Iobu
10 “Sisi hë koi ni la meleng.
Nge tro pë hë ni a awe fë la itre akötreng.
Nge tro ni a ewekë, ke haitre hë la meleng!
2 Tro ni a qaja koi Akötresie ka hape: ‘The upezö ni kö.
Ngo pane qaja jë koi ni, la kepin matre nyipëti a icilekeu me eni.
3 Hetre loi kö hnei nyipëti hna kapa qa ngöne la hna iaxösisi,
Me methinëne la huliwa ne la lue ime i nyipë
Me kapa la itre huliwa ne la itre atr ka ngazo?
4 Luemeke ne atre kö, la luemeke i nyipë?
Nge nyipëti kö a goeëne tune la aqane goeëne la atr?
5 Hapeu, ceitune kö la itre drai nyipë memine la itre drai ne la atr?
Maine itre macatre i nyipë memine la itre macatre ne la atr?
6 Matre tro nyipëti a thele la ngazong
Me thele lapane la triang?
7 Atre kö nyipë laka, tha zönge kö;
Nge pëkö ka atreine amele ni qa ngöne la ime i nyipë.
8 Lue ime i nyipë la ka xupi ni me huliwa ni,
Ngo nyipëti pena mekune troa apatrenyi ni enehila.
9 Ngo mekune kö nyipë laka, hnei nyipëti lo hna xupi ni hnei dro ka fedr,
Ngo enehila, nyipëti hmaca a xomi ni kowe la xaxau.
10 Hapeu, tha hnei nyipëti kö hna nei ni tune la melek
Matre tro ni a tune la melek ka pui hmëz?
11 Hnei nyipëti hna heetrë ni hnei kupein me ijön,
Nge hnei nyipëti hna iothekeu ni hnei jun me non.
12 Hnei nyipëti hna hamë ni la mel me ihnimi nyipici;
Nge hnei nyipëti hna thupëne la meleng* hnene la aqane nyihnyawa ni hnei nyipë.
13 Ngo hnei nyipëti hna mekune troa kuca juetrëne la itre ewekë cili.*
Ngo atre hi ni laka, qaathei nyipëti la itre ewekë cili.
14 Maine tro ni a kuca la ngazo, tro kö nyipëti a öhn,
Nge tha tro kö nyipëti a nue la ngazong.
15 Maine eni la atrekë zön, ke loi kö koi ni!
Nge ngacama ka meköti ni, tha tro kö ni a adraiëne la heng,
Ke atraqatr la hmahmang nge catrehnine catre la akötreng.
16 Maine tro ni a adraiëne la heng, tro nyipëti a weji ni tune la aqane iwej ne la liona
Nge tro hmaca kö la mene i nyipëti a cile koi ni.
17 Nyipëti a nyixane la itretre anyipicine ka icilekeu me eni
Nge catrehnine catr la elëhni nyipëti koi ni,
Kola traqa itrai la itre akötr koi ni.
18 Hnauëne laka, hnei nyipëti hna traqa sai ni qa kuhu hni nenë?
Loi ju kö tro ni a mec, nge pëkö atre öhnyi ni.
19 Kösë tha hane ju kö ni mel;
Nge loi ju kö troa xepi ni qa kuhu hni nenë kowe la hua.’
20 Hapeu, xalaithe pe hi la itre draing? Epi tro Akötresieti a pane nue ni;
Nge epi tro nyidrëti a ajeane la luemeke i nyidrë matre uqa jë* ni
21 Qëmekene tro ni a tro palua
Ngöne la nöj gaa jidr, memine la ahnuene la mec,
22 Nöje gaa melöhlem,
Me nöje ne la ahnuene la mec nge ka zikoziko,
Nge ame fe la lai e cili ke kösë melöhlem.”