Pane Tus Samuela
14 Ngöne la ketre drai, hnei Ionathana nekö i Saulo, hna qaja kowe la hlue i angeic ka ajö jia ne isi ka hape: “Jë fe, nyiso a tro kowe la pane xötre soc i angetre Filisiti.” Ngo tha hnei Ionathana kö hna thuemacane la keme i angeic. 2 Saulo a lapa fene lo igrenad* e Migeron, ezine Gibea, nge ce angeic me 600 lao soc. 3 (Ahia a fena la iefoda.* Angeic la nekö i Ahituba, lo trejin me Ikaboda, lo nekö i Fineasa, lo nekö i Eli, lo atre huuj i Iehova e Silo.) Nge thatre kö la itre soc ka hape, patre hë Ionathana. 4 Nge ame la gojenyi hnei Ionathana hna mekune troa xötrën, matre traqa pi kowe la pane xötre soc i angetre Filisiti, tre, kola tro nyipine la lue git, kösë lue nyö. Ame la ëjene la ketre git tre, Bozez, nge Sene la ketre. 5 Ame la ketre git, ej a cil kösë ketre sine feni e kolopi qëmekene Mikemas. Nge ame la ketre, eje a cil e kolojë qëmekene Geba.
6 Matre öni Ionathana kowe la hlu ka ajö jia ne isi ka hape: “Jë fe, nyiso a tro kowe la pane xötre soc hna tha xötrehatren.* Ma tro jë Iehova a hnimi nyiso, ke pëkö ka atreine sewe Iehova troa iamele, ngacama ala nyimu ju hë maine ala xalaithe hi.” 7 Sa jë hi lai hlu ka hape: “Qanyi eö kö, trongëne jë la jë i eö, nge ame la nöjei jë i eö, ke jënge fe hi lai.” 8 Öni Ionathana jë hi: “Tro nyiso a tro kowe la itre atre cili, me iamamanyi koi angatr. 9 Nge e öni angatre jë: ‘The enije kö, ke eahuni hë lai!’ Haawe, tro hë nyiso a cil e cili, tha tro kö nyiso a elë koi angatr. 10 Ngo e öni angatre ka hape: ‘Elë jë koi hun!’ Haawe, hatrene lai koi nyiso. Tro hë nyiso a elë, ke tro kö Iehova a nue angatr koi nyiso.”
11 Nyidroti a iamamanyi jë kowe la pane xötre soc i angetre Filisiti. Matre öni angatre ka hape: “Goeë angetre Heberu, fetra ha lo itre ka zae qa kuhu hnaop.” 12 Thupene lai, önine la pane xötre soc i angetre Filisiti koi Ionathana me hlue i angeic: “Elë jë koi hun, nge tro huni a pane ini epon!” Matre öni Ionathana kowe lai hlu: “Jë fe, tro Iehova a nue angatr koi angetre Isaraela.” 13 Ame hnei Ionathana hna elëne la git hnei lue ca me lue im. Nge kola ixötrethenge hnene la hlue i angeic. Ionathana a lepe trongëne la angetre Filisiti, nge hlue i angeic a humuthi angatr thupei Ionathana. 14 Tha qea ju kö la pane isi cili, nge ma traqa koi 20 lao soc hnei Ionathana me hlue i angeic hna humuth.
15 Ame hna ixouenyi hnine la hna lapa ne la itre soc, me itre pane xötre soc, memine fe lo itre xa soc ka catr. Ame hna enienije la ihnadro, nge Akötresie a axulune pi la xou thei angatr. 16 Nge qaa Gibea e Beniamina, öhne hi itretre thup i Saulo laka, kola enienije menu la hna lapa ne la itre soc i angetre Filisiti.
