kowe la hnë lö ne la uma ne hmi. Nge e cili, hnenge hna öhne la tim ka neni fene la qene qëhnelö ne la uma ne hmi, a tro koië; eje hi, ame la uma ne hmi, ke ej a qëmeke koië. Nge kola neni la tim fene la uma ne hmi ngöne la götrane maca, me neni kowe la götrane kolojë ne la ita ne huuj.
2 Ame hnei angeic hna tro sai ni a tro kuhu trön, jëne la qëhnelö e kolopi, me tro xomi ni troa kanothe la uma ne hmi uti hë la qëhnelö e kuhu trön, ka qëmeke koië. Nge hnenge hna öhn e cili, la tim ka neni ngöne la götrane maca.
3 Ame hë lai trahmany a tro koië memine la ketre eno ne tulu, hnei angeic hna tuluthe la 1 000 kubit,* me eatrongë ni troa sasaithe la tim: eje hë hune la lue wacang.*
4 Thupene lai, hnei angeice hmaca kö hna tuluthe la 1 000 kubit, me eatrongë ni troa sasaithe la tim: eje hë ngöne la lue watingönecang.
Nge hnei angeice hmaca kö hna tuluthe la 1 000 kubit, me eatrongë ni troa sasaithe la tim: eje hë ngöne la göng.
5 Hnei angeice hmaca kö hna tuluthe la 1 000 kubit, nge timi ka kaca ha ej, matre thatreine hë ni tro sasaithe la tim, ke jui catre hë, nge loi e tro aj; ketre timi hë ka kaca nge ka ihul, matre tha ijije hë troa tro sasaith.
6 Matre öni angeice koi ni: “Öhne fe hi ö lai nekö i atr?”
Ame hnei angeic hna xomi ni, me bëeke sai ni kowe la öline la hneopegejë. 7 Nge ame hë la eni a bëek, öhne ju hi ni laka, nyimutre catr hnei sinöe ngöne la lue pala ne la tim ka kaca. 8 Matre öni angeice koi ni: “Ej a neni kowe la itre götrane koië, me ut kowe la Araba,* me lö kowe la hnagejë. Nge e traqa ha ej kowe la hnagejë, tro ha nyi drosinöeëne la hnagejë. 9 Nge ngöne la nöjei götran hna troa neni la timi cili,* tro ha amelen asë la nöjei ka mel. Tro ha tiqa hnei nöjei pengöne ii, ke tro la tim a cili thenge. Tro ha nyi drösinöeëne la hnagejë, nge tro ha hetre mel ngöne asë hi la nöjei götran hna neni kow hnene la timi cili.
10 “Tro la itre ka nyi ii a cile xötrë qan e Eni-Gedi uti hë Enegelima, lo hna jöne la itre ifile ne nyi ii. Tro ha tiqa hnei nöjei pengöne ii e cili, tune lo itre ii ne la Hnagejë Ka Tru.*
11 “Tro ha hetre timi ka lapalapa me tim ka si trëtr, ngo thatreine kö itre ej troa ameun. Tro pe kö a nue itre eje kowe la sotr.
12 “Tro ha cia la nöjei pengöne sinöe nyine xen, ngöne la lue pala ne la timi ka kaca. Nge tha tro kö a fitre la itre drön, nge tro asë hi itre ej a wa wen. E nöjei treu, tro itre ej a wa wen, ke kola fii itre ej hnene la tim ka neni qa ngöne la hnë hmi. Tro ha xen la itre wene sinöe, me nyi drösinöeën la itre drön.”
13 Hane hi la hna qaja hnei Iehova Joxu Ka Sisitria: “Hane hi la itre götrane nyine tro epuni a hamën nyine edrö kowe la 12 lao tribu ne Isaraela, nge troa hamëne la lue edrö koi Iosefa. 14 Tro epuni asë a isa kepe götranen, nge casi hi la itre etrun.* Ase hë ni sisinyi troa hamëne la nöje ce kowe la itre qaaqaa i epun, nge enehila, kolo ha thawa* la nöje ce nyine edrö i epun.
15 “Hane hi la ifego ne la nöj, ngöne la götrane kolopi: ej a tro qa ngöne la Hnagejë Ka Tru, me Hethelon thenge, uti hë Zedada, 16 me Hamath, me Berotha, me Siberaim, nyipine la nöje Damaseko me Hamath, uti hë Hazaratikon ezine la ifego ne Hauran. 17 Haawe, tro la ifego a tro qa ngöne la hnagejë uti hë e Hazar-Enana, me xötrethenge trootro la ifego ne la nöje Damaseko e kolopi, memine la ifego ne la nöje Hamath. Celë hi ifego e kolopi.
18 “Ame pena la götrane koië, ke ej a tro nyipi Hauran me Damaseko, me xötrëne trongëne la hneopegejë Ioridrano, nyipin e Gileada memine la nöje Isaraela. Qa i epun troa xome la tulu qa ngöne la ifego uti hë la hnagejë e koië.* Celë hi ifego e koië.
19 “Nge ame la ifego e kolojë,* tro ej a tro qa Tamara uti hë la itre timi ne Meriba-Kadesi, me qa ngöne la itre tim* uti hë la Hnagejë Ka Tru. Celë hi ifego e kolojë.
20 “Ej e kuë la Hnagejë Ka Tru, qane ju hi la ifego uti hë la götrane ka qëmek koi Lebo-Hamath.* Celë hi ifego e kuë.
21 “Qa i epun troa ce thawa la nöje ce kowe la 12 lao tribu ne Isaraela. 22 Tro epuni a thawa la nöj nyine edrö i epun, me itre trenyiwa ka lapa me hnaho thei epun. Tro epuni a xome ceitu angatr memine la itre neköne la angetre Isaraela. Tro fe angatr a hane kepe edrö tui epun, nyipine la itre tribu ne Isaraela. 23 Qa i epun troa hamë götranene la trenyiwa ngöne la tribu hnei angeic hna lapan,” öni Iehova Joxu Ka Sisitria.