Iobu

 2 “Nyipici, itre mekunange ka ngazo a upi ni troa sa

Ke kola huliwa la hning.

 3 Drenge hë ni la ketre ithanata ka qaqa ni;

Nge kola iele ni hnene la inamacaneng* troa sa.

 4 Atre pala hi nyipëti lo laka,

Qaane lo kola amë la atr* e celë fen,

 5 Ke tha qea ju kö la kola sue madrine la atr ka ngazo

Nge tha ka cile huti kö la madrin ne la atr ka pë metrötre* koi Akötresie.

 6 Ngacama kola elë draië la lolo i angeic e koho hnengödrai

Nge he i angeic a ketre la itre iaw,

 7 Ngo tro angeic a patre palua tune la hnei angeic hna kötrengönë;

Nge tro hë lo itre ka öhnyi angeic ekö a qaja ka hape: ‘Ekaa ha angeic?’

 8 Tro angeic a patr tune la pu, nge tha tro hmaca kö a öhnyi angeic;

Nge tro ha apatrenyi angeic tune la ketre ewekë hna meköle goeën e jidr.

 9 Tha tro hmaca kö a goeë angeic hnene lo luemek ka öhnyi angeic,

Nge tha tro hmaca kö a öhnyi angeic hnene la göhne i angeic.

10 Tro la itre nekö i angeic a thel troa nyi loi kowe la itre atr ka pë ewekë,

Nge tro la lue ime i angeic a hamëne hmaca la itre mo hnei angeic hna thapa.

11 Hna tiqa la itre june i angeic ekö hnene la egöcatr ne thupëtresij,

Ngo tro hë ej a ce meköl me angeic ngöne la xaxau.

12 Maine ka hnyapa la ngazo ngöne la që i angeic,

Nge angeic a juetrën ej fene la thineme i angeic,

13 Me madrine fë me xele ma ulum ej

Nge angeice pe a lapa fë ngöne la që i angeic,

14 Tro ha haitre la a i angeic e kuhu hni angeic;

Nge tro hë ej a tune la poizin* ne la asip koi angeic.

15 Ke hnei angeic hna ulume la itre mo, ngo tro hmaca kö angeic a hmitrane trij;

Nge tro Akötresie a huletrij itre ej qa kuhu hni angeic.

16 Tro angeic a fuluthe la poizin ne la asip;

Nge tro ha humuthi angeic hnene la nyö* ne la vaipa.

17 Tha tro kö angeic a hane öhne la itre tim ka neni,

Memine la itre hneopegejë ne miel me batra.

18 Tro hë angeic a hamëne hmaca la itre ewekë i angeic,* ngo tha hna huliwane ju kö;

Ke pëkö ijine i angeic troa madrine fë la itre ewekë hnei angeic hna hetreny.

19 Ke hnei angeic hna qanangazon me nuetrije la itre ka pë ewekë;

Me thapa la ketre uma ngo tha hnei angeice kö hna xup.

20 Qa ngöne lai, tha tro kö angeic a tingeting;

Ke tha tro kö a amele angeic hnene la itre mo i angeic.

21 Nge pë hmaca kö nyine tro angeic a öni;

Celë hi matre, tha tro kö a cile huti la itre loi i angeic.

22 Nge ame hë la kola tru la itre ewekë i angeic, tro hë angeic a seseu;

Nge tro ha xulu koi angeic la akötr ka catrehnin.

23 Nge ame hë la kola tiqa la hni angeic,

Tro Akötresie* a upe koi angeic la elëhni atraqatre i nyidrë,

Nge tune la kola mani, tro ha trotro hui angeic la nöjei ewekë ka ngazo.

24 Nge ame la angeic a kötrene la itre jia ne isi fao,

Ke tro pena a jaqa angeic hnene la itre ane pehna qa ngöne la tane pehna kopa.

25 Angeic a auken qa ngöne la ju i angeic la ane pehna,

Nge qa ngöne la dre i angeic la ketre jia ne isi ka melemel,

Ame hna löthi angeic hnene la xou atraqatr.

26 Nge hna hnëkëne la melöhlem thatraqane la itre mo i angeic;

Nge tro ha dreuthetriji angeic hnene la ketre eë ka xulu xan;

Nge kola treqene la itre ka mele pe qa ngöne la itate i angeic hnene la hnëjin.

27 Tro la hnengödrai a qaja amamane la tria i angeic;

Nge tro la ihnadro a cile koi angeic.

28 Nge tro ha apatrene la uma i angeic hnene la di atraqatr;

Nge tro lai a tune la gejë atraqatr ngöne la drai ne elëhni i Akötresie.*

29 Celë hi hnëjin hnei Akötresie hna hnëkën kowe la atre ka ngazo,

Lo edrö hnei Akötresie hna amë koi angeic.”