Esodro

23 “The tro kö eö a kötre fë ithanata ka thoi. Nge the nyixölene kö la atre ka ngazo, ene la troa sili trengathoi. 2 The tro kö eö a xötrethengene la ka ala nyimu göne la troa kuca la ngazo, nge the tro kö eö a aqaline la meköt, me qaja la itre trengathoi matre amadrinëne la ka ala nyim. 3 The tro kö eö a ië hna hnim la eö a amekötine la jol ka traqa kowe la ka pë ewekë.

4 “E traqa jë patre la kau maine boliko ne la ithupëjia me eö, nge e öhne hë eö, qa i eö troa bëeke fë koi angeic. 5 Nge maine eö a öhne la kola kei la boliko ne la atr ka methinë eö, ke hace catre la ehnefe ne ej, tha tro kö eö a thinge la luemeke i eö me nue angeic. Ngo loi e tro eö a xatua angeic troa una la ehnefe i nyën.

6 “The tro kö eö a atriane la meköt kowe la ka pë ewekë, ngöne la kola amekötine la jole ka traqa koi angeic.

7 “Ananyine pi la itre trengathoi,* nge the humuthe kö la ka pë ngazon, memine la ka meköt,* ke tha tro kö ni a jele mekötin la atre ka ngazo.

8 “The kapa kö la mani hna hamën juetrën, ke ame la mani hna hamën juetrën, tro ej a atimekën la atre ka öhn, me atriane la trengewekë ne la atre ka meköt.

9 “The tro kö eö a qanangazone la trenyiwa, ke atre hnyawa hi epuni la hni ne la trenyiwa,* ke hnei epuni fe hna mele trenyiwa e Aigupito.

10 “Tro eö a eënyine la zi eö, me menuën la itre wen koi 6 lao macatre. 11 Ngo ame ngöne la hna 7 ne macatre , tro eö a pane nue la dro, troa pane mano. Matre tro la itre ka pë ewekë ngöne la nöje i eö a xeni la ka cia. Nge ame la hnei angatre hna nu, ke koi itre öni waele pë hë. Celë hi nyine tro fe eö a kuca kowe la itre hlapa vine i eö, me itre hlapa elaio* i eö.

12 “Ngöne la 6 lao drai, tro eö a kuca la nöjei jole i eö, ngo ngöne la hna 7 ne drai, tha tro kö eö a huliwa. Matre tro la kau me boliko i eö a pane mano, nge tro la neköne la hlue i eö, memine la trenyiwa a xomi trengecatr.

13 “Hnëqa i epun troa trongëne asë la hnenge hna qaja. Nge the tro kö epuni a hëne la ëjene la itre xa haze, tha tro kö a drenge qa ngöne la që i eö.

14 “Tro eö a akönia feete koi ni ngöne la macatre. 15 Tro eö a atrune la Feet Ne La Itre Falawa Ka Pë Levenen, nge tro eö a xeni falawa ka pë levenen koi 7 lao drai, tune lo hnenge hna amekötine koi eö, hmekune la drai hna sa ngöne la treu Abiba,* ke ijine cili hi lo eö a tro qa Aigupito. Pëkö ka troa traqa koi ni nge pëkö hna xom. 16 Nge qa i eö fe troa feetëne la Feet Ne Hle Wene Feja,* lo itre pane wen ne la huliwa i eö, lo hnei eö hna tran ngöne la itre hlapa. Nge tro fe eö a feetëne la itre Feet Ne Menuë* Hlapa e pune macatre, lo eö a bëeke fë la itre wene ne la huliwa i eö, qa ngöne la itre hlapa i ö. 17 Haawe, tro la nöjei trahmany a akönia mama ngöne la macatre kowe la nyipi Joxu, ene Iehova.

18 “The tro kö eö a ithuenyiköne la madra nyine huuje koi ni, me ketre ewekë hna nyi levenen. Nge ame la giris hna hamën nyine huuj ngöne la itre ijine kola atrunyi ni, tha tro kö a nue uti hë e hmakany.

19 “Qa i eö troa traqa fë la itre pane wene ka sisitria qa ngöne la zi eö, kowe la hnalapa i Iehova Akötresi eö.

“The tro kö eö a atrone la neköi nani ngöne la zane thi ne la thine i nyën.

20 “Eni a upe la angela qëmeke i eö, matre troa thupë eö ngöne la gojeny, nge matre lö sai eö kowe la götran hnenge hna hnëkën. 21 Nyipiewekë angeice ju, nge drei angeice ju, the icilekeu kö me angeic, ke tha tro kö angeice lai a nue la itre ngazo i epun, ke thei angeice la ëjeng. 22 Ngo e tro eö a drei angeice hnyawa, nge e tro eö a kuca asë la hnenge hna qaja, tro hë ni a ithupëjia me itre ithupëjia me eö. Nge tro fe ni a icilekeu me itre ka icilekeu me eö. 23 Ke tro la angelang a tro qëmeke i eö, nge tro ej a tro sai eö koi angetre Amora, me Heth, me Perizi, me Kanana, me Hivi, me Iebusi. Nge tro hë ni a lep apatrenyi angatr. 24 The tro kö eö a thil kowe la itre haze i angatr, nge wange kö ke huli eö pi troa nyihlue i angatr. Nge the tro kö eö a xome la itre thiina i angatr, ngo qa i eö pe troa apatrene la itre haze i angatr, me thëtrije la itre sine feni ka hmitrötr* i angatr. 25 Qa i epuni troa nyihlue i Iehova Akötresi epun, nge tro nyidrëti a amanathithine la falawa i eö, me timi eö. Nge tro fe ni a apatrene la itre sine mec qaathei eö. 26 Tha tro kö a uthith la itre upune ne la itre föe ne la nöje i eö, nge pëkö ka troa safëj,* nge tro kö ni a aqeane* la itre drai ne tro eö a mel.

27 “Qëmekene tro eö a traqa, tro ni a kuca la ketre ewekë matre tro angatr a xoue ni, nge tro ni a amenumenune la nöjei nöj hnei eö hna troa ixelë memin, me weje la itre ithupëjia qëmeke i eö.* 28 Tro ni a upe la hace hni* qëmeke i eö, nge tro ej a helën qëmeke i eö la angetre Hivi, me Kanana, me Heth. 29 Tha tro kö ni a helë angatr qëmeke i eö ngöne la ca macatre, wanga pë pi atrene la nöj, nge wanga ala nyimu jë la itre öni wael ka troa traqa koi eö. 30 Tha tro kö ni a aca tro helë angatr qëmeke i eö, ngo tro pe ni a nue ijin tro eö a mana, me thapa asë la nöj.

31 “Tro ni a acili ifego i eö, qaane la Hnagejë Ka Palulu, uti hë la Hnagejë i angetre Filisiti, nge qaane la hnapapa, uti hë la hneopegejë,* ke tro ni a nue la itre atrene la nöj kowe la lue ime i epun, nge tro eö a helë angatr qëmeke i eö. 32 The tro kö eö a isisinyikeu me angatr, me itre haze i angatr. 33 Tha tro kö angatr a lapa ngöne la nöje i eö, wanga huli eö jë hnei angatr troa ngazo koi ni. Ke maine tro eö a nyihluene la itre haze i angatr, ketre thethi lai koi eö.”