Amosa
1 Hane hi la itre trengewekë i Amosa,* ketre atre thupë mamoe qa Tekoa. Hnei Amosa hna kapa la itre trengewekë cili göi Isaraela, ngöne lo ijine mus i Uzia joxu ne Iudra, me Ieroboama nekö i Ioasa joxu ne Isaraela, lue macatre qëmekene troa traqa la sa. 2 Öni angeic:
“Qaa Ziona, tro Iehova a ho tune la liona,
Nge qaa Ierusalema, troa mexem la nine i nyidrë.
Tro ha hnëmec la itre hna axö öni ne la itre ka thupë mamoe,
Nge tro ha qaqacile la he ne wetr e Karemela.”
3 “Hane hi la hna qaja hnei Iehova:
‘“Pine laka, hnei Damaseko hna anyimua icilekeu,* tha tro kö ni a saze mekun,
Ke hnei angatre hna lepi Gileada, tune la kola lepelepe qitr hnene la itre ikatre fao.
4 Tro hë ni a upe la eë kowe la hnanyijoxu i Azaela,
Nge tro ej a dreuthetrije la itre ita ne thup hna eköhagene i Benadada.
5 Tro ni a thöne la itre agö ka acatrene la itre qëhnelö ne Damaseko;
Tro ni a humuthe la itre atrene Bikath-Aven
Memine la atre musi* e Beth-Edena.
Nge tro ha xome la itre atr qaa Suria a tro Kira,” öni Iehova.’
6 Hane hi la hna qaja hnei Iehova:
‘“Pine laka, hnei Gaza hna anyimua icilekeu,* tha tro kö ni a saze mekun,
Ke hnei angatr hna nue koi Edroma lo itre atr hnei angatr hna kötre fë.
7 Tro hë ni a upe la eë kowe la ihag atraqatr ne Gaza,
Nge tro ej a dreuthetrije la itre ita ne thup hna eköhagen.
8 Tro ni a humuthe la itre atrene Asedoda,
Memine la atre musi* e Asekelona;
Tro ni a të koi Ekerona,
Nge tro ha meci la angetre Filisiti ka mele pala kö,” öni Iehova Joxu Ka Sisitria.’
9 Hane hi la hna qaja hnei Iehova:
‘Pine laka, hnei Turo hna anyimua icilekeu,* tha tro kö ni a saze mekun,
Ke hnei angatr hna nue koi Edroma lo itre atr hnei angatr hna kötre fë,
Nge thëthëmine hë angatr la isisinyikeu ne la itre trejin.
10 Tro hë ni a upe la eë kowe la ihag atraqatr ne Turo,
Nge tro ej a dreuthetrije la itre ita ne thup hna eköhagen.’
11 Hane hi la hna qaja hnei Iehova:
‘Pine laka, hnei Edroma hna anyimua icilekeu,* tha tro kö ni a saze mekun,
Ke hnei angeic hna wej me taua la trejin me angeic,
Nge pëkö utipine i angeic;
Ngöne la elëhni, tha mano kö angeic hej angazonyi angatr,
Nge goi tha lapa kötre fe la elëhni i angeic koi angatr.
12 Tro hë ni a upe la eë kowe la ihag atraqatr ne Temana,
Nge tro hë ej a dreuthetrije la itre ita ne thup hna eköhagen e Bozera.’
13 Hane hi la hna qaja hnei Iehova:
‘“Pine laka, hnei Amona hna anyimua icilekeu,* tha tro kö ni a saze mekun,
Ke hnei angatr hna kuluhmathe la hni ne la itre föe ka upune ne Gileada göi troa atrune la nöje i angatr.
14 Tro hë ni a upe la eë kowe la ihag atraqatr ne Raba,
Nge tro hë ej a dreuthetrije la itre ita ne thup hna eköhagen,
Ngöne la ijine kola sue ne isi,
Nge kola traqa la udreli ngöne la drai ne wene.
15 Nge tro ha kötre fë la joxu me itre nekö i joxu i angatr,” öni Iehova.’