Deuteronomi

30 “Ame hë la kola eatr la nöjei trengewekë asë celë, ene la manathith me hnëjin hnenge hna amë qëmekei ö, nge ame hë la eö hmaca a mekun* itre ej, nyipine la itre nöj hnei Iehova Akötresi ö hna aisa ije eö, 2 nge e tro hmaca eö a bëeke koi Iehova Akötresi ö, eö me itre nekö i ö, nge maine tro eö a drenge la aqane ewekë i nyidrë hnene la hni i ö ka pexej, me mele i ö ka pexej, thenge la hnenge hna ahnith koi ö ngöne la drai celë, 3 tro hë Iehova Akötresi ö a abëekëne la itre hna kötre fë thei ö, nge tro hë nyidrëti a utipi ö, me acasi ö qa ngöne la itre nöj hnei Iehova Akötresi ö hna aisa ije eö. 4 Nge ngacama hna isa ijene la nöje i ö uti hë la ketre cane la fene hnengödrai, ngo tro hë Iehova a thei ö qa lai, me acasi ö. 5 Tro hë Iehova Akötresi ö a bëeke sai ö kowe la nöj hna thapa hnene la itre keme i ö, nge tro hë eö a lapan ej. Tro nyidrëti a aloinyi ö, me kuca matre ala nyimu kö eö hune lo itre keme i ö. 6 Tro Iehova Akötresi ö a apuiloine* la hni i ö, memine la hni ne la itre matra i ö, nge tro hë eö a hnimi Iehova Akötresi ö hnene la hni i ö ka pexej, me mele i ö ka pexej, matre mele jë eö. 7 Nge tro Iehova Akötresi ö a të la itre hnëjine cili hune lo itre ithupëjia me eö ka methinë eö, nge ka axösisi ö.

8 “Tro hmaca eö a drenge la nine i Iehova, me drengethenge la itre wathebo hnenge hna ahnithe koi ö ngöne la drai celë. 9 Tro Iehova Akötresi ö a amanathithi ö ngöne la nöjei huliwa i ö: tro nyidrëti a kuca matre ala nyimu jë la itre nekö i ö, me itre si i ö, me itre wen ne la hlapa i ö. Tro hmaca Iehova a madrin troa amanathithi ö, tune lo aqane madrine i nyidrë troa amanathithine la itre qaaqaa i ö. 10 Ke tro hë eö a drenge la nine i Iehova Akötresi ö, me drengethenge la itre wathebo me itre hna amekötin hna cinyianyin ngöne la itusi Wathebo celë. Nge tro hmaca eö a bëeke koi Iehova Akötresi ö hnene la hni i ö ka pexej, me mele i ö ka pexej.

11 “Ke tha ka hace kö la wathebo hnenge hna hamë eö ngöne la drai celë; tha ka nanyi kö ej. 12 Tha eje kö e hnengödrai matre tro eö a hape: ‘Drei la ka troa elë e koho hnengödrai troa xom ej koi së, matre tro sa dreng me trongën?’ 13 Nge tha eje kö ngöne la ketre götrane la hnagejë, matre tro eö a hape: ‘Drei la ka troa thupa la hnagejë troa xom ej koi së, matre tro sa dreng me trongën?’ 14 Ke eje thei ö la trengewekë, ngöne la që i ö, me ngöne la hni i ö, matre tro eö a trongën.

15 “Goeën: ngöne la drai celë, eni a amë qëmekei ö la mel me loi, me mec me hnëjin. 16 Maine tro eö a drenge la itre hna amekötin hnei Iehova Akötresi ö, hnenge hna hamë eö ngöne la drai celë, ene la troa hnimi Iehova Akötresi ö, me trongëne la itre jë i nyidrë, me drengethenge la itre wathebo, me itre hna amekötin, me itre hna ahnith, ke tro hë eö a mel me mana. Nge tro hë Iehova Akötresi ö a amanathithi ö ngöne la nöj hnei ö hna troa thapa.

17 “Ngo maine tro la hni i ö a iananyi me Akötresie, nge xele kö eö ma dreng, nge kola huli ö troa thil me nyihluen la itre xaa haze, 18 eni a qaja koi ö ngöne la drai ce, tro hë eö a mec. Tha tro kö eö a mel aqeany ngöne la nöj hnei ö hna troa thapa ngöne la ketre götrane la hneopegejë Ioridrano. 19 Haawe, eni hë la a qaja koi ö qëmekene la hnengödrai me ihnadro laka, hnenge hna amë qëmekei ö la mel me mec, me manathith me hnëjin; nge qa i ö troa iën la mel, matre mele pi ö me itre matra i ö, 20 qa ngöne la hnei ö hna hnimi Iehova Akötresi ö, me drenge la nine i nyidrë, me fedre koi nyidrë; ke nyidrëti hi la mele i ö, nge jëne nyidrë, tro eö a mel aqeanyi ngöne la nöj hnei Iehova Akötresi ö hna sisiny troa hamën kowe la itre qaaqaa i ö, ene Aberahama, me Isaaka, me Iakobo.”