Daniela

9 Ame ngöne la pane macatre i Dariu, nekö i Asueru, ketre matra i angetre Madai hna acili joxun ngöne la baselaia i angetre Kaledaia, 2 hneng Daniela, hna öhn ngöne la pane macatre ne mus i nyidrë, la etrune la itre macatre ne tro pe hi a traa etë e Ierusalema: 70 lao macatre. Hnenge hna trotrohnine lai jëne la itre itus,* thenge lo hnei Iehova hna qaja koi Ieremia perofeta. 3 Ame hnenge hna ujë* koi Iehova, lo nyipi Akötresie, me xëwe koi nyidrë jëne la itre thith, me tha xen, me heetrë ibëek ka tru thenyin, me sië hnatresij. 4 Hnenge hna thithi koi Iehova Akötresing, me fe la hning koi nyidrë:

“Iehova fe, nyipi Akötresie, Akötresie ka draië nge hna xouen,* atre metrötrëne la isisinyikeu i nyidrë, me amamane la ihnimi nyipici i nyidrë kowe la itre ka hnimi nyidrë, me trongën la itre wathebo i nyidrë, 5 hne huni hna tria me kuca la ngazo, me iakötrë, me icilekeu; nge hne huni hna thipetrije la itre wathebo me itre hnei nyipëti hna amekötin. 6 Hne huni hna tha drenge lo itre hlue i nyipë perofeta, lo itre ka ewekë ngöne la ëje i nyipë kowe la itre joxu hun, me itre nekö i joxu hun, me itre qaaqaa hun, me itre atrene la nöje ce. 7 Iehova fe, thei nyipë la meköt, ngo the huni pë hë la hmahma,* tune la ka traqa enehila kowe la itre trahmanyi ne Iudra, me itre atrene Ierusalema, me angetre Isaraela asë ka lapa easeny maine gaa nany, ngöne lo itre nöj hnei nyipëti hna aisaije angatre kow, pine angatr tha mele nyipici koi nyipë.

8 “Iehova fe, epi tro huni a hmahma,* eahun me itre joxu hun, me itre nekö i joxu hun, me itre qaaqaa hun, ke hne huni hna ngazo koi nyipë. 9 Nge Iehova fe Akötresi hun, thei nyipëti la utipin memine la atreine troa nue la ngazo, ke hne huni hna icilekeu me nyipë. 10 Iehova fe, Akötresi hun, tha hne huni kö hna drei nyipë, ene la troa trongëne la itre wathebo hnei nyipëti hna hamëne jëne la itre hlue i nyipë perofeta. 11 Hnene asë hi la angetre Isaraela hna ena la Wathebo i nyipë, me trotriji nyipë, la angatr a tha drengethenge nyipë. Matre hnei nyipëti pë hë hna nenge la hnëjine koi hun, memine la isisinyikeu ka ej ngöne la Trenge Wathebo i Mose, lo hlue ne la nyipi Akötresie, ke hne huni hna ngazo koi nyipë. 12 Hnei nyipëti hna eatrëne lo hnëjin hnei nyipëti hna qaja koi hun, me kowe la itre tane ka musi koi hun,* la nyipëti a axulune koi hun la ketre akötre ka tru; e celë fen, tha hna hane kö traqa la ketre akötr ka tune la akötr ka lepi Ierusalema. 13 Nge tune lo hna cinyanyine ngöne la Trenge Wathebo i Mose, ngacama hna traqa la nöjei akötre cili koi hun, ngo tha hne huni kö hna xëwe koi nyipë Iehova Akötresi hun troa kepe* huni hmaca, qa ngöne la hne hun hna trotrije la itre huliwa hun ka ngazo, me thele troa trotrohnine* la nyipici.*

14 “Celë hi matre, hnei Iehova hna hmekën me axulun koi hun la ngazo, ke ka meköt la nöjei huliwa i Iehova Akötresi hun; ngazo pe, tha hne huni kö hna drei nyidrë.

