Itre Edromë
29 Ame la atr ka pi hun* ngacama hna anyimua hajin
Ke tro angeic a aca tro kei, nge pëkö nyin koi angeic.
2 Maine ala nyimu la itre atr ka meköt, ke kola madrine la nöj,
Ngo maine kola musi la atr ka ngazo, ke kola hokötre la nöj.
3 Ame la atr ka hnime la inamacan, ke ka amadrinë kem,
Ngo ame la atre tro kowe la itre föe ne gojeny, ke ka aluzi mani.
4 Troa cile huti la nöj jëne la itre huliwa ka meköt ne la joxu,
Ngo ame la atr ka thele mani hna hamën juetrën, ke angeic a angazone la nöj.
5 Ame la ka atrun thoine la atre lapa easenyi angeic
Ke angeic a ami theth* qëmekene la lue ca ne la atre cili.
6 Ketre hnö kowe la atr ka ngazo la tria i angeic,
Ngo kola madrine me sue madrin hnene la atr ka meköt.
7 Ame la atr ka meköt, angeic a sikusikune la itre emekötine la itre ka pë ewekë,
Ngo ame la atr ka ngazo, ke tha angeice kö a akötrehni angatr.
8 Itre ka sipu selën a agomegomëne la traon,
Ngo itre ka inamacan a apujene la elëhni.
9 Ame la kola isi ithanata hnene la ka inamacane memine la hmo,
Ke kola ithanata catr me ihnyimasai, ngo pëkö thangan kowe la atr ka inamacan.
10 Methi ne la itre ka aneni madra la atr ka pë engazon,
Nge angatr a thele troa humuthe la atr ka meköt.*
11 Ame la hmo, angeic a qaja asë la itre aliene la hni i angeic,*
Ngo ame la ka inamacan, angeic a lapa thaup me xomihni.
12 Maine tro la he ne nöj a drenge la itre trengathoi,
Ke tro asë hi la itre hlue i angeice lai a ngazo thiina.
13 Ceitune hi* la ka pë ewekë memine la ka iakötrë:
Iehova a hamëne la lai koi nyidroti asë.*
14 Ame la joxu a tha ië hna hnim la kola amekötine la itre ka pë ewekë,
Nyidrëti hi lai a acile hutine la therone i nyidrë.
15 Ame la jia* memine la ihaji, ke ka hamë inamacan,
Ngo ame la nekönatre hna nue troa kuci mekun, ke ka ahmahmane la thine i angeic.
16 Ame la kola tiqa hnei atr ka ngazo, ke kola elë la etrune la itre tria,
Ngo tro la itre atr ka meköt a öhnyi angatr e kei.
17 Hajine jë la nekö i ö, nge tro angeic a hamë tingeting koi ö;
Nge tro fe angeic a amadrinë eö.
18 E pëkö hna amekötin hnei Akötresie, ke kola huliwa menu la nöj,
Ngo madrine la itre ka metrötrëne la wathebo.
19 Ame la hlu, tha angeice kö a kapa la ihaji hna qaja,
Ke ngacama trotrohnine hi angeic, ngo tha trongëne pe.
20 Öhne hë eö la atr ka canga saqe ithanata?
Loi ju kö la hmo hui angeic.
21 Maine troa kapa asë la itre aja ne la hlu qaane lo angeic a co,
Ke tro angeic epin a pë hni ne ole.
22 Ame la atr ka elëelëhni, ke angeic a amejëne la itre iwesitrë;
Nge ame la atr ka canga elëhni, ke tru catre la itre tria i angeic.
23 Tro ha thaipiëne la atr hnene la aqane pi tru i angeic,
Ngo tro ha atrune la atr ka ipië.
24 Ame la ka ce xöl memine la atrekënö, ke angeic a methinë angeice kö.
Drenge hi angeic la kola thele temoë, ngo pëkö hnei angeice hna qaja.
25 Ketre hnö* la troa hmengöhmengöne* qëmekene la itre atr,
Ngo tro ha thupëne la atre mejiune koi Iehova.
26 Ala nyimu la ka sipon troa kepe angatr hnene la ketre he ne nöj,*
Ngo Iehova kö la ka jelemekötine la atr.
27 Methi ne la atr ka meköt, la atr ka tha meköti kö,
Nge methi ne la atr ka ngazo, la atr ka huliwa ngöne la meköt.