Zefania
3 Ekölöhini lo traon ka icilekeu, ka dro, me ka iakötrë!
2 Pëkö ca hnei angeic hna dreng, tha kapa kö angeice la ihaji.
Tha hnei angeice kö hna mejiune koi Iehova, tha hnei angeice kö hna easenyine la Akötresi angeic.
3 Ceitune hi la itre nekö i joxu nyipi angeic, me itre liona ka ho.
Ceitune hi la itre atre iameköti i angeic, me itre luko ka thele tha e jidr;
Goi pë fe ca jun nyine öni hna amë kowe la hmakany.
4 Ka pë metrötr me iaö la itre perofeta i angeic.
Itretre huuje i angeic a apuingazon la ewekë ka hmitrötr;
Angatr a ena la wathebo.
5 Ka meköti Iehova nyipi angeic; pëkö ngazo hnei nyidrëti hna kuca.
E nöjei hmakany, nyidrëti pala hi a amaman la itre hna amekötin,
Tune la kola fetra la jö e nöjei drai.
Ngo thatre kö la atr ka tha meköti kö, la hmahma.
6 “Hnenge hna lep apatrene la itre nöj; hna thëtrije la itre ita ne thupe i angatr hna eköhagen.
Hnenge hna apatren la itre gojeny i angatr matre pëhë ka trongën.
Tra etë pe hi la itre traone i angatr; pëhë atr nge pëhë ka lapan.
7 Öninge jë hi: ‘Tro hë eö lai a xoue ni me kapa la ihaji.’
Ngo matre tha tro kö a apatrene la hnalapa i angeic
Loi e tro ni a ameköti* angeic pine la itre ewekë cili.
Ngazo pe, pi tro catre kö angatr a huliwa qenatrekënö.
8 ‘Celë hi matre, treqe ni ju,’* öni Iehova,
‘Uti hë la drai ne tro ni a mejë troa atrekënö,*
Ke hnenge hna amekötin troa icasinekeun la itre nöj, me acasin la itre baselaia,
Matre nenge hui angatre la elëhning me trenge hning;
Ke tro ha dreuth asë la ihnadro hnene la trenge ajang.
9 Ke tro hë ni a saze la qene hlapa ne la itre nöj kowe la qene hlapa ka wië,
Matre tro angatr asë a atrune* la ëje i Iehova,
Me cas troa nyihlue i nyidrë.’
10 Qa ngöne la itre hneopegejë ne Aithiope,
Tro ha traqa fë ahnahna koi ni hnene la itre ka xëwe koi ni, ene la nekö* ne la itre hnenge hna aijen.
11 Ngöne la drai cili, tha tro hmaca kö eö a hmahma
Pine la itre huliwa ne icilekeu i ö,
Ke tro ni a xometrij qaathei ö la itre ka pi tru me ka selë angatr;
Nge tha tro hmaca kö eö a pi tru ngöne la wetreng ka hmitrötr.
12 Tro ni a amë nyipi ö la ketre nöje ka ipië nge ka menyik,
Nge tro angatr a kötre zae ngöne la ëje i Iehova.
13 Tha tro kö la itre ka lapa pe e Isaraela a kuca la ewekë ka tha meköti kö;
Tha tro kö angatr a thoi; nge tha tro kö a hetre thinem ka iaö ngöne la itre që i angatr;
Tro hë angatr a xen* me meköl, nge pëkö ka troa axouenyi angatr.”
14 Nekö jajiny ne Ziona fe, sue madrine jë!
Isaraela fe, sue jë hnei madrin!
Madrine jë nekö jajiny ne Ierusalema, madrine jë hnene la hni i ö ka pexej!
15 Ase hë Iehova xometrije lo itre hna amekötin göi ö.
Hnei nyidrëti hna lep abëekën la ithupëjia me eö.
Iehova Joxu ne Isaraela, e nyipi ö.
Tha tro hmaca kö eö a xouen la akötr.
16 Ngöne la drai cili, tro hë sa qaja koi Ierusalema:
“The xou kö Ziona.
The kucakuca kö eö.*
17 Iehova Akötresi ö e nyipi ö.
Tro nyidrëti a amele eö, ke Akötresie ka catr.
Tro ha tru la madrine i nyidrëti koi ö.
Tro la ihnim i nyidrëti koi ö a thue madrin* koi nyidrë.
Tro nyidrëti a madrine koi ö me sue madrin.
18 Tro ni a icasinekeun la itre ka treije pine lo itre feete i ö;
Hna kötre sai angatr qaathei ö, nge kola hnyimasai angatr.
19 Goeën! Ngöne la ijine cili, tro ni a cil kowe la itre ka axösisi ö;
Tro ni a amelen la itre ka peje ca,
Nge tro ni a acasin la itre hna ijen.
Tro ni a kuca matre hlemu* jë angatr me atrunyi angatr
Ngöne la nöj hna ahmahmanyi angatr.
20 Ngöne la ijine cili, tro ni a alö epun;
Ngöne la ijine cili, tro ni a acasi epun.
Ke tro ni a kuca matre hlemu* jë epun me atrunyi epun nyipine la nöjei nöj e celë fen,
Ngöne la eni a troa abëekën la itre hna kötre fë qëmekei epun,” öni Iehova.