Hnaaluene Tusi Itre Joxu
19 Ame hë la kola drenge lai hnei Hezekia joxu, hnei nyidrëti hna kuie zezene la iheetre i nyidrë, me heetrëne la ibëek ka tru thenyin, me lö hnine la uma ne hmi Iehova. 2 Nge hnei nyidrëti hna upi Eliakima lo atre thupëne la hnalapa i joxu, me Sebena lo sekreter, memine la itre tan ne la itre atre huuj, troa wai Isaia perofeta, nekö i Amoza. Nge angatr a isa heetrën la itre bëek ka tru thenyin. 3 Nge öni angatr koi Isaia ka hape: “Hane hi la hna qaja hnei Hezekia, ‘Ame la drai ce, ke drai ne akötr, me iqaqa, me hmahma. Ke ceitu i easë me föe ka pë trengecatre troa hnaho, ngo ijine tro pe a mala la nekönatr. 4 Maine jë, tro Iehova Akötresi nyipë a drenge la itre trengewekë ne la Rabesake,* lo hna up hnene la joxu ne Asuria troa thupathe la Akötresie ka mel. Nge maine jë, tro Iehova Akötresi nyipë a nyithupen kowe la itre trengewekë hnei nyidrëti hna dreng. Haawe, pane thithi sane jë la itre ka mele pe ngöne la nöj.’”
5 Nge thupene la angatr a ase tro fë la maca i Hezekia koi Isaia, 6 öni Isaia kowe la itre ka tro fë maca ka hape: “Tro jë qaja kowe la joxu i epun ka hape, ‘Hane hi la hna qaja hnei Iehova, “The xouene kö la itre trengewekë hnei eö hna dreng, ene la itre trengathoi hna qaja göi ni hnene la itre hluene la joxu ne Asuria. 7 Ke tro ni a amë e kuhu hni angeic la ketre mekun. Nge tro angeic a drenge la ketre maca, me bëeke kowe la nöje i angeic. Nge tro pë hë ni a kuca matre troa humuthi angeice hnei taua ngöne la nöje i angeic.”’”
8 Nge ame hë la kola dreng hnene la Rabesake laka, hnene la joxu ne Asuria hna upe la itre sooc i nyidrë troa mejë qa Lakisa, hnei angeic hna tro troa wai nyidrë. Ame hnei angeic hna öhnyi angatr e lepe la traon ne Libena. 9 Nge e cili, hnene la joxu ne Asuria hna drenge ka hape, calemi hë Tiraka joxu ne Athiope troa isi me nyidrë. Ame hnei nyidrëti hna upe hmaca koi Hezekia la itre ka tro fë maca, me hape: 10 “Hane hi la nyine tro epuni a qaja koi Hezekia joxu ne Iudra: ‘The tro kö la Akötresie hnei eö hna mejiune kow a amenu eö, me hape: “Tha tro kö a nue Ierusalema ngöne la imene la joxu ne Asuria.” 11 Ketre, drenge hë eö la hna kuca hnene lo itre joxu ne Asuria kowe la nöjei nöj asë, hna apatrenyi angatr asë. Matre ka ue pe kö eö? 12 Nge ame la itre nöj hna apatrene hnene la itre qaaqaang, hapeu, hnene kö la itre haze i angatr hna amele nyudren? Ekaa Gozana, me Karan, me Rezef, memine la angetre Edrena ka lapa e Thelasa? 13 Ekaa la joxu ne Hamath, me Arepada, memine la joxu ne la itre traon ne Sefaravaima, ene Hena me Iva?’”
14 Ame hnei Hezekia hna xome la itre tus qaathene la itre ka tro fë maca me e. Thupene lai, nyidrëti a elë jë kowe la uma ne hmi Iehova, matre seluthe la itre tus* qëmekei Iehova. 15 Nge hnei Hezekia hna thithi koi Iehova me hape: “Iehova fe Akötresi Isaraela, atre lapane la therone i nyipë hune* la itre kerubi. Nyipëti hmekuje hi la nyipi Akötresie ne la itre baselaia e cailo fen. Nge nyipëti la ka xupe la hnengödrai memine la fen. 16 Iehova fe, epi tro nyipëti a qatixenyëne me dreng! Nge Iehova fe, epi tro nyipëti a fe la luemeke i nyipë, me goeën! Nge pane drenge jë la itre trengewekë* i Saneribi, ke angeic a tupathi nyipë Akötresieti ka mel. 17 Iehova fe, nyipici laka, hnene la itre joxu ne Asuria hna apatren asë la itre nöj, memine la itre zi angatr. 18 Nge hnei angatr hna dreuthetrije la itre haze ne la itre nöj, ke tha itre nyipi haze kö, ngo itre sine sinöe me etë hna tratraun hnei atr, celë hi matre hnene la itre joxu ne Asuria hna apatren itre ej. 19 Ngo Iehova fe Akötresi hun, epi amele huni enehila qaathene la joxu ne Asuria, matre atre jë la itre baselaia asë e celë fen laka, Iehova fe, nyipëti hmekuje hi la nyipi Akötresie.”
