Esodro
2 Ngöne la ijine cili, hnene la ketre trahmanyi ne la tribu ne Levi, hna xomi föe, nge casi hi la tribu i nyidro. 2 Matre hnene la föe hna upune, me hnaho trahmany. Ngo ame hë la angeic a öhne laka, mingöminge catre nyën, hnei angeic hna juetrë nyëne koi köni treu. 3 Nge ame hë la kola jole troa juetrë nyën, angeic a xome ju la ketre treng* hna kuca hnei rozo, me köle hnei koltar ka hmekön me ka hmu. Thupene lai, angeic a amë ju la nekönatr e kuhu hnin, me nue lai treng troa manij nyipine la itre rozo ka cia ezine la Nil. 4 Nge hnene la xa ne lai nekönatr hna nango cil ananyi nyën, me wange la ka troa traqa koi nyën.
5 E thupen, hnene la nekö i Farao jajiny hna uti troa si ngöne la Nil. Nge itre hlue i eahlo a tro ezine la Nil. Matre ame la eahlo a öhne lai treng nyipine la itre rozo, eahlo a canga upe jë la hlue i eahlo troa xom. 6 Nge eahlo a fe me öhn la nekönatr a kola treij, eahlo a utipi nyën me hape: “Neköi angetre Heberu la.” 7 Ame hnene la xa ne la nekönatr hna qaja kowe la nekö i Farao jajinyi ka hape: “Aja i eapo kö tro ni a thele la ka troa ithuane la nekönatr thei angetre Heberu, matre iji thi nyën?” 8 Matre önine la nekö i Farao jajinyi ka hape: “Tro jë.” Ame hnene la nekö jajiny hna canga tro troa thenge la thinene lai nekönatr. 9 Matre önine la nekö i Farao jajinyi ka hape: “Xome jë la nekönatr, nge ithua i nyëne jë, nge tro ni a nyithupei eö.” Matre hnene lai föe hna xome lai nekönatr, me iji thi nyën. 10 Nge ame hë la nyën a nango tru, hnene lai föe hna tro sai nyën kowe la nekö i Farao jajiny, nge eahlo a xome jë nyine nekö i eahlo me ati ëjen, Mose,* ke öni eahlo: “Ke hnenge hna amele nyën qa ngöne la tim.”
11 Nge ame hë la Mose a tru,* hnei angeic hna tro troa wang la itre trejine me angeic. Nge angeic a öhne la itre trejine me angeic a kuca la itre huliwa ka hace. Nge öhne ju fe hi angeice la ketre atre Aigupito e lepe la atre Heberu, ketre trejin me angeic. 12 Ame la angeic a öhne laka pëkö ka öhnyi angeic, angeic a humuthe pi la atre Aigupito, me kelemi angeic hnine la ngöni.
13 Ngöne la drai thupen, angeic a tro hmaca jë, nge traqa ju hi angeic a öhne la lue atre Heberu a kola isi. Matre öni angeic kowe la ka thele isi: “Hnauëne la eö a lepe la sine i eö?” 14 Ngo önine lai atr: “Drei la atre acili eö troa joxu, me atre ameköti hun? Eö a hane pi humuthi ni, tune lo aqane kuca i eö kowe la atre Aigupito?” Matre xou i Mose ju hi, nge öni angeic: “Atre fe hë angatr la ka traqa.”
15 E thupen, drei mejene hë Farao la hna kuca hnei Mose, matre hnei nyidrëti hna thele troa humuthi Mose. Ngo hnei Mose hna kötr ananyi Farao, me tro kowe la nöj i angetre Midiana, me lapa e cili. Nge ame hë la angeic a traqa, angeic a lapa ju ezine la hnë tha tim. 16 Nge ame lai atre huuj ne Midiana, 7 lao nekö i angeice jajiny. Angatr a traqa troa tha tim, me nyialiene la itre trepene tim, troa ithue imene la itre öni ka co ne la keme i angatr. 17 Ngo hna majemine helë angatr hnene la itre ka thupë öni, matre hnei Mose hna isigöli* angatr, me thue imene la itre si angatr ka co. 18 Nge ame hë la angatr a traqa koi Reuela* keme i angatr, nyidrëti a sesëkötr me hape: “Hnauëne laka, hnei epuni hna canga bëek?” 19 Öni angatr: “Hnene la ketre atre Aigupito hna isigöli hun qëmekene la itre ka thupë öni. Nge hnei angeice fe hna tha timi koi eahun, me thue imene la itre öni ka co.” 20 Matre öni nyidrë kowe la itre nekö i nyidrëti jajiny: “Ekaa pë hë angeic? Hnauëne la epuni a nue angeic e cili? Tro jë a hë angeic troa ce xeni me easë.” 21 Thupene lai, Mose a kapa ju troa lapa thei Reuela, nge nyidrëti a hamë Zipora jë nekö i nyidrë, troa föi Mose. 22 E thupen, Zipora a hnahone jë la nekö trahmany, nge Mose a ati ëjene jë, Geresoma,* ke öni angeic: “Trenyiwa ni ngöne la nöje trenyiwa.”
23 Itre hnepe ijine thupen,* meci pi hi la joxu ne Aigupito. Ngo kolo pala hi a treij hnei angetre Isaraela, me hokötr pine la hna folosa angatr. Nge itre treije i angatr a elë kowe la nyipi Akötresie. 24 Nge drenge hë Akötresie la itre treije i angatr, nge nyidrëti hmaca a mekune lo isisinyikeu i nyidrë me Aberahama, me Isaaka me Iakobo. 25 Nge hnei Akötresieti hna nyipine la angetre Isaraela, nge öhne hë nyidrë la akötre i angatr.