Numera
32 Nyimutre hë la itre öni ne la itre nekö i Reubena me itre nekö i Gada. Nge öhne hë angatr laka, ame la nöje Iazera me Gileada, ke nöje gaa loi thatraqane la itre öni. 2 Matre hnene la itre nekö i Gada me itre nekö i Reubena hna tro troa wai Mose, me Eleazara atre huuj, me itre tane la nöj, nge öni angatr ka hape: 3 “Ame la itre götran e Atarotha, me Dibona, me Iazera, me Nimera, me Hesebona, me Eleala, me Sebama, me Nebo, me Beona, 4 lo nöj hnei Iehova hna lep qëmekene la nöje Isaraela, ke nöje gaa loi thatraqane la itre öni. Nge nyimutre la itre öni ne la itre hlue i nyipë.” 5 Nge öni angatre hmaca jë hi ka hape: “Maine nyipëti a kepe hun, epi tro nyipëti a hamëne la nöje celë kowe la itre hlue i nyipë. Ngo the upi huni kö troa sasaithe la hneopegejë Ioridrano.”
6 Matre öni Mose kowe la itre nekö i Gada me itre nekö i Reubena ka hape: “Hapeu, tro kö la itre trejin me epun a tro troa isi, nge epuni pë hë a lapa e celë? 7 Hnauëne laka, tro epuni a akucakucane la nöje Isaraela troa sasaithe la hneopegejë Ioridrano, matre lö kowe la nöj hnei Iehova hna mekun troa hamë angatr? 8 Celë hi hna kuca hnene lo itre keme i epun, lo eni a upi angatr troa tro Kadesi-banea, matre waipengöne la nöj. 9 Ame la angatr a tro kowe la hnathup e Esekolo me goeëne la nöj, hnei angatr hna akucakucane la nöje Isaraela troa lö kowe la nöj hnei Iehova hna troa hamë angatr. 10 Matre ngöne la drai cili, hnei Iehova hna elëhni koi angatr, me sisiny ka hape: 11 “Ame la itre trahmany ka tro qa Aigupito, nge ka 20 lao macatre a tro draië, ke tha tro kö angatr a öhne la nöj, lo hnenge hna sisinyi koi Aberahama, me Isaaka, me Iakobo, ke tha hnei angatre kö hna nyipi drengethenge ni, 12 ngo tro hmekuje hi Kaleba, nekö i Iefune atre Kenaza, me Iosua nekö i Nuna, ke hnei nyidroti hna nyipi drengethenge Iehova.” 13 Matre hnei Iehova hna elëhni kowe la angetre Isaraela, nge hnei nyidrëti hna nue angatr troa trongëne la hnapapa koi 40 lao macatre, uti hë la kola patre asë la xötr ka kuca la ngazo qëmekei Iehova. 14 Nge enehila, epuni a nyitipune la itre keme i epun, kösë itre atr ka ngazo ka amejëne la trengehni i Iehova koi Isaraela. 15 Nge maine tro epuni a cil troa xötrethenge nyidrë, tro hë nyidrëti a nue la angetre Isaraela ngöne la hnapapa. Nge maine troa patr la nöje celë, ke epuni la atrekëzön.”
16 Matre ame hë e thupen, hnei angatr hna tro troa qaja koi Mose ka hape: “Pane nue huni pi troa xupi hag kowe la itre öni hun, me itre traon thatraqane la itre nekö hun. 17 Ngo ame kö hun, tro huni a hnëkë troa isi, nge tro huni a tro qëmekene la angetre Isaraela, uti hë la troa lö sai angatr ngöne la götrane hna hnëkën thatraqai angatr. Ngo ame la itre nekö hun, tro pë angatr a lapa ngöne la itre traon hna eköhagen, matre thupë angatr qa ngöne la itre atrene la nöj. 18 Tha tro kö huni a bëek, e tha hna pane hamëne kö kowe la angetre Isaraela asë, la isa zi i angatr nyine edrö. 19 Nge tha tro kö huni a ce kepe edrö me angatr, ngöne la götrane kuë ne la hneopegejë Ioridrano, ke edrö hun la götrane koië ne la hneopegejë Ioridrano.”