17 Öni Saulo jë hi kowe la itre soc ka ce me angeic ka hape: “Hëne jë la ëjene la itre soc, matre mama pi la ka patr.” Angatr a kuca jë, nge mama pi hi laka, patre kö Ionathana me hlue i angeic. 18 Öni Saulo jë hi koi Ahia ka hape: “Alemine jë la Pua ne la nyipi Akötresie!” (Ke ngöne la ijine cili, thei angetre Isaraela la Pua ne la nyipi Akötresie.) 19 Saulo pala kö a ithanata memine la atre huuj, nge kolo ha enije menu la lapa i angetre Filisiti. Matre öni Saulo kowe la atre huuj: “Pane amë ju lai huliwa i eö.” 20 Ame hnei Saulo me itre soc ka ce me angeic, hna ce uti kowe la hna isi. Nge traqa ju hi angatr a öhne la angetre Filisiti a kola itö ihumuth hnei taua, nge tru catre la hna amenumenu angatr. 21 Nge ame pena la angetre Heberu ka nyixöle i angetre Filisiti, lo itre ka ce me angatr ngöne la hna lapa ne la itre soc, angatre pena ha nyixölene la angetre Isaraela, hna musinën hnei Saulo me Ionathana. 22 Nge ame la nöjei atre Isaraela ka zae ngöne la itre wetr ne Eferaima, drenge ju hi angatr laka, kötre hë la angetre Filisiti. Matre angatr a huzune jë la angetre Filisiti me isi me angatr. 23 Haawe, ngöne la drai cili, hnei Iehova hna amele Isaraela. Nge hna isi trootro uti hë Beth-Aven nge goi sasaithe fe la götrane cili.
24 Ngazo pe, kucakuca catre la itre trahmanyi ne Isaraela, ke hnei Saulo hna ieji me hape: “Hnëjine hë la atre xeni la ketre ewekë e tha jidri pala kö, nge tha ase pala kö ni lepe la itre ithupëjiang!” Haawe, pëkö ala casi ka xen.
25 Nge hnene la itre soc asë hna lö ngöne la hnaxulu, nge hetre miel e kuhu hnadro. 26 Öhne ju hi angatr hnine la hnaxulu la kola neni gala la miel. Ngo pëkö ala casi ka ij, ke xou i angatr lo hna ieji. 27 Ngo thatre kö Ionathana la hna amekötin hnei keme i angeic. Matre angeic a line pi la sine tö hnei angeic hna ea, me trapin hnine la miel. Nge ame hë la angeic a ije lai miel, melemele pi hi la lue alameke i angeic. 28 Ngo önine la ketre soc ka hape: “Hnei keme i eö hna amekötin kowe la itre soc laka, ‘Hnëjine hë la atre xeni la ketre ewekë la drai ce!’ Nge celë hi matre kola kucakuca catre la itre soc.” 29 Ngo sa jë hi Ionathana ka hape: “Hnei kaka hna hëne la akötr kowe la nöj, ke goeën, hnenge hi hna nango iji miel, nge melemele hë la lue alamekeng. 30 Ngo maine xeni hnyawa ju la itre soc lo itre ewekë hna thapa qaathene la itre ithupëjia, tha nyine qaja kö la aqane tro sa lepe la angetre Filisiti.”
31 Ngöne la drai cili, hnei itre soc i Saulo hna weje huzu angetre Filisiti troa humuthi angatr, qa Mikemas uti hë Aialona. Nge kola ha kucakuca catre la itre soc. 32 Matre angatr a nyinyape hmohmo kowe la itre hna thapa, me isa xomi mamoe, me kau, me neköi kau. Nge angatr a humuthe pi e cahu hnadro, me ce öni la mitr me madra. 33 Ame hnene la ketre atr hna thuemacanyi Saulo me hape: “Dreng! itre soc a kuca la ngazo koi Iehova, ke angatr a ce öni la mitr me madra.” Sue jë hi Saulo ka hape: “Tha mele nyipici hë epun! Ukune pi koi ni la ketre ietë atraqatr.” 34 Thupene lai, öni angeic: “Tro jë kowe la itre soc, nge isa upi angatre jë troa isa traqa fë kau me mamoe. Nge tro hë epun a humuth itre ej e celë, nge tro hë epun a öni. The ngazo kö koi Iehova troa ce öni la mitr me madra.” Matre ngöne la heji cili, hnei angatr hna isa traqa fë kau, me humuth hune la ietë. 35 Ame hnei Saulo hna acili ita ne huuj koi Iehova, nge pane ita ne huuje lai hnei angeic hna acil koi Iehova.
