Amosa
9 Ame hnenge hna öhnyi Iehova hune la ita ne huuj, öni nyidrë: “Lepe jë la hen* ne la itre ikapa, nge tro ha enienije la trepen. Thupa pi la itre hen,* nge tro hë ni a humuthe hnei taua la itre ka mele pe. Ame thene la itre ka kötr, pëkö ala casi ka troa kötre gaa nany, nge pëkö ka troa mele pe.
2 Maine tro angatr a sine la dro uti hë la Hua,*
Tro kö la imeng a xomi angatre qaa lai;
Nge maine tro angatr a elë a tro hnengödrai,
Tro kö ni a autinyi angatre qaa lai.
3 Maine tro angatr a zae hune la wetre Karemela,
Tro hë ni a thele angatr me huli angatre qaa lai.
Nge maine tro angatr a zae ni e kuhu trepene la hnagejë,
Tro hë ni a upe la un troa heji angatr.
4 Maine troa xomi angatr kowe la nöj ne la itre ithupëjia,
Tro hë ni a up e cili la taua troa humuthi angatr;
Tro hë ni a goeëtili angatr matre axulune la ngazo, ngo tha ewekë ka loi kö.
5 Ke tro Iehova Joxu Ka Sisitria, me joxu ne la itre trongene isi e hnengödrai a ketr la nöj,*
Matre tro ej a hmu, nge tro la itre atren a hnëmec;
Tro la nöj a elë tune la timi ne la hneopegejë Nil,
Me uti hmaca tune la hneopegejë Nil e Aigupito.
6 ‘Ame la atre xupi eskalie e koho hnengödrai
Me xupe la uma ka draië* i nyidrë hune la ihnadro,
Lo atre hëne la itre timi ne hnagejë,
Matre nenge hmaca hune la ihnadro
Ke Iehova la ëje i nyidrë.’
7 Öni Iehova: ‘Nöje Isaraela fe, tha ceitui epuni kö memine la itre nekö ne la angetre Aithiope* koi ni?
Tha hnenge kö lo hna thepe Isaraela qa Aigupito,
Me Filisiti qa Kafetori, me Suria qa Kira?’
8 ‘Dreng! Tro la luemeke i Iehova Joxu Ka Sisitria a goeëne la baselaia ka kuca la ngazo
Me apatren ej qa ngöne la nöj.
Ame pe, tha tro kö ni a apatren asë la itre matra i Iakobo,’ öni Iehova.
9 ‘Ke tro hë ni a amekötine la,
Me jumejume la nöje Isaraela nyipine la itre xaa nöj,
Tune la kola jumejume la ketre itami,
Nge pëkö ca wene etë ka troa mala e kuhu hnadro.
10 Tro ha meci hnei taua la itre atrene la nöjeng ka kuca la ngazo,
Lo itre ka qaja ka hape: “Tha tro kö la hnëjin a easeny me traqa koi së.”’
11 ‘Ngöne la drai cili, tro ni a acile hmaca la ihmelekap* i Dravita ka kei,
Tro ni a pelethe la itre gaa kaqa,*
Me xupe hmaca la ka kei;
Tro ni a xup eje hmaca tun ekö,
12 Matre tro angatr a thapa la ka lapa pe e Edroma,
Memine la nöjei nöj ka xome la ëjeng,’ öni Iehova, atre eatrëne lai.
13 ‘Dreng!’ öni Iehova, ‘tro ha traqa la drai
Ne tro hmaca kö la ka uja dro a ea la atre menuën,
Nge tro hmaca kö la ka wejeweje wene rezë a ea la ka jumi feja;
Tro ha neni gala la waina ka menyik qa ngöne la itre wetr,
Nge tro fe ej a neni qa ngöne la itre sasala.*
14 Tro ni a abëekë Isaraela, lo nöjeng hna oth,
Nge tro hë angatr a xupe hmaca me lapan lo itre traon hna nuetrij;
Tro hë angatr a traa vin, me iji waina,
Tro hë angatr a eëny, me xeni wen.’
15 ‘Tro ni a traa angatr ngöne la zi i angatr,
Nge tha tro hmaca kö a fejetriji angatr
Qa ngöne la götran hnenge hna hamë angatr,’ öni Iehova Akötresi ö.”