Ioela
2 “Ufi trutru jë e Ziona!
Suene jë la sue ne isi ngöne la wetreng ka hmitrötr.
Epi tro la itre atrene la nöj* a hmengöhmengön,
Ke easenyi hë la drai i Iehova! Calemi catre hë!
2 Ketre drai ka jidr me menihao,
Ketre drai ka tru hnei iaw me miti hnin,
Tune la kaqa ne lai hna juetrën hnene la itre wetr.
Hetre ketre nöj ka nyimutre, nge ka catr;
Pëkö ketre nöj ka tune lai qaane ekö,
Nge tha tro hmaca kö a hetre nöj ka tun elany
Uti hë la nöjei xötr epin.
3 Hetre eë ka dreuth asë qëmekei angatr,
Nge hetre ukahlokin eë ka manith asë hutrö i angatr.
Ceitune hi la nöj qëmekei angatr memine la hlapa e Edrena,
Ngo hnapapa pe hi hutrö i angatr, ketre götran hna lep apatren,
Nge pëkö ka troa mele pe.
4 Ceitune hi la ngönetrei i angatr me ngönetrei hos,
Nge angatr a nyenyape tune la itre hos ne isi.
5 Ceitune hi la mejene sesë i angatr, memine la mejene la itre ikariota ne isi hune la itre wetr,
Me tune la mejene eë ka catrehnin, ka manithe la uke qitr.
Ceitui angatr memine la nöj ka catr, ka cile xötrë troa isi.
6 Zöi angatr la kola hnehengazo la itre nöj.
Tro asë hi a wië qatresi la itre iqëmek asë.
7 Angatr a iwej tune la itre ka isi,
Me elëne la ihag tune la itre soc,
Angatr a isa tro meköt qëmekei angatr,
Nge tha jea kö angatr qa ngöne la itre gojeny i angatr.
8 Tha angatre kö a ipeny;
Angatre kö a isa trongëne la itre jë i angatr.
Ngacama hetre ka eatr* maine mec,
Ngo tha enije kö la itre xan qa ngön la göhne i angatr.
9 Angatr a aca tro lö hnine la traon, me nyinyapëne la ihag.
Angatr a elë hune la itre uma, me sesë mamala tune la atrekënö.
10 Qëmekei angatr, kola hmengöhmengöne la nöj me enienije la hnengödrai.
Miti hë la jö memine la treu,
Nge tha hudrume catre hë la itre wëtresij.
11 Tro Iehova a ewekë catr qëmekene la trongene isi i nyidrë, ke ala nyimu catr angatr.
Ke ka men la atre eatrëne la trengewekë i nyidrë;
Eje hi, ka tru la drai i Iehova nge nyine xouen.
Drei la ka atreine xomihnin ej?”
12 “Ame pe, ijine pala kö la, celë hi matre bëeke jë koi ni hnene la hni i epun ka pexej,” öni Iehova,
“The xeni pi kö, treije jë, nge latresi jë.
13 Kuie zezene pi la itre hni i epun, ngo tha itre iheetre kö,
Nge bëeke jë koi Iehova Akötresi epun,
Ke ka itrotrohni nyidrë, me utipin, me hmitre troa elëhni, nge ka tru trenge ihnimi nyipici,
Nge tha tro kö nyidrëti a akötrë* epun tune lo hnei nyidrëti hna mekun.
14 Drei la ka atre? Maine jë, tro nyidrëti a saze mekun* me tha eatrëne lo hnei nyidrëti hna axeciën.
Nge maine jë, tro nyidrëti a amanathithi epun,
Matre ijiji epuni hmaca ha troa tro fë huuj ne wene feja, me waina nyine fii huuj koi Iehova, Akötresi epun.
15 Ufi trutru jë e Ziona!
Iupi* jë troa tha xen, nge ihë jë troa icasikeu.
16 Acasine jë la nöj, nge ahmitrötrëne* jë la icasikeu.
Acasine jë la itre qatr, acasine jë la itre nekönatr me itre medreng.
Epi tro la nekö trahmanyi ka xötrei faipoipo a tro qa ngöne la hnahag ka he hnin, nge tro la föi angeic a tro qa ngöne la hnahage i lue trefën.
