Nehemia
4 Nge ame ju hi la Sanebalata a drenge laka, eahuni a xupe hmaca la ihag, hnei angeic hna wesitr me elëhni, me hnyimasai angetre Iudra. 2 Öni angeic qëmekene la itre sine xöle i angeic, memine la trongene isi ne Samaria ka hape: “Kola kuci nemen hnene la ume genyi qa Iudra? Mekuna i angatr ka hape, tro angatr a atreine kuca casine la huliwa? Tro kö angatr a tro fë huuj? Tro kö angatr a afenesin ngöne la ca drai? Tro kö angatr a acile hmaca la itre etë hna manith, lo ka kei nge hna keleme hnei dro?”
3 Nge öni Tobia qa Amona ka cil ezi angeic ka hape: “Tro hi la ca kuli wael a të hune la ihag hnei angatr hna xup, nge tro hë ej a trotro lapa.”
4 “Akötresi huni fe, pane drenge ju la aqane ewekë ne la itre atre ce. Abëekëne jë koi angatr la itre trengewekë ka iahmahmany, nge epi troa othi angatr, me tro xomi angatr kowe la nöje trenyiwa. 5 The juetrëne kö la ngazo i angatr, nge the köletrije kö qëmeke i nyipë la ngazo i angatr, pine angatr qaqane la itre ka xupi uma.”
6 Ngo tha cile kö huni troa xupe hmaca la ihag. Ame hna humu hmaca pi la ihag, nge hna acile hmaca uti hë lo sine la edraiëne hnapan, ke itre atrene la nöj a akötrehnine la huliwa.
7 Nge ame ju hi la Sanebalata, me Tobia, me angetre Arabia, me Amona, me Asedoda, a drenge laka, kola tro loi la huliwa ne xupe hmaca la ihag e Ierusalema, nge eahuni a pelethe la itre gaa thöni, elëhni catre jë hi angatr. 8 Angatr a ce ithanatane jë troa isi me Ierusalema, me agomegomëne la traon. 9 Ngo hne huni hna thithi kowe la Akötresi hun, me acile la itre ka thup e lai me jidr troa thupë hun.
10 Ngo hnene la itre xan thei angetre Iudra hna qaja ka hape: “Hmanono hë la itre ka huliwa,* ke tru catre pala kö hnei ewekë ka kei. Tha ijiji së kö troa xupe hmaca la ihag!”
11 Nge itre ithupëjia me eahun a qaja ka hape: “Tro huni a traqa juetrë nyipi angatr, me humuthi angatr, nge tro huni a acilëne la huliwa.”
12 Nge ame la nöjei ijin kola traqa hnene la angetre Iudra ka lapa ezine la itre ithupëjia, angatr a qaja* koi huni ka hape: “Tro angatr a lepi së qa ngöne la nöjei götran.”
13 Matre hnenge hna acile la itre atr ngöne la itre götran gaa ipië tröne la ihag, me ngöne la itre götrane gaa mama. Hnenge hna acili angatr thenge la itre fami angatr, nge hetre itre taua i angatr, me itre jo, me itre pehna. 14 Nge ame la eni a öhne laka, angatr a xou, canga öninge jë hi kowe la itre atre ka draië, me itre ka isenyin, me kowe la munëne la nöje ka hape: “The xoue angatre kö, ngo meku Iehova jë, atre ka draië nge nyine xouen.* Nge isigöline jë la itre trejin me epun, me itre nekö i epun trahmanyi me jajiny, me itre föi epun, me itre hnalapa i epun.”
15 Ngo thupene la kola dreng hnene la itre ithupëjia laka, atre hë huni lo hnei angatr hna pi kuca, nge hnene la nyipi Akötresie hna atriane la mekuna i angatr, hne huni asë hna xome hmaca la huliwa ne xupe la ihag. 16 Qaane ju hi lai, hnene la sine la itre atreng hna huliwa, nge hnene la ketre sin hna cile fë jo, me ipetr, me tane pehna, nge angatr a heetrë iheetr ne isi. Nge itre he ne nöj a sajuëne* la nöjei atre Iudra 17 ka xupe hmaca la ihag. Nge ame la itre ka thu la itre ehnef, angatr a huliwa memine la ketre im, nge ketre im a cile fë jia ne isi.* 18 Nge ame la itre ka xupi uma, angatr asë hi a huliwa nge taua a thip ngöne la itre gö i angatr. Nge ame la hna upe troa ufi trutru, angeic a cil ezing.
19 Matre öninge kowe la itre atre ka draië, me itre ka isenyin, me kowe la munëne la nöje ka hape: “Tru catre la huliwa, nge qeadridri catr la ihag, nge easë a isa huliwa iananyi ngöne la ihag. 20 Matre, e drenge hë epuni la mejene trutru, alemi jë koi hun, nge tro la Akötresi së a isigöli së.”
21 Matre hne huni hmaca hna huliwa, nge hnene la ketre sine la itre trahmany hna cile fë jo, qaan e kaqa ne lai, uti hë la kola mama la itre wëtresij. 22 Ngöne la ijine cili, öninge kowe la nöj: “E hej, tro la itre trahmany me itre ka xatua angatr a lapa e Ierusalema. Tro angatr a thup e hej, me huliwa e lai.” 23 Qa ngöne lai, tha una pi kö huni la itre iheetre hun, eni, me itre trejin me eni, me itre ka xatua ni, me itretre thup ka xötrethenge ni. Eahuni a isa ea la itre taua huni hnene la ime maca.