Pane Tus Samuela
18 Ame hë la Ionathana a drei Dravita e ithanata me Saulo, angeic a hnimi Dravita ju, nge lue treme sineene* hë nyidro. 2 Nge qaane la drai cili, hnei Saulo hna cipa Dravita troa huliwa koi nyidrë. Nge tha hnei nyidrëti hmaca kö hna nue Dravita troa bëeke koi kem. 3 Hnei Ionathana me Dravita hna isisinyikeu, ke Ionathana a hnimi Dravita, ceitu me angeice* hi. 4 Ame hnei Ionathana hna una la iheetr ka qea i angeic nge ka pë imen, me hamë Dravita. Nge angeic a hamëne pi fe la iheetr ne isi i angeic, me taua i angeic, me jo, me beletre i angeic. 5 Thupene lai, hnei Saulo hna majemine upi Dravita troa isi, nge ka huune* pala hi angeic ngöne la nöjei isi. Celë hi matre hnei Saulo hna acili Dravita troa tane la itre soc. Nge kola madrin asë la nöj, me itre hlue i Saulo.
6 Matre ame la Dravita me itre xa soc a bëeke qa hna lepi angetre Filisiti, hnene la itre föe hna majemine tro qa ngöne la nöjei traon, troa ixelë me Saulo joxu. Nge angatr a nyima me fiafia, me sue madrin, me lepelepe itrapë, me elo lut.* 7 Itre föe ka feetëne la kola huun ngöne isi a nyimane ka hape:
“Ase hë Saulo lepe la ala 1 000,
nge Dravita la ala 10 000.”
8 Ame hna elë la trenge hni i Saulo, ke xele catre nyidrë ma drenge la nyima celë. Nyidrë a mekune ka hape: “Itre föe a nyimane laka, hnei Dravita hna humuthe la ala 10 000, ngo ame eni, ala 1 000 hi. Tha hmitre kö matre hamë angeice jë fe la hnanyijoxu.” 9 Qaane la drai cili, hnei Saulo hna mekuhni Dravita.
10 Ngöne la drai thupen, lo Dravita a elo arp, hnei Akötresie hna nu troa ajolëne la he i Saulo hnei itre mekune ka ngazo. Nge traqa pi hi la menu* koi nyidrë hnine la uma, nge nyidrëti a cile fë jo. 11 Matre alua hna nyidrëti la jo koi Dravita, ke öni nyidrë: “Tro hë ni a jaqanyi Dravita kowe la ngöne uma!” Ngo hnei Dravita pala hi hna neën. 12 Ame hnei Saulo hna xoue Dravita, ke tha Iehova hmaca kö me nyidrë, ngo ce Iehova ha me Dravita. 13 Saulo a acili Dravita jë troa tane la 1 000 lao soc, matre ananyi angeic. Celë hi matre, Dravita la ka elemekene la itre soc ngöne la hna isi.* 14 Ka tro loi* pala hi la nöjei huliwa i Dravita, nge ce Iehova me angeic. 15 Matre ame la Saulo a öhne laka, anyimua huune hë Dravita ngöne la itre isi, nyidrëti a xou angeice ju. 16 Ngo ame kö la nöje Isaraela me Iudra, hnimi Dravita catr hnei angatr, ke Dravita hi la ka elemekene la itre trongene isi i angatr.
17 E thupen, hnei Saulo hna qaja koi Dravita ka hape: “Hane hi la nekönge jajiny, Meraba la ëjen, nyëne hi la ka tru. Tro hë ni a hamë nyën nyine föi eö. Ngo catre pi huliwa koi ni, nge the mano kö isine la itre isi Iehova.” Saulo a mekune me hape: “Tha tro kö ni a humuthi angeic, ngo tro kö angetre Filisiti.” 18 Sa jë hi Dravita ka hape: “Ke drei ni, nge drei la lapa i kaka e Isaraela matre tro ni a tresi ne la joxu?” 19 Ngo ame ju hi la kola traqa la ijine tro Dravita a ikötresai me Meraba, lo neköi Saulo, ase hë othi Meraba nyine föi Aderiela, atre Mehola.
20 Ngo ame Mikala, lo ketre nekö i Saulo jajiny, nyën a hnimi Dravita. Nge hnene la ketre atr hna qajaqaja koi Saulo, matre madrine pi hi nyidrë. 21 Öni Saulo jë hi: “Tro ni a hamëne la neköng troa föi Dravita, nge tro hë ni a tra thethi angeic. Ma tro jë a humuthi angeic hnene la ketre atre Filisiti.” Haawe, Saulo a qaja hmaca jë koi Dravita ka hape: “Tro hë eö a tresing enehila.” 22 Thupene lai, Saulo a upe pi la itre hlue i nyidrë me hape: “Tro juetrë jë koi Dravita, nge qaja ju ka hape, ‘Atre hi eö! madrine catre la joxu koi eö, nge hnimi eö pi hë hnene la itre hlue i nyidrë. Matre enehila, kapa ju troa tresi ne la joxu.’” 23 Ame hnene la itre hlu hna ithanata me Dravita. Ngo öni angeic ka hape: “Tro ni a tresi ne la joxu fë nemen, nge ka pë ewekë ni nge ka pë pengöne ni?” 24 Itre hlu a qaja ju koi Saulo la aqane sa i Dravita.
25 Matre öni Saulo: “Hape jë koi Dravita ka hape, ‘tha joxu kö a upi eö troa nyithupene la föe, ngo aja i nyidrëti pe tro eö a traqa fë 100 lao kupeine ka hmitrötr i angetre Filisiti, nyine të koi itre ithupëjia me nyidrë.’” Saulo hi lai a ajane tro la angetre Filisiti a humuthi Dravita. 26 Ame hnene la itre hlu hna qaja koi Dravita la itre trengewekë i Saulo, nge madrine hë Dravita troa tresi ne la joxu. Matre qëmekene la drai hna sa hnei joxu, 27 hnei Dravita hna tro me itre soce i angeic, troa humuthe la 200 lao atre Filisiti. Thupene lai, Dravita a bëeke fë jë kowe la joxu la 200 lao kupeine ka hmitrötr, göi troa tresi i Saulo. Ame hnei Saulo hna hamë Mikala troa föi Dravita. 28 Nge öhne hi Saulo laka, ce Iehova me Dravita, nge Mikala a hnimi Dravita. 29 Matre nyixane hmaca jë kö la aqane xoue Dravita hnei Saulo, nge hnei nyidrë hna ithupëjia me Dravita uti hë mec.
30 Hnene la itre joxu i angetre Filisiti hna majemine isi me Isaraela, ngo hune la nöjei atre i Saulo, mama* cile catre kö Dravita ngöne la hna isi. Matre hlemu catre hë la ëje i angeic.