Iobu
11 Ame hna sa hnei Zofar atre Naamathi, me hape:
2 “Hapeu, pëkö nyine troa sa kowe la itre trengewekë i nyipë?
Nge tro kö nyipëti a ithanata atrunyi matre jelenyipici nyipë?
3 Nge ame la itre trengewekë i nyipë ka pë alien, tro kö a ahumune la nöjei atr?
Nge ame la nyipëti a ihnyimasai, tre, hetre ka tro kö a ameköti nyipë?
4 Ke öni nyipëti lo ka hape: ‘Ka wië la hnenge hna ini,
Nge pëkö engazong qëmeke i nyipë.’
5 Ngo maine Akötresieti ju a pi ithanata me nyipë
Me fe la që i nyidrë matre sa koi nyipë!
6 Haawe, tro hë nyidrëti a amamane koi nyipë la itre ewekë ka sihngödri ne la inamacan,
Ke ka nyimu pengön la troa huliwa inamacan.
Nge tro hë nyipëti a atre laka, Akötresie a nue la itre xa ngazo i nyipë.
7 Atreine kö nyipë troa öhne la itre ewekë i Akötresie ka thatrehmekun
Me atrepengöne asë la Ka Tru Trenge Men?
8 Draië kö la inamacane hune la hnengödrai. Matre tro pë nyipëti a kuci nemen?
Nge jui kö ej hune la Hua. Nge nemene fe la hnei nyipëti hna atre?
9 Draië kö ej hune la fene hnengödrai
Nge isaisa kö ej hune la hnagejë.
10 Maine tro nyidrëti a fetra, me akalabusine la ketre atr, me hëne la atre amekötin,
Drei la atr ka atreine troa sewe nyidrë?
11 Ke atre kö nyidrëti la itre atr ka thoi.
Nge e tro nyidrëti a öhne la ngazo, tre hapeu, tha tro kö nyidrëti lai a hmekën?
12 Ame la atr ka hmo, tre tro angeic lai a inamacan
Ngöne la ijine troa hnahone la atr hnene la boliko wael.
13 Maine hnëkëne ju nyipë la hni nyipë
Me li ime koi Akötresie.
14 Maine tro la ime i nyipë a kuca la ngazo, ke ananyin eje pi,
Ngo the nue kö la thiina ka ngazo troa lapaane la itre itate i nyipë.
15 Nge tha tro hë nyipëti a hmahma troa gala draië;
Tro hë nyipëti a cile catr, nge pëkö xou.
16 Ke tro hë nyipëti a thëthëhmine la itre akötre i nyipë;
Nge tha tro hmaca kö nyipëti a mekun itre ej tune la itre tim ka patr.
17 Nge tro hmaca kö a hudrum la mele i nyipë hune la hnaipajö;
Nge tro fe hë la melöhleme i nyipë a tune la hmakany.
18 Tro ha xecie koi nyipë, ke hetre mejiun,
Nge tro nyipëti a goeëne xötreithi nyipë me meköle tingeting.
19 Tro nyipëti a meköl, nge pëkö ka troa axouenyi nyipë,
Nge ala nyimu la itre ka troa wai nyipë.
20 Nge tro ha genyi la luemeke ne la itre atr ka ngazo;
Nge pëkö hna troa kötre kow,
Ke meci pe hi la mejiune koi angatr.”