Ieremia
29 Hane hi la aliene lo tusi hnei Ieremia hna iupi fë qa Ierusalema, kowe la itre qatr ne la nöj, me itre atre huuj, me itre perofeta, memine la nöjei atr hnei Nebukaneza hna xom qa Ierusalema a tro Babulona. 2 Hnei angeic hna iupi fë tus, thupene lo Iekonia joxu me thine i angeic* a tro qa Ierusalema, memine la itre he ne nöj, me itre nekö i joxu ne Iudra me Ierusalema, me itre ka atreine huliwa, me itre ka dreu fao.* 3 Hnei angeic hna ahnithe la tus koi Elasa nekö i Safana, me koi Gemaria nekö i Hilekia. Eje hi, hnei Zedekia joxu ne Iudra hna upi nyidro a tro Babulona koi Nebukaneza joxu ne Babulona. Hane hi la hna qaja ngöne lai tus:
4 “Hane hi la hna qaja hnei Iehova joxu ne la itre trongene isi e hnengödrai, Akötresi Isaraela, kowe la nöjei atr hna kötre fë a tro Babulona: 5 ‘Xupi uma jë nge lapane ju. Traane jë nge xeni jë la itre wen. 6 Faipoipo jë nge hnaho jë. Faipoipone jë la itre nekö i epun, trahmanyi me jajiny, matre tro fe angatr a hane hnaho. Mana pi epun e cili, nge epi tha tro kö a co la etru i epun. 7 Isine jë troa mele tingeting ngöne la traon hnenge hna kötre sai epuni kow, nge thithi jë koi Iehova thatraqane la traon. Ke maine tro ej a tingeting, tro fe hë epuni a hane tingeting. 8 Eje hi, hane hi la hna qaja hnei Iehova joxu ne la itre trongene isi e hnengödrai, Akötresi Isaraela: “The nue kö troa amenu epun hnene la itre perofeta me itre ka trene haze nyipi epun. Nge the drenge kö la angatr a porotrikëne la itre pu i angatr. 9 Ke ‘itre trengathoi la hnei angatre hna perofetan ngöne la ëjeng. Nge tha eni kö la ka upi angatr,’ öni Iehova.”’”
10 “Ke hane hi la hna qaja hnei Iehova: ‘Thupene la 70 lao macatre e Babulona, tro hmaca ni a thupë epun, me eatrëne lo hnenge hna thingehnaean: tro ni a bëeke sai epuni kowe la nöje ce.’
11 “‘Ke atre hnyawa hi ni la hnenge hna ajane koi epun,’ öni Iehova. ‘Eni a ajane la tingeting koi epun ngo tha akötre kö. Eni a pi hamë mele ka loi koi epuni elanyi me mejiun. 12 Tro epuni a hë ni me thithi koi ni, nge tro ni a drei epun.’
13 “‘Tro epuni a thele ni me öhnyi ni, ke hnei epuni hna thele ni hnene la hni i epuni ka pexej. 14 Eje hi, tro ni a nue epuni troa öhnyi ni,’ öni Iehova. ‘Tro ni a acasine la itre hna kötre fë, me acasi epun qa ngöne la itre nöj me itre götran hnenge hna aisaije epuni kow,’ öni Iehova. ‘Eje hi, tro hmaca ni a bëeke sai epun kowe la nöj hnenge hna xomi epuni qa ngön.’
15 “Ngo öni epuni pe: ‘Hnei Iehova hna hamë perofeta koi së e Babulona.’
16 “Hane hi la hna qaja hnei Iehova kowe la joxu ka lapane la therone i Dravita, me kowe la nöjei atrene la traon, lo itre trejin me epun hna tha kötre fë kö: 17 ‘Hane hi la hna qaja hnei Iehova joxu ne la itre trongene isi e hnengödrai: “Tro ni a upe koi angatr la isi,* me jiin, me itre meci ka ixötrekeu.* Nge tro ni a kuca matre tro angatr a tune la itre wene wacua ka pi,* nge tha nyine xeni hmaca kö.”’
