Numera
24 Ame hë la Balama a öhne laka, aja i Iehova troa amanathithi Isaraela, tha thele hmaca kö angeic troa eji angatr, ngo hnei angeice pe hna thaujë kowe la hnapapa. 2 Nge ame ju hi la Balama a öhne la lapa ne la angetre Isaraela memine la itre tribu i angatr, hnene la ua i Akötresie hna të hui angeic. 3 Matre angeic a sili nyima jë me hape:
“Ame la trengewekë i Balama nekö i Beora,
Ke trengewekë ne la atr hna fe la luemek,
4 Trengewekë ne la atre dreng la hna qaja hnei Akötresie,
Nge ka meköle goeëne la hna amaman hnene la Ka Tru Trenge Men,
Nge ka sa iwatingöneca me goe:
5 Aqane mingöminge la itre itate i ö Iakobo,
Me itre uma maano i ö Isaraela!
6 Tune la itre hnathup,* itre ej a haöthe la itre götrane ka tru,
Kösë itre djardë ezine la hneopegejë,
Kösë itre aloes* hna traan hnei Iehova,
Kösë itre sinö arasi ezine la itre tim.
7 Itre tim pala hi a neni gala qa ngöne la lue treng hna kuca hnei kupeine öni,
Nge hna jum la itin* ej ezin la tim ka tru.
Goi tro fe la joxu i angeic a sisitria hui Agaga,
Nge tro la baselaia i nyidrë a draië.
8 Akötresie a lö sai angeic qa Aigupito;
Ceitui angeic me lue jiane kau wael koi nyidrë.
Tro Isaraela* a öni la itre nöj ka qanangazo angeic,
Tro angeic a heje xeci la itre june i angatr, me apatrenyi angatr hnei itre ane pehna.
9 Meköle hë angeic, nge angeic a saath aqean tune la liona,
Nge drei la ka troa amejëne la liona?
Tro la itre ka amanathithi ö a manathith,
Nge tro la itre ka eji ö a hnëjin.”
10 Ame hnei Balaka hna elëhni koi Balama. Nge angeic a hna catrëne pi la lue ime i angeic, me hape: “Hnenge hna hë eö troa ejine la itre ithupëjiang, ngo pë pena kö hnei eö hna kuca, hnei eö pe hna akönia amanathithi angatr. 11 Haawe, tro hmaca pi kowe la hnalapa i eö, ke eni ekula a mekune troa atrunyi eö, ngo hnei Iehova hna sewe eö troa ketre atr ka tru.”
12 Matre öni Balama koi Balaka ka hape: “Tha ase kö ni lo qaja kowe la itre ka tro fë maca i nyipë ka hape: 13 ‘Maine tro ju hë Balaka a hamëne koi ni la uma i nyidrë ka catr hnei sileva me gool, ngo thatreine kö ni troa kuca la loi maine ngazo, e tha hnei Iehova kö hna upi ni?’ Nge: ‘Tro hmekuje hi ni a qaja la hnei Iehova hna troa upi ni?’ 14 Ngo ame enehila, eni hmaca a bëek kowe la nöjeng. Ngo trohemi pe, ma tro ni a thuemacanyi nyipë la hna troa* kuca hnene la nöje ce kowe la nöje i nyipë.” 15 Matre hnei Balama hna qaja la edromë celë me hape:
“Trengewekë i Balama nekö i Beora,
Nge trengewekë ne la atr hna fe la luemek,
16 Trengewekë ne la atre ka dreng la hna qaja hnei Akötresie,
Me atre kapa la atrehmekune qaathene la Ka Draië Catr,
Lo atre öhne la Ka Tru Trenge Men
Lo angeic a sa watingöneca me goe:
17 Tro ni a öhnyi nyidrë, ngo tha enehila kö;
Tro ni a goeë nyidrë, ngo epine kö.
Tro ha fetra la wëtresij qaathei Iakobo,
Nge tro ha xulu la sine tö qa Isaraela.
18 Nge tro ha thapa la nöje Edroma,
Eje hi, tro Seira a ewekë ne la itre ithupëjia me angeic,
Ngo ame kö Isaraela, tro ej a amaman la aqane catre i angeic.
19 Tro la ketre trahmany ka xulu qaathei Iakobo a mus,
Nge tro angeic a lep apatrene la itre ka mele pe ngöne la traon.”
20 Nge ame hë la Balama a öhnyi Amaleka, angeic a sisedrëne jë la edromë i angeic me hape:
“Amaleka lo pane nöj ekö,
Ngo ame hë la pun kow ej, ke tro ej a patr.”
21 Nge ame hë la angeic a öhne la angetre Keni, angeic a sisedrëne jë la edromë i angeic me hape:
“Ka catre la hnalapa i ö, hna acile la uma i ö hune la git.
22 Ngo tro la ketre trahmany a manith e Keni.
Nge ije macatre pe kö qëmekene tro Asuria a upi epun me xomi epun qa la?”
23 Nge angeic a sisedrëne hmaca la edromë i angeic me hape:
“Ekölöhini pe! Drei la ka troa mel ngöne la ijine tro Akötresie a eatrëne la itre ewekë celë?
24 Nge tro la itre he a xulu qa Kitim,
me lepi Asuria,
me lepi Eberu,
Ngo tro fe a hane lep apatrenyi angeic.”
25 Ame hnei Balama hna bëeke hmaca kowe la zi i angeic. Nge hnei Balaka hna ketre xome la gojenyi angeic.