17 Nyipine la hnë lö memine la ita ne huuj
Kola treij la itre atre huuj, lo itre ka huliwa i Iehova, me hape:
‘Iehova fe, utipine ju la nöje i nyipë;
The nue kö troa wangacone la edrö i nyipë,
Me nue la itre nöj troa musi hui angeic.
Hnauëne laka, tro la itre nöj a qaja ka hape: “Ekaa ha la Akötresi angatr?”’
18 E cili, tro Iehova a isine* troa thupëne la zi i nyidrë
Nge tro nyidrëti a utipine la nöje i nyidrë.
19 Tro Iehova a sa kowe la nöje i nyidrë ka hape:
‘Tro ni a iupi fë koi epun la itre wene feja, me waina ka hnyipixe, me oel,
Nge tro hë epuni a xeni mej;
Tha tro hmaca kö ni a nue la itre xaa nöj troa wangaconyi epun.
20 Tro ni a ananyine qaathei epuni la atre kolopi;
Tro ni a aije angeic ngöne la hnapapa, ketre götrane gaa qaqacil, nge tha hna lapane kö,
Tro ni a helëne kowe la hnagejë e koië,* la itre soc i angeic ka cile qëmek
Me helëne kowe la hnagejë e kuë,* la itre soc i angeic ka cile hutrö.
Tro ha elë la punepune i angeic,
Nge tro pala hi a elë catre la aqane pi i angeic;
Ke tro ni a kuca la itre ewekë ka tru.’
21 Nöje fe, the xou kö.
Madrine jë nge sue madrine jë, ke tro Iehova a kuca la itre ewekë ka tru.
22 The xou kö, itre öni ne hnitr,
Ke tro ha cia haö la itre hnë axö öni,
Nge tro ha wa la itre sinöe;
Tro la iwacua me ivin a ham atruny.
23 Madrine jë, itre nekö i Ziona, nge madrine jë göne la hna troa kuca hnei Iehova, Akötresi epun;
Ke tro nyidrëti a hamë epun la tim ka ijij jëne la itre pane mani,
Nge tro nyidrëti a ahlupine la imani koi epun,
Ene la itre pane mani me itre mani tixenuë ngöne la macatre, tune ekö.
24 Tro ha tiqa la itre hnë lepe qitr hnei wene feja,
Nge tro ha neni gala la itre hnë weje wene vin hnei waina ka hnyipixe me oel.
25 Nge tro ni a të koi epun lo hna xen ngöne la itre macatre
Hnene la sipa ka xeni menu, me sipa ka hetre iapen, me ka pë iapen, me ka xeni asë,
Eje hi, kolo trongene isi ka tru hnenge hna upe koi epun.
26 Tro hë epuni a xen, nge tro epuni a mej,
Nge tro hë epuni a atrune la ëje i Iehova Akötresi epun,
Lo atre kuca la itre ewekë ka tru koi epun;
Tha tro hmaca kö la nöjeng a hmahma.
27 Nge e cili, tro epuni a atre laka, eni e nyipi Isaraela
Nge eni Iehova Akötresi epun, nge pë ju kö ketre!
Tha tro hmaca kö la nöjeng a hmahma.
28 Thupene lai, tro ni a nue la uang kowe la nöjei pengöne atr.
Nge tro hë la itre nekö i epuni trahmanyi me jajinyi a perofeta
Tro hë la itre qatre i epuni a pu,
Nge tro la itre nekö trahmanyi a meköle goeëne la itre ewekë.
29 Nge tro fe ni a kuca tun kowe la itre hlueng trahmanyi me föe
Tro ni a nue la uang koi angatr ngöne la ijine cili.
30 Nge tro ni a kuca la itre iamamanyikeu e koho hnengödrai me e celë fen,
Tro ha hetre madra, me eë, me so ne eë ka tro draië.
31 Tro ha miti la jö nge tro ha madra la treu
Qëmekene troa traqa la drai i Iehova, drai ka tru nge hna xouen.
32 Nge tro ha amelene la nöjei atr ka hëne la ëje i Iehova;
Eje hi, tune lo hna qaja hnei Iehova, tro ha hetre hna amelen hune la wetre Ziona me e Ierusalema,
Lo itre ka mele pe, hna hën hnei Iehova.”