Amosa
7 Hane hi la hna amamai ni hnei Iehova Joxu Ka Sisitria: Hnei nyidrëti hna xupe la iume sipa ngöne lo ijine kola nyiqaane cia la itre feja hna traane ngöne la ijine hnötr,* lo itre hna traane thupene la kola thupe haö i joxu. 2 Thupene la kola ase xeni asë la nöjei feja ne la nöj hnene la iume sipa, öninge jë hi: “Iehova fe Joxu Ka Sisitria, epi tro nyipëti a nue la ngazo ne la nöje i nyipë! Pëhë trengecatre i Iakobo, matre tro pë hë angeic a mele* tune kaa?”
3 Ame hnei Iehova hna saze mekun, öni Iehova: “Tha tro jë kö lai a traqa.”
4 Hane hi la hna amaman koi ni hnei Iehova Joxu Ka Sisitria: Hnei Iehova Joxu Ka Sisitria, hna hëne la eë matre amekötine la nöje i nyidrë. Hnen ej hna aqaqacilën la hnagejë ka tru nge ka jui, me manithe la ketre götran ne la nöj. 5 Matre öninge jë hi: “Iehova fe Joxu Ka Sisitria, pane cile ju. Pëhë trengecatre i Iakobo, matre tro pë hë angeic a mele* tune kaa?”
6 Ame hnei Iehova hna saze mekun, öni Iehova Joxu Ka Sisitria: “Tha tro jë kö lai a traqa.”
7 Hane hi la hnei nyidrëti hna amamane koi ni: Iehova a cile hune la ketre ngöne uma hna xupe jëne la tulu ne acil.* Nge nyidrëti a ea la tulu cili ngöne la iwanakoime i nyidrë. 8 Ame hnei Iehova hna hnyingë ni ka hape: “Amosa, nemene la hnei ö hna öhn?” Öning: “Ketre tulu ne acil.” Matre öni Iehova hmaca jë hi: “Tro ni a amë la tulu ne acil nyipi Isaraela nöjeng. Tha tro hmaca kö ni a nue la itre ngazo i angatr. 9 Tro ha apatrene la itre hnë hmi gaa hmitrötre i Isaaka, me lep apatrene la itre uma hmitrötr e Isaraela. Nge tro ni a lepe hnei taua la fami i Ieroboama.
10 Ame hnei Amazia atre huuj e Bethela, hna iupi fë maca koi leroboama joxu ne Isaraela. Öni angeic: “Amosa a icilekeu me nyipë nyipine la nöje Isaraela. Thatreine hë la nöj xomihnine la itre trengewekë i angeic. 11 Ke hane hi la hna qaja hnei Amosa: ‘Tro Ieroboama a meci hnei taua, nge tro ha xomi Isaraela qa ngöne la nöje i angeic.’”
12 Öni Amazia koi Amosa: “Tro jë, atre qeje pu, kötre pi kowe la nöje Iudra. Huliwa jë e cili matre hetre falawa* i ö, nge tro jë troa perofeta e cili. 13 Ngo tha tro hmaca kö eö a perofeta e Bethela, ke e cili hi la hnë hmi i joxu, me uma ne hmi ne la ketre baselaia.”
14 Matre öni Amosa jë hi koi Amazia: “Tha ka perofeta kö ni ekö, nge tha ka perofeta fe kö la kemeng. Ngo eni lo a thupë öni me nyidrawane* la itre iwacua sukamore. 15 Nge ame lo eni a thupëne la itre mamoe, hnei Iehova hna hë ni, öni Iehova: ‘Tro jë troa perofeta koi Isaraela nöjeng.’ 16 Haawe ame enehila, drenge ju la hna qaja hnei Iehova: ‘Öni ö: “The perofetane kö la hnëjin kowe la nöje Isaraela, nge the cainöjëne kö la maca ne iameköti kowe la itre matra i Isaaka.” 17 Ngo hane pe la hna qaja hnei Iehova: “Tro la föi ö a föe ne gojenyi ngöne la traon, nge tro ha humuthe hnei taua la itre nekö i ö trahmanyi me jajiny. Tro ha thawa la itre zi i ö hnei eno ne tuluth. Nge ame eö, tro pë hë eö a meci ngöne la nöj ka pui ngazo. Nge tro ha xomi Isaraela qa ngöne la nöje i angeic.”’”