36 Thupene lai öni Saulo: “Tro hë sa uti e heji koi angetre Filisiti, nge tro sa thapa la itre ewekë i angatr uti hë e fetra la jö. Tha tro kö sa nue la ketre troa mel.” Matre önine la itre soc ka hape: “Kuca jë la hnei nyipë hna mekun.” Nge önine la atre huuj: “Ka loi e tro sa pane hnyinge e celë kowe la nyipi Akötresie.” 37 Saulo a hnyinge jë koi Akötresie me hape: “Tro kö ni a uti koi angetre Filisiti? Tro kö nyipëti a nue angatr koi Isaraela?” Ngo ngöne la drai cili, tha sa kö Iehova koi angeic. 38 Matre Saulo a hëne jë la itre tane soc me hape: “Loi e tro sa atre la ewekë ka ngazo hna kuca ngöne la drai celë. 39 Ke eni a sisiny qëmekei Iehova, Akötresie ka mel, me atre amele Isaraela laka, troa humuthe la atre kuca la ngazo, ngacama Ionathana ju hë lo neköng.” Ngo pëkö ala casi ka sa koi angeic. 40 Öni angeice jë hi kowe la angetre Isaraela ka hape: “Cile ju epuni e celë, nge tro ni me Ionathana neköng a cil e ce.” Matre önine la nöj koi Saulo: “Kuca jë la hnei nyipë hna mekun.”
41 Thupene lai, öni Saulo koi Iehova: “Akötresi Isaraela fe, pane sa jë nyipë koi hun jëne la Tumim!”* Ame hna ië Ionathana me Saulo, matre mele ju kö la nöj. 42 Nge öni Saulo jë hi: “Uthi trikitri jë, matre mama pi ka hape, drei e eni me Ionathana neköng.” Ame hna ië Ionathana. 43 Saulo a hnyinge jë koi Ionathana ka hape: “Pane qaja jë koi ni la hnei eö hna kuca.” Nge öni Ionathana: “Hnenge hi hna nango iji miel memine la sine tö celë. Eni hi la, humuthi ni pi!”
44 Matre öni Saulo ka hape: “Loi e tro Akötresie a të koi ni la ngazo, e tha meci kö eö Ionathana!” 45 Ngo önine la itre soc koi Saulo ka hape: “Tro kö a humuthi Ionathana, lo atre aijijë Isaraela troa huun? Waea, nge qëmekei Iehova Akötresie ka mel, pëkö ka troa ketr la ca pene he i angeic. Ke ngöne la drai ce, hnei angeic hna ce huliwa me Akötresie.” Hane hi la aqane amele Ionathana hnene la nöj.
46 Qa ngöne lai, tha weje huzune hmaca kö Saulo la angetre Filisiti. Nge angetre Filisiti a bëeke jë kowe la zi angatr.
47 Saulo a acatrene jë la musi angeic thei Isaraela. Hnei angeic hna isi me itre ithupëjia xötreith, ene lo angetre Moaba, me angetre Amona, me angetre Edoma, me itre joxu ne Zoba, me angetre Filisiti. Nge ka huune pala hi angeic ngöne la nöjei jë ne isi. 48 Tha cile hnö kö angeic, hnei angeic hna isi me ngaa angetre Amaleka, me amele Isaraela qaathene la itre ithupëjia.
49 Ame la itre nekö i Saulo trahmany, tre, Ionathana, me Iesevi, me Malekisua. Nge lue neköi angeice jajiny, Meraba la ka tru, nge Mikala la ketre. 50 Nge Ahinoam la ëjene la föi Saulo, nekö i Ahimaza. Nge ame la ëjene la tane soce i Saulo, tre Abinera, nekö i Neri, lo ketre keme i Saulo. 51 Kiso la keme i Saulo, nge Neri nekö i Abiela la keme i Abinera.
52 Ngöne la ijine mus i Saulo, catrehnine catre la isi me angetre Filisiti. Nge ame la Saulo a öhne la ketre trahmanyi ka catr, maine ka pë hna xouen, nyidrëti a xom matre troa huliwa i nyidrë.