Iobu
16 Ame hnei Iobu hna sa me hape:
2 “Ase hë ni dreng la itre ewekë ka tun.
Epuni asë la itretre iakeukawany ka iakötrë!
3 Hapeu, hetre pune kö kowe la itre trengewekë ka pë alien?*
Nemene la ka upi ö troa sa tune lai?
4 Ijijinge fe hi troa ewekë tui epun.
Ke maine epuni ju a melën la hneng hna melën,
Ijijinge fe troa qaja la itre ewekë nyine icilekeu me epun
Me nangenange koi epun.
5 Ngo tro pe ni a aegöcatrenyi epun hnene la qëng,
Nge tro la ukeineqëng a axapone la hni epun.
6 Ke maine tro ni a ewekë, tha tro kö a xapo la akötreng,
Nge maine tro ni a lapa thaup, troa lapa kötre tune kaa la akötreng?
7 Ngo enehila, kucakuca ha ni hnei Akötresie;
Ke hnei nyidrëti hna apatren asë la hnalapang.*
8 Hnei nyipëti fe hna xom aconyi ni qëmekene la itre atr,
Matre kola qejeqeje ni hnene la aqane wegejung.
9 Hna tha zezenyi ni hnene la elëhni i nyidrë, nge nyidrëti a methinë ni.
Nyidrëti a kiki inyö koi ni.
Nge kola goeëtili ni hnene la ithupëjiang.
10 Hnei angatr hna fe angangane la që i angatr koi ni,
Me xe ni matre hmahma jë ni;
Nge angatr a ce uti koi ni.
11 Hnei Akötresieti hna nue ni kowe la itre nekö trahmany,
Me nuetriji ni kowe la ime ne la itre ka ngazo.
12 Ka tingetinge ni lo, ngo hnei nyidrëti hna ahleuhleunyi ni;
Hnei nyidrëti hna xölehuje la nyinawang, me hutra;
Nge eni hë la tha i nyidrë.
13 Kola cile xötreithi ni hnene la itretre huji pehna i nyidrë;
Nge nyidrëti a jaqa la lue wenethulumating, nge pëkö utipine i nyidrë;
Nyidrëti a nenge la osoneng e kuhu hnadro.
14 Nyidrëti pala hi a thönyi ni;
Nge nyidrëti a sesë koi ni tune la atre isi.
15 Hnenge hna cane la ibëek ka tru thenyin* matre heetrëne la ngönetreing,
Nge ase hë ni kelem e kuhu hnadro la trengecatreng.
16 Waxamadra ha la luemekeng hna treij,
Nge hleuhleu hë la iqëmekeng,
17 Ngacama tha hnene kö la lue imeng hna kuca la ngazo
Nge ka pexeje la thithing.
18 Haawe, ihnadro fe, the juetrëne kö la madrang!
Nge tha tro kö a hetre hnë mano kowe la aweng!
19 Ke ame enehila, e hnengödrai la atre anyipici ni;
Nge eje ngöne la itre gaa draië la atre isigöli ni.
20 Kola hnyimasai ni hnene la itre sineeng
Nge kolo pe a xölaxöla la itre trenge timidrang* koi Akötresie.
21 Loi e troa axecië mekun göi Akötresie memine la ketre atr,
Tune la aqane axecië mekun kowe la lue atr.
22 Ke hna e la itre macatre elany,
Nge tro ni a trongën la gojeny, lo tha hna bëeke kö qa ngön.