20 Ame hnei Isaia nekö i Amoza hna iupi fë la maca celë koi Hezekia me hape: “Hane hi la hna qaja hnei Iehova Akötresi Isaraela, ‘Drenge hë ni lo thithi ö göi Saneribi joxu ne Asuria. 21 Hane hi la itre trengewekë hnei Iehova hna qaja göi angeic:
“‘Kola methinë eö me hnyima sai ö hnene la nekö i Ziona, lo nyipi jajiny.
Nge kola nangenange la he me wesitr hnene la nekö jajiny ne Ierusalema.
22 Drei la hnei ö hna icilekeu memin,
nge eö a pi tru koi drei?
Nge eö a ewekë catr koi drei, me goëen amenyi drei?
Kowe la atre Ka Hmitrötr e Isaraela!
23 Hnei eö hna thele isi me Iehova jëne la itre ka tro fë maca, me hape,
‘Tro ni a elëne la itre wetr memine la itre ikatreng ka nyimutre
ngöne la itre götran gaa nany ne Lebanona.
Nge tro ni a sa la itre arasi ka draië, me itre göti ka mingöming i angeic.
Tro ni a lö hnine la itre hnë zae i angeic gaa mi, me itre hnaxulu i angeic gaa tru.
24 Nge tro ni a kuje la itre tim me ij la timi trenyiwa;
nge tro ni a aqaqacilëne la itre hneopegejë* asë ne Aigupito memine la hene wacang.’
25 Nge tha drenge kö eö? Ase hë ni lai axeciën* qaan ekö, me hnëkëne* lai qaane lo itre drai hnapan.
Ame enehila, tro ni eatrën ej.
Nge ame la itre traon hna xupi hagen, ke tro eö a
lep itre ej matre tha tro hmaca kö a lapan.
26 Nge tro hë la itre ka lapan ej a pë trengecatr; me xou me hmahma.
Nge tro hë angatr a tune la hnitr ne la itre hlapa
me tune la haö,
me tune la haö hune la itre uma
hna aqaqacilën hnene la enyi ne koië.
27 Ngo atre hi ni la eö a lapa, me tro, me lö
Me ngöne la eö a elëhni koi ni.
28 Nge drenge hë la lue hnagenyëng la eö a elëhni koi ni, me pi tru koi ni.
Ame enehila, tro ni a liine la aletreng ngöne la hnafiji ö, memine la biriting ngöne la që i ö,
Nge tro ni a bëeke sai ö qa ngöne la gojenyi hnei ö hna fetra.”
29 “‘Nge hane hi la hatren koi eö,* ngöne la macatre celë, tro epuni a xeni la ka cia xan. Nge ngöne la macatre thupen, tro epuni a xen la ka cia qa ngöne la itre wen ka mala ngöne la pane macatre. Nge ngöne la hnaakönine macatre, tro hë epuni a jumi feja, me menuën. Tro epuni a traa vin,* me iji wenen ej. 30 Nge ame la itre ka mele pe ngöne la nöje Iudra, me itre ka lapa pe, ke tro angatr a cia iwaan ka jui, me wa wene draië. 31 Ke tro ha xulu qa Ierusalema la itre nöj ka lapa pe, nge tro ha xulu qa ngöne la nöje Ziona la itre ka mele pe. Nge troa kuca lai hnene la aja ka catre i Iehova, lo joxu ne la itre trongene isi.
32 ‘“Ke hane hi la hna qaja hnei Iehova göne la joxu ne Asuria:
“Tha tro kö angeic a lö kowe la traon,
nge tha tro kö angeic a huji pehna kow ej,
me cile fë petr qëmeken ej,me acili ija matre elë hune la hag atraqatr.”’
33 Tro angeic a bëeke hmaca qa ngöne la gojenyi hnei angeic hna fetra.
Nge tha tro kö angeic a lö ngöne la traone cili,” öni Iehova.
34 “Tro ni a isigöline la nöje ce me amelen ej,
pine la ëjeng,me göi Dravita hlueng.”’”
35 Ngöne ju kö la heji cili, hna tro pi la angela i Iehova ngöne la lapa ne la angetre Asuria, me humuthe la 185 000 lao sooc. Nge ame la itre atr ka ihlë e hmahmakany, ke hlë jë hi angatr a öhne la itre ngönetrei ka mec. 36 Ame hnei Saneribi joxu ne Asuria hna tro me bëeke hmaca e Ninive, me lapa e cili. 37 Nge ame ngöne la ketre ijin, hnei Saneribi hna tro troa thithi ngöne la uma i Niseroka haze i angeic. Ame hna humuthi angeic hnei taua hnei Aderamelek me Sarezera, lo lue nekö i angeic. Nge hnei nyidroti hna kötr ngöne la nöje Ararata. Nge hnene la nekö i angeic Esar-adon, hna nyihnai angeic troa joxu.