Esetera
8 Ame ngöne la drai cili, hnei Asueru joxu hna hamëne koi isola Esetera la nöjei ewekë i Hamana, lo ithupëjia me angetre Iudra. Nge hnei Modikai hna lö koi joxu, ke hnei Esetera hna qaja koi nyidrë ka hape, casi hi la fami nyidro. 2 Ame hnene la joxu hna hule la otrene wanakoime i nyidrë nyine pelehatren, lo hnei nyidrë hna thapa qaathei Hamana, me hamëne pena koi Modikai. Nge hnei Esetera hna ahnithe pë hë koi Modikai la itre ewekë i Hamana.
3 Ame hnei Esetera hna ithanata hmaca memine la joxu, nge hnei eahlo hna thil kowe la lue ca i nyidrë, me treij, me treije fë koi joxu troa thele nyin la jol hna amejën hnei Hamana qa Agaga, me thele la aqane troa atriane lo mekuna i angeic göi angetre Iudra. 4 Ame hnene la joxu hna line koi Esetera la sine tö gool, nge Esetera a mejë jë, me cil qëmekei joxu. 5 Nge öni eahlo: “Maine ka loi koi joxu, nge kola kepe ni hnei nyidrë, nge e meköti koi joxu, nge e nyidrëti a hnimi ni, epi troa fejane la ketre wathebo ka troa apëne la itre tusi hnei Hamana, nekö i Hamedatha qa Agaga, lo atre huliwa thoi, hna cinyiany göi troa humuthe la nöjei atre Iudra, ngöne la nöjei provës i joxu. 6 Ke tro ni a atreine goeëne tune kaa la kola akötrëne la nöjeng? Nge tro ni a atreine goeëne tune kaa la kola apatrene asë la faming?”
7 Ngo öni Asueru joxu koi isola Esetera, me koi Modikai lo atre Iudra, ka hape: “Dreng! Ase hë ni hamëne koi Esetera la itre ewekë i Hamana, nge ase hë ni athipi angeic hune la ipoto, ke hnei angeic hna thele* troa humuthe la angetre Iudra. 8 Ngo ame la hna cinyihan ngöne la ëje i joxu, me pelehatren hnene la otrene wanakoime i joxu, thatreine hmaca kö troa apën. Matre eni a nue epon troa cinyianyin ngöne la ëje i joxu la ka loi koi angetre Iudra, nge tro ha pelehatren hnene la otrene wanakoime i joxu.”
9 Qa ngöne lai, hna canga hëne la itre sekreter i joxu, hmekune la hna 23 ne drai ne la hnaakönine treu, ene lo treu Sivan.* Angatr a fejan asë la itre hna amekötin hnei Modikai thatraqai angetre Iudra, me koi itre tane provës, me itre gavena, me itre he ne nöj ne la 127 lao provës, qaan e Ëd uti hë Aithiope. Hna fejan la wathebo ngöne la aqane cinyianyin ne la nöjei provës, me ngöne la qene hlapa ne la nöjei nöj, me ngöne la aqane cinyianyin, me qene hlapa i angetre Iudra.
10 Hnei Modikai hna cinyianyin ngöne la ëje i Asueru joxu, nge angeic a pelehatrene jë hnene la otrene wanakoime i joxu. Thupene lai, hnei angeic hna iupi fë la itre tus, jëne la itre ka tro fë maca ka ti hos. Angatr a tithe la itre hos ne iwaja, lo hna axöj ngöne la itre hnë axö hos i joxu. 11 Ngöne la itre tusi cili, joxu a aijijëne la angetre Iudra ne la nöjei traon troa icasikeu, me isigöline la mele i angatr, me humuth, me apatren, me apëne hnyawa la nöjei atr qa ngöne la nöjei nöj, me nöjei provës, nge uti fe hë la itre föe me itre nekönatr ka xomi jia ne isi nyine humuthi angatr, me thapa la itre mo i angatr. 12 Nge troa trongëne la wathebo celë, ngöne la nöjei provës i Asueru joxu, ngöne la drai ka cas, lo hna 13 ne drai ne la hna 12 ne treu, ene la treu Adara.* 13 Tro la kopi ne la tusi celë a mama ngöne la nöjei provës, matre nyine wathebo. Nge troa e la alien ej kowe la nöjei nöj, matre tro la angetre Iudra a hnëkë kowe la drai cili, me lepe la itre ithupëjia me angatr. 14 Nge ame la itre ka tro fë maca, hnei angatr hna tithe la itre hos ne iwaja i joxu, matre troa canga trongëne la hna amekötin hnei joxu. Nge hna mama fe la hna amekötine celë e Susani, lo traon hna eköhagen.
15 Thupene lai, hnei Modikai hna tro qaathei joxu, nge angeic a heetrëne la iheetr ne joxu ka bulu me wië, me ca kootr hna kuca hnei nyipi mano lino ka madra. Nge angeice fe a petrëne la ketre korona gool ka tru. Nge itre atre Susani a sue hnei madrin. 16 Nge ame kowe la angetre Iudra, kösë hna una la ketre ehnef* ka tru koi angatr, nge angatr a madrin, me feet, me iatruny. 17 Nge ame ngöne la nöjei provës me nöjei traon, lo itre ka kapa la tusi ne la joxu memine la wathebo i nyidrë, ke kola madrine la angetre Iudra, eje hi, atraqatre la trenge madrine i angatr, nge angatr a hnëkë xeni me feet. Nge ame la itre xa nöj, angatr a xouene la angetre Iudra, matre angatr a thoi me hape, atre Iudra fe angatr.