Iobu
23 Ame hnei Iobu hna sa ka hape:
2 “Enehila, tro pala kö ni a eetr;*
Ke pëhë trengecatreng hna awe.
3 Ekölöhini maine atre ju ni la hnë i Akötresie!
Tro hë ni a tro koi nyidrë.
4 Nge tro hë ni a tro fë la jolenge koi nyidrë
Me isigöli ni qëmeke i nyidrë;
5 Nge tro hë ni a atrehmekune la aqane sa i nyidrë
Me hnangenyëne la hnei nyidrëti hna troa qaja koi ni.
6 Nge hapeu, tro kö nyidrëti a huliwane la men atraqatre i nyidrë matre cile koi ni?
Waea, tro kö nyidrëti lai a drei ni.
7 Nge tro hë la atr ka meköt a iloi me nyidrë,
Nge tro ha aca jele meköti ni hnene la Atre Iameköti uti hë epin.
8 Ngo maine tro ni a tro koië, ke patre kö nyidrë;
Nge e tro hmaca ni a bëek, ke tha öhnyi nyidrëti kö ni.
9 Nge ame la nyidrëti a huliwa ngöne la götrane mi, ke tha öhnyi nyidrëti kö ni;
Nge ame la nyidrëti a jea kowe la götrane maca, ke ceitune pala hi.
10 Ngo ame pe, atre hnyawa hi nyidrëti la itre jëng.
Nge e ase hë nyidrëti tupathi ni, tro hë ni a tune la nyipi gool.
11 Hnenge hna trongëne hnyawa la itre thupaca i nyidrë;
Me lapa ngöne la gojenying, nge tha ase kö ni jea qa ngön.
12 Tha hnenge kö hna ananyine la itre wathebo hnei nyidrëti hna qaja.
Nge hnenge hna nyipine la itre trengewekë hnei nyidrëti hna ahnithe koi ni.*
13 Ngo maine ase hë nyidrëti mekun, ke drei la ka atreine cile koi nyidrë?
Nge ame la nyidrëti a ajane la ketre ewekë, nyidrëti a eatrën ej.
14 Ke tro nyidrëti a eatrën koi ni la nöjei ewekë hna axeciën* thatraqai ni,
Nge nyimutre la itre ewekë ka tune lai hnei nyidrëti hna hnëkën.
15 Celë hi kepin matre axulune jë nyidrëti la hnehengazo theng;
Nge ame la eni a meku nyidrë, kola elë la xoung.
16 Xou hë ni hnei Akötresie,
Nge hnene la Ka Tru Trenge Men hna axouenyi ni.
17 Ngacama hna juetrëne la iqëmekeng hnene la melöhlem
Ngo tha tro kö ni a lapa thaup.