18 “‘Eje hi, tro ni a akucakucanyi angatre hnene la isi,* me jiin, me itre meci ka ixötrekeu, me kuca matre tro la nöjei baselaia ne la fen a xou, pine la itre ewekë ka traqa koi angatr. Ngöne la itre nöj hnenge hna troa aisaije angatr, tro la itre atr a qeje angatr ngöne la kola ieji. Tro la itre atr a sesëkötre me qej la kola goeë angatr, me thaipië angatr. 19 Ke tha hnei angatre kö hna drenge la itre hnenge hna qaja jëne la itre hlueng perofeta, lo hnenge hna anyimua upe* koi angatr,’ öni Iehova.
“‘Ngo tha hnei epuni kö hna dreng,’ öni Iehova.
20 “Celë hi matre, drenge ju la hna qaja hnei Iehova, epuni asë, itre hna kötre fë qa Ierusalema a tro Babulona. 21 Ame la itre hna perofetan hnei Ahaba nekö i Kolaia me Zedekia nekö i Maseia ngöne la ëjeng, ke itre trengathoi. Matre hane hi la hna qaja göi nyidro hnei Iehova joxu ne la itre trongene isi e hnengödrai, Akötresi Isaraela: ‘Tro ni a nue nyidro koi Nebukaneza* joxu ne Babulona, nge tro angeic a humuthi nyidro qëmekei epun. 22 Nge tro hë la itre hna kötre fë qa Iudra a tro Babulona, a qaja la ewekë ka troa traqa koi nyidro ngöne la angatr a ieji. Tro la itre atr a hape: “Epi tro Iehova a kuca koi ö tune la hna kuca koi Zedekia me Ahaba, lo lue hna atron hnene la joxu ne Babulona!” 23 Eje hi, hnei nyidro hna kuca la itre huliwa nyine hmahman e Isaraela: hnei nyidro hna nyixetë memine la itre föe ne la itre ka lapa ezi nyidro, nge hnei nyidro hna ewekë ngöne la ëjeng ngo tha hnenge pe hna upi nyidro.
“‘“Atre hi ni la hnei nyidroti hna kuca, nge öhn asë hi ni,” öni Iehova.’”
24 “Nge qaja ju koi Semaia qa Nehelami ka hape: 25 ‘Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: “Hnei ö hna cinyanyin ngöne la ëje i ö la itre tusi hna iupi fë kowe la angetre Ierusalema asë, me koi Zefania nekö i Maseia atre huuj, me kowe la itre atre huuj asë. Öni ö: 26 ‘Hnei Iehova hna acili ö troa nyihnai Iehoiada atre huuj, matre thupëne la uma i Iehova. Nge maine tro la hmo a nyi perofeta, hnëqa i ö troa ameköti angeic, me othi angeic ngöne la inehe ne iaxösisi, me ceinëne la nyinawa i angeic. 27 Matre hnauëne hö laka, tha hnei ö kö hna ameköti Ieremia qa Anathoth, pine angeic nyi perofeta nyipi epun? 28 Ke hnei angeice fe lo hna iupi fë maca koi huni e Babulona, me hape: “Nanyi pala kö! Xupe jë pe la itre uma, nge lapane jë. Eënyi jë, nge xeni jë la itre wen.”’”’”
29 Ame hë la Zefania atre huuj a e la tusi qëmekei Ieremia perofeta, 30 hnei Iehova hna ewekë koi Ieremia, me hape: 31 “Tro fë jë la maca celë kowe la itre hna kötre fë: ‘Hane hi la hna qaja hnei Iehova göi Semaia qa Nehelami: “Hnei Semaia hna perofeta koi epun, ngo tha hnenge kö hna upi angeic. Hnei angeic hna thel tro epuni a kapa la itre trengathoi. 32 Qa ngöne lai, hane hi la hna qaja hnei Iehova: ‘Tro hë ni a të koi Semaia qa Nehelami, me itre matra i angeic. Pëkö ca trahmanyi ne la fami i angeic ka troa mel ngöne la nöje ce. Nge tha tro kö angeic a öhne la loi hnenge hna troa kuca kowe la nöjeng,’ öni Iehova, ‘ke hnei angeice hna ukune la nöj troa icilekeu me Iehova.’”’”