Nehemia
8 Nge hnene la nöj hna ce axeciën troa icasikeu ngöne la götrane qëmekene la Qëhnelö Ne La Tim. Ame hna sipone koi Ezera, lo atre feja itus, troa traqa fë la tusi ne Wathebo i Mose, lo hnei Iehova hna hamëne koi angetre Isaraela. 2 Matre hnei Ezera atre huuj, hna traqa fë la Wathebo qëmekene la icasikeu, itre trahmanyi me föe, me itre ka atreine trotrohnine la hna dreng. Kolo hmekune la pane drai ne la hna 7 ne treu. 3 Matre qaan e kaqa ne lai uti hë midi, hnei angeic hna e catrën la itus kowe la itre trahmanyi me föe, me kowe la nöjei atr ka atreine trotrohnin, nge ka icasikeu qëmekene la götrane ka tru hmekune la Qëhnelö Ne La Tim. Nge hnene la nöj hna drenge hnyawa la kola e la tusi Wathebo. 4 Nge ame Ezera, lo atre feja itus, angeic a cil hune la ita ka draië hna acil göne la drai cili. Nge ngöne la götrane maca i angeic, kola cil hnei Matathia, me Sema, me Anaia, me Uria, me Hilekia, me Maseia. Nge ngöne la götrane mi, Pedaia, me Misaela, me Malekia, me Hasum, me Hasebadana, me Zakaria, me Mesulama.
5 Ame hnei Ezera hna fe la itus, nge itre atr asë a goeë Ezera, ke draië angeic hui angatr. Matre ame la angeic a fe la itus, hna ce cile la nöjei atr. 6 Ezera a atrunyi Iehova jë, lo nyipi Akötresie ka Draië, nge itre atrene la nöj a sa me li ime draië, me hape: “Amen!* Amen!” Nge angatr a thili ju, me sa iwatingöneca qëmeke i Iehova. 7 Ame hnei Iesua, me Bani, me Serebia, me Iamina, me Akub, me Sabethai, me Hodia, me Maseia, me Kelita, me Azaria, me Iozabada, me Hanan, me Pelaia, lo angetre Levi, hna qejepengöne la itre Wathebo kowe la nöj, nge kola icileny la itre atrene la nöj. 8 Angatr a e catrëne jë la itus, lo Wathebo ne la nyipi Akötresie, nge angatr a qejepengöne hnyawa jë, me qaja la alien. Celë hi aqane xatuan angatr la itre atrene la nöj, troa trotrohnine la hna e.
9 Nge hnei Nehemia gavena,* me Ezera lo atre huuj me atre feja itus, memine la angetre Levi ka hamë ini kowe la nöj, hna qaja kowe la itre atr ka hape: “Drai ka hmitrötre la drai ce koi Iehova Akötresi epun. Haawe, the hnë meci kö, nge the treije kö.” Ke kola itreijenyi la nöj la angatr a drenge la itre Wathebo. 10 Öni Nehemia koi angatr ka hape: “Tro jë, xeni jë la itre xeni ka lolo,* nge iji jë la itre nyine ije ka hnyapa, nge thuane jë la itre ka tha hnëkë xen. Ke drai ka hmitrötre la drai ce kowe la Joxu së. Nge the hleuhleu kö, ke tro la madrine qaathei Iehova a aegöcatrenyi* epun.” 11 Nge hnene la angetre Levi hna aupune la nöj me hape: “Loi ju hë hna treij, ke drai ka hmitrötre la. Nge the hleuhleu kö.” 12 Ame hnene la nöj hna tro troa xeni me ij, me hamë xeni koi itre xan, me madrin atraqatr, ke trotrohnine hë angatre la itre trengewekë hnei angatre hna dreng.
13 Nge ngöne la hnaaluene drai, hnene la itre tixe ne lapa ne la nöj, me itre atre huuj me angetre Levi, hna tro troa icasikeu xötreithi Ezera atre feja itus, ke aja i angatr troa trotrohnine hnyawa la tusi Wathebo. 14 Nge öhne ju hi angatr ngöne la tusi Wathebo hnei Iehova hna hamën jëne Mose laka, ngöne la feet ne la hna 7 ne treu, tro la angetre Isaraela a pane lapa fene la itre ihmelekap.* 15 Nge qa i angatre fe troa qaja trongën ngöne la itre traone i angatr me e Ierusalema, ka hape: “Tro jë ngöne la itre wetr, nge bëeke fë jë la itre picine oliv,* me itre picine göti, me itre picine mirt, me itre dröne pama, me itre xa sinöe, matre troa acili ihmelekap, thenge lo hna amekötin hnene la Wathebo.”
16 Matre hnene la nöj hna tro troa sa sinöe, me acili ihmelekap hune la isa hnalapa i angatr. Nge angatr a acile ju fe la itre ihmelekap ngöne la itre götrane gaa pë ihakun ne la itre uma i angatr, me ngöne la itre götrane gaa pë ihakun ne la uma ne hmi ne la nyipi Akötresie, me ngöne la götrane qëmekene la Qëhnelö Ne La Tim, me ngöne la götran qëmekene la Qëhnelö Ne Eferaima. 17 Qa ngöne lai, hnen asë* hi la itre ka bëeke qa ngöne la nöje trenyiwa, hna acili ihmelekap, me lapa fen itre ej. Kolo petre hi a feete tun hnene la angetre Isaraela, qaane lo ijine i Iosua nekö i Nuna, matre angatr a madrin atraqatr. 18 Nge e nöjei drai, qaane la pane drai uti hë la drai tixenuë, hna e catrëne la tusi Wathebo ne la nyipi Akötresie. Hnei angatr hna atrune la feete cili koi 7 lao drai, nge ngöne la hna 8 ne drai, hna kuca la ketre icasikeu ka ketre pengön, thenge lo hna amekötin.