Iobu
4 Ame hnei Elifaza atre Temana hna sa me hape:
2 “Maine tro huni a tupath troa ithanata koi nyipë, hapeu, tro kö nyipëti a elëhni?
Ke drei la ka atreine lapa thaup?
3 Nyipici, hnei nyipëti hna hajine la ka ala nyim,
Nge hnei nyipëti hna aegöcatrene la itre ime ka thip.
4 Nge hnei nyipëti hna amejëne la itre ka kei hnene la itre trengewekë i nyipë,
Nge hnei nyipëti fe hna thuecatrene la itre iwatingöneca ka geny.
5 Ngo ame enehila, kolo pena a traqa koi nyipë, nge akötre catre nyipë;*
Kola ketri nyipë, nge nyipëti a hleuhleu.
6 Hapeu, tha kolo kö a hamë mejiun koi nyipë, la nyipëti a xoue Akötresie?
Nge tha kolo kö a hamë mejiun koi nyipë hnene la aqane mele nyipici nyipë?
7 Ngo pane mekune ju nyipë laka, hna hane kö meci la atre ka pë ethan?
Nge eu la kola apatrene la itre atre ka meköt?
8 Thenge la hnenge hna öhn, ame la itre ka eënyine* la ngazo
Me itre ka traane la akötr, ke casi hi la hnei angatr hna menuën.
9 Meci hë angatr hnene la hnamano i Akötresie,
Nge patre hë angatr hnene la elëhni atraqatr i nyidrë.
10 Kola ho la liona nge drenge fe së la mejene la neköi liona,
Ngo hna axeciëne fe la itre nyö ne la itre liona ka catr.
11 Nge meci hë la liona, ke pë hë tha i nyën,
Nge isa ije hë la itre neköne la liona.
12 Ngo hna traqa fë juetrëne koi ni la ketre trengewekë,
Nge drenge hë hnene la lue hnangenyëng la mejen ej.
13 Nyipine la itre mekun ka iaxoueny, lo hna meköle goeën e jidr,
Ngöne la kola hmulizië la itre atr,
14 Hna traqa koi ni la hmengöhmengön ka catrehnin,
Nge hna ketr la itre juneng hnene la xou atraqatr.
15 Ke hna tro qëmekeng hnene la ketre u;
Ame hna ngongo la ngönetreing.
16 Matre cile ju hi ej,
Ngo tha wangatrehmekune kö ni la pengön ej.
Ej a cile qëmekeng;
Nge pë ju hi mejen, ame hnenge hna drenge la ketre aqane ewekë kola hape:
17 ‘Hapeu, ka meköti kö la atr hui Akötresie?
Nge ijije kö tro la atr a pë engazon hune la Atre Xupi angeic?’
18 Goeën! Tha mejiune kö nyidrë kowe la itre hlue i nyidrë,
Nge öhne fe nyidrë la itre tria ne la itre angela* i nyidrë.
19 Haawe, nga the qaja pala ha la itre ka lapane la itre uma hna xup hnei dro ka fedr,
Nge hna ami trepen ngöne la xaxau,
Lo ka hmaloi hi troa amudromudron tune la itre neköi öni!
20 Hna lep anyilanyilanyi angatr qaan e hmakanyi uti hë e hej;
Patre hë angatr epine palua, nge pëkö ka semesinen.
21 Nge hapeu, tha ceitu i angatre kö memine la ketre itat laka, hna fejetrije la enon?
Meci asë hë angatr nge pëkö inamacan.