20 Nge öni Mose koi angatr ka hape: “Maine tro epuni a kuca la ewekë celë, ene la troa xomi jia ne isi qëmekei Iehova, 21 maine tro epuni asë a isa xomi jia ne isi me sasaithe la hneopegejë Ioridrano qëmekei Iehova, nge tro nyidrëti a helëne la itre ithupëjia 22 uti hë la troa thapa asë la nöj qëmekei Iehova, e cili ijiji epuni hë troa bëeke hmaca, nge tha tro kö a hetre ngazo i epun qëmekei Iehova me Isaraela. Qa ngöne lai, tro hë la nöje cili a edrö i epun qëmekei Iehova. 23 Ngo e tha kuca kö epuni lai, hetre ngazo epuni hë qëmekei Iehova. Ngo lapa atre ju laka, tro kö epuni a xeni pune la ngazo hnei epuni hna kuca. 24 Haawe, ijiji epuni hë troa xupe la itre traon thatraqane la itre nekö i epun, me itre ihag thatraqane la itre öni ka co i epun. Ngo qa i epuni pe troa eatrëne la hnei epuni hna sisiny.”
25 Matre hnene la itre nekö i Gada me itre nekö i Reubena, hna qaja koi Mose ka hape: “Tro la itre hlue i nyipë a kuca thenge la hnei nyipëti hna amekötine koi hun. 26 Tro la itre nekö hun, me itre föi eahun, me itre si hun, me nöjei öni huni ka mem, a lapa e celë ngöne la itre traon e Gileada. 27 Ngo tro kö la itre hlue i nyipëti a sasaithe la hneopegejë Ioridrano, ene la nöjei trahmany ka ajö jia ne isi, matre troa isi qëmekei Iehova, tune lo hnei nyipëti hna amekötin.”
28 Ame hnei Mose hna amekötin la ketre ewekë koi Eleazara, me koi Iosua nekö i Nuna, me kowe la itre tixe ne la itre lapa ne la itre tribu ne Isaraela göne la pengö i angatr. 29 Öni Mose koi angatr ka hape: “Maine tro la itre nekö i Gada me itre nekö i Reubena a ce sasaithe me epun la hneopegejë Ioridrano, ene la nöjei trahmany ka ajö jia ne isi matre troa isi qëmekei Iehova, nge maine tro epuni a thapa la nöj, ke qa i epun troa hamë angatre la nöje Gileada nyine zi i angatr. 30 Ngo maine tha angatre kö a ajö jia ne isi, me ce sasaithe me epuni la hneopegejë Ioridrano, ke tro pë hë angatr a ce lapa me epun ngöne la nöje Kanana.”
31 Ame hnene la itre nekö i Gada me itre nekö i Reubena hna sa ka hape: “Tro huni a kuca thenge lo hnei Iehova hna amekötin kowe la itre hlue i nyipë. 32 Tro huni a ajö jia ne isi, me sasaithe la hneopegejë Ioridrano, me lö kowe la nöje Kanana qëmekei Iehova. Ngo ame kö la edrö hun, ke ngöne la götrane celë ne la hneopegejë Ioridrano.” 33 Ame hnei Mose hna hamëne la itre götrane i Sihona, joxu i angetre Amora, memine la itre götrane i Oga, joxu ne Basana, ene la nöj asë, memine la nöjei traon xötreith ej kowe la itre nekö i Gada, me itre nekö i Reubena, me kowe la sine la tribu i Manase, lo nekö i Iosefa.
34 Nge hnene la itre nekö i Gada hna acile* la itre traon, ene Dibona, me Atarotha, me Aroera, 35 me Aterotha-Sofana, me Iazera, me Iogebea, 36 me Bethe-Nimera me Bethe-Harana, itre traon hna eköhagen. Nge hnei angatre fe hna acili itra etë nyine hag thatraqane la itre öni ka co i angatr. 37 Nge hnene la itre nekö i Reubena hna acile la itre traon, ene Hesebona, me Eleala, me Kirathaima, 38 me Nebo, me Baala-Meon—hna saze la ëjen la lue traon cili—me Sibema; Nge angatr a ati ëjene jë la itre traon hnei angatr hna acile hmaca.
39 Hnene la itre nekö i Makiri, nekö i Manase, hna tro troa isi e Gileada, me thapa la nöj, me helëne la angetre Amora ka lapa e cili. 40 Matre Mose a hamëne pi la nöje Gileada koi Makiri nekö i Manase, nge hnei angeic hna lapa e cili. 41 Ame hnei Iaira nekö i Manase, hna thapa la itre neköi traone* i angatr, me ati ëjen Havoth-Iaira.* 42 Nge hnei Noba hna thapa la nöj e Kenatha me itre traon ezin, me ati ëjen hnene la sipu ëje i angeic: Noba.