Iobu
7 “Hapeu la mele ne la atr e celë fen, tha ceitu kö memine la ketre ehnef?
Nge ame la itre drai angeic, ke tha ceitu kö memine la itre drai ne la atre huliwa i maseta?
2 Tune la hlu, angeic a thele gaa xapo,
Nge tune la atre huliwa, angeic a treqene troa nyithupe i angeic.
3 Ketre tun, hna hamë ni la itre treu ka gufa
Nge hna ahnithe koi ni la itre jidri ne treij.
4 Nge ame hë la eni a meköl, eni a hnying me hape: ‘Eu hmaca la tro ni a hlë?’
Nge pine laka, qeadridri catre la jidr, eni a ujë agö uti hë e hmakany.*
5 Nge hna lapan asë la ngönetreing hnene la itre piagotr me itre kupeine ka si dro;
Nge kola si kakötr me trenge pi la ngönetreing.
6 Saqe hi la itre draing hune la jia ne huliwa ne la atre cai maano,
Nge kola tro la itre drai, nge pë hë mejiuneng.
7 Mekune ju laka, enyi la meleng,
Nge tha tro hmaca kö la luemekeng a öhne la madrin.*
8 Ame la luemek ka goeë ni enehila, ke tha tro hmaca kö ej a öhnyi ni;
Nge tro la luemeke i nyipë a thele ni, ngo patre hë ni.
9 Tune la iaw ka ae hna ufe enyin,
Ame la atre uti koi Hua,* ke tha tro hmaca kö angeic a mejë qa lai.
10 Tha tro hmaca kö angeic a bëeke kowe la hnalapa i angeic,
Nge tha tro hmaca kö a wangatrehmekunyi angeic hnene la hnalapa i angeic.
11 Celë hi matre, tha tro kö ni a xomehnöthe la qëng.
Nge tro ni a ewekë ngöne la akötreng;
Me eetr, ke haitre hë la meleng!
12 Ke hapeu, hnagejë ni maine ketre öni atraqatr ne hnagejë,
Matre tro nyipëti a acile la ketre atr troa thupë ni?
13 E öninge ka hape: ‘Tro la göhneng a akeukawanyi ni;
Nge tro kö la iling a aupune la treijeng,’
14 Nyipëti a axouenyi ni hnene la itre pu
Nge nyipëti a asesëkötrë ni hnene la itre iamamanyikeu,
15 Matre ka loi tro ni a iën troa tha mano, me iën la mec hune la troa mel,
Memine la ngönetrei ce.*
16 Eni a sisine la meleng; Nge xele hë ni ma hane mel.
Nue ni pi, ke ceitune la itre draing memine la hnamano.
17 Ke ka ue la atr matre tro nyipëti a nyipi angeic
Me wangatrunyi angeic?
18 Nge hnauëne laka, nyipëti a waipengöi angeic e nöjei hmakanyi
Me tupathi angeic e nöjei ijin?
19 Hapeu, tha tro kö nyipëti a ujë qaatheng
Me nue ijineng troa pane ulume la itra hnyijung?
20 Ngacama ase hë ni kuca la ngazo, ngo tro ni a akötrë nyipëti tune kaa, nge nyipëti pe la Atre Thupën la nöjei atr?
Nge hnauëne laka, nyipëti a alamekë ni?
Hapeu, eni hë la ketre ehnefe koi nyipë?
21 Nge hnauëne laka, tha nue kö nyipëti la ngazong
Me kapa la menung?
Ke easenyi hë la tro ni a meköle ngöne la xaxau,
Nge tro nyipëti a thele ni, ngo patre hë ni.”