15 “Haawe, Iehova fe Akötresi hun, atre thepe hun qa Aigupito hnene la ime ka catre i nyipë, me kuca matre hlemu jë la ëje i nyipë uti hë enehila, hne huni hna ngazo koi nyipë me akötrë nyipë. 16 Matre thenge la itre huliwa ka meköt i nyipë Iehova fe, eni a sipo, epi tro la elëhni me trengehni i nyipë a mejë qa Ierusalema, lo traone i nyipë, lo wetre i nyipë ka hmitrötr; ke pine la itre ngazo hun me itre tria ne la itre qaaqaa hun, kolo ha methinë Ierusalema me nöje i nyipë hnene la itre atr ka lapa xötreith. 17 Nge enehila Akötresi huni fe, pane drenge ju la thithi ne la hlue i nyipë me itre xëwe i angeic, nge pine la ëje i nyipë Iehova fe, ahudrumene jë la iqëmeke i nyipë hune la hnë hmi i nyipë hna lep apatren. 18 Pane drei ni ju Akötresinge fe, nge hnangenyëne ju! Fe pi la luemeke i nyipë, goeëne ju la aqane lepi hun, nge goeëne ju fe la traon ka xome la ëje i nyipë; ke tha eahuni kö a xëwe koi nyipë pine la itre huliwa huni ka meköt, ngo pine la etrune la utipine i nyipë. 19 Haawe, Iehova fe pane drenge ju. Iehova fe pane nue pi la itre ngazo hun. Nge Iehova fe wai huni ju, nge kuca jë la ketre ewekë! The hmitre kö, pine la ëje i nyipë Akötresinge fe, ke traone i nyipë me nöje i nyipë a xome la ëje i nyipë.”

20 Eni pala kö a ithanata, me thith, me qajaqaja la ngazong, memine la ngazo ne la nöje Isaraela, me sipo Iehova Akötresing troa kepe ni hmaca, me thithi fë la wetr ka hmitrötr ne la Akötresing, 21 eje hi, ame lo eni pala kö a thith, hnei Gaberiela lo atre hnenge hë hna meköle goeën, hna traqa koi ni, nge ka kucakuca catre ni; kolo hmekune lo hawa ne tro fë huuj e hej. 22 Hnei angeic hna qejepengöne koi ni ka hape:

“Daniela, eni hë la a troa aijijë eö troa atreine thelewekë, me xatua eö troa trotrohnin. 23 Ame ju hi lo eö a nyiqaane xëwe, hnenge hna kapa la ketre maca, me traqa troa thuemacanyi ö, ke eö la ketre atr hna wangatrun.* Haawe, drenge hnyawa ju nge trotrohnine ju la hna meköle goeën.

24 “Ase hë sa la 70 lao wiik* kowe la nöje i ö, me traone i ö ka hmitrötr, matre troa nyipune la itre huliwa ka ngazo, me nue la itre tria,* me acile hutin la meköt, me pelehatrene la hna meköle goeën me perofetan,* me iëne* la Tane La Itre Atr Ka Hmitrötr.* 25 Atre ju nge trotrohnine ju laka, qaane ju hi la kola iup troa acil me xupi Ierusalema hmaca, uti hë la kola traqa la Mesia* lo Atre Köja Gojeny, ke loi e troa pane treqene la 7 lao wiik me 62 lao wiik. Tro hmaca a acile me xup ej, me kuca la ketre götran gaa tru atr, me si hnaope xötreith, ngo eje hi laka, tro ha kuca lai ngöne la ijine akötr.

26 “Nge thupene la 62 lao wiik, tro ha apatrene* la Mesia, nge pëkö hnei nyidrë hna troa xome trongën.

“Nge tro la trongene isi* ne la ketre atre köja gojenyi a traqa troa lep apatrene la traon memine la götran gaa hmitrötr. Nge tro ej a patr jëne la ketre di. Nge tro pala kö a hetre isi uti hë la pun; ngo ase hë axeciën troa iapatreny.

27 “Nge tro nyidrëti a metrötrëne la isisinyikeu koi ca wiik thatraqane la ka ala nyim; nge ame e nyipine wiik, tro nyidrëti a apën la itre huuj me itre ahnahna.

“Nge tro la atre apatren a traqa hune la iap ne la itre ewekë ka sis; nge uti hë la kola iapatreny, tro fe a hane nenge la hna axeciën kowe la atr hna lep apatren.”