Iobu
9 Ame hnei Iobu hna sa ka hape:
2 “Atre hnyawa hi ni lai.
Ngo troa meköti tune kaa la atr ka mec qëmeke i Akötresie?
3 Maine tro la ketre atr a isi ithanata* me nyidrë,
Ke thatreine jë kö angeic troa sa la ca hnying qa ngöne la 1 000.
4 Ke hni ka inamacane nyidrë nge atraqatr la mene i nyidrë.
Matre drei la ka atreine cile koi nyidrë me mel?
5 Nyidrëti a feje* la itre wetr nge pëkö ka atre;
Nge nyidrëti a ukapiën itre ej ngöne la elëhni nyidrë.
6 Nyidrëti a enijëne la fene hnengödrai qa ngöne la göhnen ej,
Nge kola kötrekötr la itre ikapan ej.
7 Nyidrëti a wathebone la jö troa hudrum
Nge nyidrëti a thunge la ehudrumene la itre wëtresij;
8 Nyidrëti casi hi la atre seluthe la hnengödrai,
Me tro hune la itre hoke ne gejë ka draië.
9 Nge nyidrëti la ka xupe la itre fini wëtresij hna hape, Ash* me Kesil* me Kima,*
Memine la itre fini wëtresij ne kolojë;*
10 Hnei nyidrëti hna kuca la itre ewekë atraqatr nge hna thatrehmekun,
Me nöjei ewekë nyine hain hna thatreine e.
11 Nyidrëti a tro ezi ni, ngo tha öhne kö ni;
Nge nyidrëti a tro qëmekeng, ngo tha wangatrehmekune kö ni.
12 Nge drei la ka atreine cile koi nyidrë, la nyidrëti a thapa la ketre ewekë?
Drei la ka atreine qaja koi nyidrë ka hape: ‘Nemene la hnei nyipëti hna kuca?’
13 Tha tro kö Akötresie a xomehnöthe la elëhni i nyidrë;
Nge tro fe la itre sine xöle i Rahaba* a thil qëmeke i nyidrë.
14 Celë hi matre, ame la eni a troa sa koi nyidrë
Loi e tro ni a pane mekune hnyawa la itre hnaewekëng, matre isi ithanata me nyidrë!
15 Maine nyipici ju hë la hnenge hna pi qaja, ngo tha tro kö ni a sa koi nyidrë.
Tro pe hi ni a xëwe kowe la utipin ne la atre ameköti ni.*
16 Nge maine tro ni a hë nyidrë, hapeu, tro kö nyidrëti a sa koi ni?
Eni a mekune laka, tha tro kö nyidrëti a dreng la trengewekëng,
17 Ke nyidrëti a lepi ni hnene la wene
Me nyixan la itre eatreng nge pë pe kepin.
18 Nge tha nyidrëti kö a nue ni troa pane mano;
Nyidrëti pala hi a atiqanyi ni hnene la itre ewekë ka haitr.
19 Ngo maine kola thel ka hape, drei la ka catr, nga nyidrëti hi.
Nge maine kola thel ka hape, drei la ka meköt, öni nyidrëti ka hape: ‘Drei la ka atreine qeje ni?’ *
20 Nge maine ka nyipici* ju ni, tro la qeng a jelengazo ni;
Nge ngacama ka mele nyipici ni, tro nyidrëti a jelengazo* ni.
21 Nge ngacama hnenge hna mele nyipici, thatre kö ni la ewekë ka treqe ni;
Matre xele* hë ni ma wange la meleng.
22 Haawe, ceitun asë hi. Celë hi matre eni a qaja ka hape,
‘Nyidrëti a apatrene la atre ka meköt tune la atre ka ngazo.’
23 Ke maine troa traqa la ketre di atraqatr hna mecin,
Tro nyidrëti a hnyima fë la akötre ne la itre atr ka pë ethan.
24 Eje hi, hna nue la fene hnengödrai kowe la ime ne la itre atr ka ngazo;
Nge nyidrëti a thunge la luemeke ne la itretre amekötin.
Ngo maine tha nyidrëti kö, nga drei hö?
25 Ame enehila, nyimenyime catre kö la itre draing, hune la atre nyinyap;
Itre ej a ikötreny, nge tha öhne kö la loi.
26 Itre ej a ucic tune la itre he hna xup hnei rozo,
Me tune la aeto ka uti troa ea la tha i nyën.
27 Nge maine tro ni a qaja ka hape: ‘Tro hë ni a thëthëhmine la aweng,
Tro ha saze la iqëmekeng me madrin,’
28 Ngo eni pala hi a xou pine la nöjei akötreng,
Nge atre hi ni laka, tha tro kö nyipëti a jelemeköti ni.
29 Nge pine laka, tro pala hi a jelengazo ni.
Nga nyine u la tro ni a nue trengecatr?
30 Nge maine tro ni a siëne la timi ne kiona,
Me apuiloine la lue imeng hnene la nyine wasi maano,*
31 Haawe, tro hë nyipëti a alö ni e kuhu hnaop,
Nge goi tro fe la itre iheetreng a sisi ni.
32 Ke ame nyidrë, tha ketre atre kö ka tung matre tro ni a sa koi nyidrë,
Me utisai nyidrë kowe la atre amekötin.
34 Nge maine tha tro hmaca kö nyidrëti a lepi* ni
Me axouenyi ni hnene la itre ewekë ka iaxoueny,
35 Tha tro hë ni a cil troa ithanata koi nyidrë,
Ke pëkö nyipi kepin e kuhu hning troa ithanata cememine la xou.